ໃນວັນທີ 29 ສິງຫາ – 01 ກັນຍາ ທີ່ຜ່ານມານີ້, ນັກຂ່າວ ຂອງ ສະພາປະຊາຊົນແຂວງຫຼວງພະບາງ ໄດ້ເຂົ້າຮ່ວມກອງປະຊຸມຝຶກອົບຮົມ ວຽກງານສື່ມວນຊົນ ຢູ່ທີ່ເມືອງວັງວຽງ, ແຂວງວຽງຈັນ, ພາຍໃຕ້ການເປັນປະທານ ຂອງ ທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ, ມີບັນດາທ່ານນັກວິທະຍາກອນ ທີ່ມາຈາກກົມສື່ມວນຊົນສະພາແຫ່ງຊາດ, ວິທະຍຸກະຈາຍສຽງແຫ່ງຊາດ, ໂທລະພາບແຫ່ງຊາດ ແລະ ນັກສຳມະນາກອນຈາກສະພາປະຊາຊົນແຂວງ 18 ແຂວງ ໃນຂອບເຂດທົ່ວປະເທດເຂົ້າຮ່ວມ ລວມມີ 72 ທ່ານ, ຍິງ 30 ທ່ານ ເຂົ້າຮ່ວມ.
ກອງປະຊຸມໄດ້ຮັບຟັງ ການນຳສະເໜີບົດຮຽນກ່ຽວກັບ ການຂຽນຂ່າວຕອບໂຕ້ຖ້ອຍທຳນອງບິດເບືອນຂອງບຸກຄົນບໍ່ດີ, ການບັນນາທິການເນື້ອໃນແລະ ເຕັກນິກການຖ່າຍພາບນິ້ງ–ວິດີໂອ ເພື່ອໃຫ້ບັນດາທ່ານນັກສຳມະນາກອນໄດ້ຮັບຮູ້ ແລະ ເຂົ້າໃຈຄວາມຮູ້ພື້ນຖານ ການຂຽນຂ່າວຕອບໂຕ້ຕໍ່ກັບກຸ່ມຄົນບໍ່ດີ, ການຈຳແນກຂ່າວ, ການເກັບກຳເນື້ອໃນຂ່າວ, ການໃຊ້ຄຳສັບ, ການຈັດວາງສຳນວນໃຫ້ເໝົາສົມ ແລະ ການກວດກາຂ່າວ ເພື່ອຫັນເປັນນັກຂ່າວອາຊີບ; ພ້ອມດຽວກັນນັ້ນ ກໍ່ໄດ້ແລກປ່ຽນບົດຮຽນ, ປະສົບການ, ສິ່ງທ້າທາຍ, ຂໍ້ສະດວກ–ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານສື່ມວນຊົນ ຂອງ ສະພາປະຊາຊົນແຂວງ ໃນໄລຍະຜ່ານມາ ເປັນຄືແນວໃດຫຼັງຈາກນັ້ນ ກອງປະຊຸມໄດ້ໃຫ້ນັກສຳມະນາກອນທີ່ເຂົ້າຮ່ວມ ຈັດເປັນກຸ່ມເພື່ອເຮັດບົດຝຶກຫັດ ກ່ຽວກັບຫົວຂໍ້ຂອງບົດຮຽນທີ່ໄດ້ນຳມາສະເໜີໃນກອງປະຊຸມຄັ້ງນີ້ ພ້ອມທັງຂຶ້ນນຳສະເໜີ ໃຫ້ບັນດາທ່ານນັກວິທະຍາກອນ ໄດ້ມີຄຳຄິດເຫັນ, ໃຫ້ທິດຊີ້ນຳ ໃນການຈັດຕັ້ງປະຕິບັດວຽກງານສື່ມວນຊົນ ຂອງ ສະພາແຫ່ງຊາດ ແລະ ສະພາປະຊາຊົນ 18 ແຂວງໃນຕໍ່ໜ້າ ໃຫ້ມີການພັດທະນາ, ມີຄວາມທັນສະໄໝຂຶ້ນໄປ ແລະ ເປັນມືອາຊີບ.
ຂ່າວ: ວິລິຍະ ວັນນະສີ