ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ແຂວງຜົ້ງສາລີ ແລະ ສະມາຊິກສະພາປະຊາຊົນແຂວງ ປະຈໍາເມືອງຍອດອູ, ແຂວງຜົ້ງສາລີ ດຳເນີນກອງປະຊຸມຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ທີ່ເມືອງຍອດອູ, ແຂວງຜົ້ງສາລີ ໃນຕອນເຊົ້າ ວັນທີ 30 ກັນຍາ 2022 ທີ່ສະໂມສອນເມືອງຍອດອູ, ແຂວງຜົ້ງສາລີ ໂດຍການເປັນປະທານ ຂອງທ່ານ ທອງສີ ເສົາສຸລິພົມ ປະທານສະພາປະຊາຊົນແຂວງ; ມີຄະນະສະມາຊິກສະພາປະຊາຊົນແຂວງ ປະຈໍາເມືອງຍອດອູ, ມີ ທ່ານ ສົມຫວັງ ສຸມວິໄລ ເລຂາພັກເມືອງ, ເຈົ້າເມືອງ-ເມືອງຍອດອູ, ຄະນະປະຈຳພັກເມືອງ, ກຳມະການພັກເມືອງ, ຄະນະພັກ, ກອງບັນຊາການປກຊ-ປກສ, ຫົວໜ້າ-ຮອງຫົວໜ້າຫ້ອງການ, ພະນັກງານ-ລັດຖະກອນ, ແພດໝໍ, ຄູ-ອາຈານ ອ້ອມຂ້າງເມືອງ, ພະນັກງານບໍານານ, ອົງການປົກຄອງບ້ານ, ເຖົ້າແກ່ແນວໂຮມ ແລະ  ອົງການຈັດຕັ້ງຂັ້ນບ້ານ 5 ບ້ານພາຍໃນເທດສະບານເມືອງ.

ກອງປະຊຸມຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໃນຄັ້ງນີ້ ຮັບຟັງ ທ່ານ ບຸນພານິດ ແກ້ວຮຸ່ງ ສະມາຊິກສະພາປະຊາຊົນແຂວງ ປະຈໍາເມືອງຍອດອູ; ເຜີຍແຜ່ ມະ​ຕິ​ ສະບັບເລກທີ 40/ສພຂ, ວັນທີ 23 ສິງຫາ 2022;  ມະ​ຕິ​ສະບັບເລກທີ 41/ສພຂ, ວັນທີ 23 ສິງຫາ 2022; ມະ​ຕິສະບັບເລກທີ 48/ສພຂ, ວັນທີ 25 ສິງຫາ 2022; ມະ​ຕິ ສະບັບເລກທີ 49/ສພຂ, ວັນທີ 25 ສິງຫາ 2022. ເຊິ່ງທ່ານໄດ້ຍົກໃຫ້ເຫັນເຖິງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີຢູ່ແຂວງຜົ້ງສາລີ ແລະ ບາງມາດຕະການການຈັດຕັ້ງປະຕິບັດ ເຊັ່ນ: ເອົາໃຈໃສ່ຊຸກຍຸ້ການພັດທະນາເສດຖະກິດ ໃຫ້ມີການຂະຫຍາຍຕົວໃນລະດັບ 5,93% ພ້ອມທັງຊຸກຍຸ້ສົ່ງເສີມການຜະລິດພາຍໃນ ເພື່ອຕອບສະໜອງໃຫ້ແກ່ສັງຄົມ ແລະ ທົດແທນການນໍາເຂົ້າ;

ຮັບຟັງທ່ານ ທອງສີ ອີນຈັກ ສະມາຊິກສະພາປະຊາຊົນແຂວງ ປະຈໍາເມືອງຍອດອູ ເຜີຍແຜ່ ມະ​ຕິ​ ສະບັບເລກທີ 42/ສພຂ, ວັນທີ 25 ສິງຫາ 2022; ມະ​ຕິ​ ສະບັບເລກທີ 43/ສພຂ, ວັນທີ 25 ສິງຫາ 2022; ມະ​ຕິ​ ສະບັບເລກທີ 44 /ສພຂ, ວັນທີ 25 ສິງຫາ 2022; ມະ​ຕິ​ ສະບັບເລກທີ 45/ສພຂ, ວັນທີ 25 ສິງຫາ 2022; ມະ​ຕິ ສະບັບເລກທີ 47/ສພຂ, ວັນທີ 25 ສິງຫາ 2022; ຮັບຟັງທ່ານ ນາງ ສີວັນ ລາວເຊິງ ສະມາຊິກສະພາປະຊາຊົນແຂວງ ປະຈໍາເມືອງຍອດອູ ເຜີຍແຜ່ມະ​ຕິສະບັບເລກທີ 50/ສພຂ, ວັນທີ 25 ສິງຫາ 2022; ຮັບຟັງ ທ່ານ ທອງສີ ເສົາສຸລິພົມ ເຜີຍແຜ່ ມະຕິຂອງສະພາແຫ່ງ ຊຸດທີ IX ປະກອບມີ 21 ມະຕິ, ປະກອບມີວຽກງານບຸກຄະລາກອນ, ວຽກງານຂອງລັດຖະບານ, ວຽກງານຂົງເຂດສະພາແຫ່ງຊາດ ແລະ ວຽກຂອງການສ້າງ ແລະ ປັບປຸງກົດໝາຍ. ພ້ອມກັນນັ້ນ, ທ່ານຍັງໄດ້ສັງລວມຄືນຜົນຂອງການຜັນຂະຫຍາຍ ແລະ ໂຄສະນາໃນຄັ້ງນີ້ ພ້ອມທັງຮຽກຮອງໃຫ້ທຸກພາກສ່ວນເອົາໃຈໃສ່ປະກອບສ່ວນເຂົ້າໃນການຕັ້ງປະຕິບັດບັນດາມະຕິດັ່ງກ່າວກໍຄືການປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍຂອງແຂວງ. ແນໃສ່ສ້າງໃຫ້ແຂວງຜົ້ງສາລີມີສະຖຽນລະພາບທາງການເມືອງ, ເສດຖະກິດສືບຕໍ່ຂະຫຍາຍຕົວຕໍ່ເນື່ອງ, ສັງຄົມມີຄວາມສາມັກຄີເປັນປຶກແຜ່ນ ພ້ອມທັງຮັບປະກັນໃຫ້ການສ້າງລັດທີ່ປົກຄອງດ້ວຍກົດໝາຍມີປະສິດທິພາບ ແລະ ນັບມື້ມີຄວາມເຂັ້ມຂຶ້ນເທື່ອລະກ້າວ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ