ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 19 ພຶດສະພາ 2022 ນີ້ ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມຄົບຄະນະ ກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ປະຈໍາປີ 2021 ຂຶ້ນ ໂດຍການເປັນປະທານຂອງ ທ່ານ ນາງ ຂັນທອງ ພັນທະຈັກ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ໃຫ້ກຽດເຂົ້າຮ່ວມ ຂອງທ່ານ ໃສຄໍາ ທອງລັດ ກໍາມະການພັກແຂວງ ຮອງປະທານສະພາປະຊາຊົນແຂວງ ມີ ບັນດາທ່ານ ສະມາຊິກສະພາປະຊາຊົນແຂວງ ທີສັງກັດເປັນກໍາມະການ ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ກອງປະຊຸມໄດ້ ພິຈາລະນາຮັບຮອງເອົາ ບົດສະຫຼຸບການເຄື່ອນໄຫວ ປະຈໍາປີ 2021 ແລະ ທິດທາງແຜນການປີ 2022 ຂອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ເຊີ່ງໄດ້ຍົກໃຫ້ເຫັນບາງວຽກງານທີ່ພົ້ນເດັ່ນ ໄດ້ເອົາໃຈໃສ່ຫຼາຍວຽກງານສຳຄັນ ເຮັດໃຫ້ໄດ້ຮັບການຈັດຕັ້ງປະຕິບັດ ແລະ ໄດ້ຮັບຜົນສຳເລັດຕາມຄາດໝາຍທີ່ວາງໄວ້ ເປັນຕົ້ນແມ່ນວຽກງານສຶກສາອົບຮົມການເມືອງ-ແນວຄິດ,   ວຽກງານການຈັດຕັ້ງ ແລະ ບຸກຄະລາກອນ, ໄດ້ຄົ້ນຄວ້າປະກອບຄຳເຫັນໃສ່ຮ່າງກົດໝາຍ 16 ສະບັບ ແລະ ຮ່າງນິຕິກໍາໃຕ້ກົດໝາຍ ຂອງຄະນະປະຈໍາສະພາແຫ່ງຊາດ 4 ສະບັບ, ຄົ້ນຄວ້າປະກອບຄຳຄິດ-ຄຳເຫັນໃສ່ນິຕິກຳໃຕ້ກົດໝາຍຂອງອົງການປົກຄອງແຂວງ 3 ສະບັບ,  ຄົ້ນຄວ້າແຜນການສ້າງ ແລະ ປັບປຸງນິຕິກຳຂອງແຂວງ ໄລຍະ 5 ປີ (2021-2025) 22 ສະບັບ,  ຊຸກຍູ້ພາກສ່ວນກ່ຽວຂ້ອງໃນການສ້າງ ແລະ ປັບປຸງນິຕິກຳໃຕ້ກົດໝາຍໃນຂົງເຂດວັດທະນະທຳ-ສັງຄົມ ແລະ ບັນດາເຜົ່າ ທີ່ຈະນໍາເຂົ້າຄົ້ນຄວ້າພິຈາລະນາຮັບຮອງໃນກອງປະຊຸມສະໄໝສາມັນ ຂອງສະພາປະຊາຊົນແຂວງ ຊຸດທີ II ລວມມີ 6 ສະບັບ. ຕິດຕາມກວດກາ ແກ້ໄຂຄຳສະເໜີຂອງປະຊາຊົນຢ່າງເປັນປົກກະຕິ.

ກອງປະຊຸມ ຍັງໄດ້ຮັບຟັງການລາຍງານກ່ຽວກັບທິດທາງແຜນການເຄື່ອນໄຫວ 5 ປີ ຂອງຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ຮັບຟັງການລາຍງານການຈັດຕັ້ງປະຕິບັດບັນດາຄາດໝາຍວຽກງານສາທາລະນະສຸກ, ແຮງງານສະຫວັດດີການສັງຄົມ ໄລຍະ 1 ປີຜ່ານມາ, ວຽກງານຄຸ້ມຄອງຊົນເຜົ່າ, ສາສະໜາ, ຮັບຟັງການລາຍງານກ່ຽວກັບການຈັດຕັ້ງປະຕິບັດດໍາລັດ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ, ການຈັດຕັ້ງປະຕິບັດໂຄງການພັດທະນາເພື່ອແກ້ໄຂຄວາມທຸກຍາກ ແລະ ວຽກງານອື່ນໆ.

ພ້ອມນີ້, ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຈາກ ທ່ານ ໃສຄໍາ ທອງລັດ ກໍາມະການພັກແຂວງ ຮອງປະທານສະພາປະຊາຊົນແຂວງ ໂດຍທ່ານໄດ້ເນັ້ນໜັກໃຫ້ ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ເພີ່ມທະວີການສຶກສາອົບຮົມການເມືອງແນວຄິດຂອງພະນັກງານ ທັງຕິດຕາມກວດກາການປະຕິບັດໜ້າທີ່ ຂອງພະນັກງານ-ລັດຖະກອນ ທີ່ຢູ່ ໃນຄວາມຮັບຜິດຊອບຂອງກໍາມະການ ຢ່າງມີຈຸດສຸມ ເພື່ອສ້າງທັດສະນະການເມືອງ, ທັດສະນະຮັບໃຊ້ ປະຊາຊົນໃຫ້ມີຈັນຍາບັນ, ຈັນຍາທໍາ, ມີຄວາມໜັກແໜ້ນ, ປອດໃສ; ເອົາໃຈໃສ່ບໍາລຸງສ້າງ, ຍົກລະດັບວິຊາສະເພາະ ເຮັດໃຫ້ເຂົ້າເຈົ້າມີຄວາມຊໍານານງານ, ໜັກແໜ້ນ, ເຂັ້ມແຂງ ເພື່ອເຮັດຫຼ້ອນໜ້າທີ່ ທີ່ໄດ້ຮັບການມອບໝາຍຢ່າງມີປະສິດທິພາບ, ສືບຕໍ່ປັບປຸງແບບແຜນວິທີເຮັດວຽກ, ປັບປຸງບັນດານິຕິກໍາທີ່ເປັນເຄື່ອງມືຮັບໃຊ້ໃຫ້ແກ່ການຈັດຕັ້ງປະຕິບັດວຽກງານ, ສືບຕໍ່ປະສານສົມທົບກັບຂະແໜງການທີ່່ກ່ຽວຂ້ອງໃນການປະຕິບັດສິດ ແລະ ໜ້າທີຕິດຕາມກວດກາການປະຕິບັດລັດຖະທຳມະນູນ ແລະ ກົດໝາຍ ກ່ຽວກັບການເຄື່ອນໄຫວຂອງພາກສ່ວນກ່ຽວຂ້ອງ ຕິດຕາມກວດກາການປະຕິບັດມະຕິຂອງສະພາແຫ່ງຊາດ, ມະຕິຂອງສະພາປະຊາຊົນແຂວງ ໃຫ້ເປັນປົກກະຕິ ພ້ອມທັງປະຕິບັດສິດ ແລະ ໜ້າທີຕາມກົດໝາຍກຳນົດ ເພື່ອແນໃສ່ເຮັດໃຫ້ການເຄື່ອນໄຫວວຽກງານຂອງຄະນະກໍາມະການ ຈະໄດ້ຮັບການປັບປຸງໃຫ້ມີຄຸນນະພາບນັບມື້ນັບສູງຂຶ້ນ ດ້ວຍບາດກ້າວອັນໜັກແໜ້ນ ແລະ ຍາດໄດ້ຜົນງານໃໝ່ໃຫ່ຍຫລວງກວ່າເກົ່າ.

ຂ່າວ ແລະ ພາບ ໂສລະຢ໋າ ໄຊຍະວົງ