ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

        ສພຊ) ໃນວັນທີ 14 ມັງກອນ 2022 ທີ່ສະພາແຫ່ງຊາດ ກອງປະຊຸມຄົບຄະນະກໍາມາທິການປ້ອງກັນຊາດປ້ອງກັນຄວາມສະຫງົບ (ກປຊສ) ປະຈໍາປີ 2021 ໄດ້ໄຂຂຶ້ນພາຍໃຕ້ການເປັນປະທານຂອງທ່ານ ພົຕ. ວົງສັກພັນທະວົງ ປະທານ ກປຊສ ໂດຍການເຂົ້າຮ່ວມຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ຜູ້ຊີ້ນໍາວຽກງານ ກປຊສ, ມີບັນດາທ່ານສະມາຊິກສະພາແຫ່ງຊາດ ທີ່ເປັນຄະນະກໍາມະການຂອງ ກປຊສ ປະຈໍາຢູ່ແຕ່ລະເຂດເລືອກຕັ້ງ, ຕາງໜ້າຈາກບັນດາກໍາມາທິການ, ຄະນະເລຂາທິການ, ຮອງລັດຖະມົນຕີກະຊວງປ້ອງກັນປະເທດ, ຮອງລັດຖະມົນຕີກະຊວງປ້ອງກັນຄວາມສະຫງົບ, ສະຖາບັນຕ່າງໆພາຍໃນສະພາແຫ່ງຊາດແລະ ແຂກຖືກເຊີນເຂົ້າຮ່ວມ.

        ​ກອງປະຊຸມ, ໄດ້ພ້ອມກັນຕີລາຄາ ແລະ ຄົ້ນຄວ້າປະກອບຄໍາຄິດຄໍາເຫັນໃສ່ບົດສະຫລຸບຕີລາຄາການເຄື່ອນ ໄຫວວຽກງານປະຈໍາປີ 2021 ແລະທິດທາງແຜນການເຄື່ອນໄຫວວຽກງານປະຈໍາປີ 2022 ຂອງ ກປຊສ; ແຜນການກໍານົດຫົວຂໍ້ຕິດຕາມກວດກາໃນຂົງເຂດປ້ອງກັນຊາດ-ປ້ອງກັນຄວາມສະຫງົບ, ນັກຮົບເກົ່າ ປະຈໍາປີ 2022, ບົດລາຍງານສະພາບພົ້ນເດັ່ນຕິດພັນກັບການເຄື່ອນໄຫວປົກປັກຮັກສາສະຖຽນລະພາບທາງດ້ານການເມືອງ, ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ ໃນປີ 2021 ຜ່ານມາ ຂອງກະຊວງປ້ອງກັນປະເທດ ແລະ ບົດລາຍງານສະພາບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຂອງກະຊວງປ້ອງກັນຄວາມສະຫງົບ; ຈາກນັ້ນ, ກອງປະຊຸມໄດ້ຮັບຮອງເອົາບົດສະຫລຸບການເຄື່ອນໄຫວວຽກງານປະຈໍາປີ 2021; ແຜນການເຄື່ອນໄຫວວຽກງານປະຈໍາປີ 2022 ຂອງ ກປຊສ; ຮັບຮອງເອົາ 5 ແຜນວຽກຈຸດສຸມ ປີ 2022 ດັ່ງນີ້: ດ້ານນິຕິບັນຍັດ, ດ້ານການຕົກລົງບັນຫາສໍາຄັນພື້ນຖານຂອງຊາດ, ດ້ານການສ້າງຄວາມເຂັ້ມ ແຂງໃຫ້ແກ່ກໍາມາທິການ ແລະ ດ້ານການພົວພັນຮ່ວມມືກັບຕ່າງປະເທດ; ຮັບຮອງເອົາບົດລາຍງານຂອງກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ແລະ ຮັບຮອງເອົາມາດຕະການໃນການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2022 ຂອງ ກປຊສ.

          ​ໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ແລະ ຮຽກຮ້ອງໃຫ້ຄະນະນໍາກໍາມາທິການ, ກໍາມະການຂອງກໍາມາທິການທີ່ປະຈໍາຢູ່ແຕ່ລະເຂດເລືອກຕັ້ງໃນທົ່ວປະເທດ ຈົ່ງສືບຕໍ່ຍົກສູງຄວາມຮັ ຜິດຊອບໃນການເປັນເສນາທິການໃນຂົງເຂດປ້ອງກັນຊາດປ້ອງກັນຄວາມສະຫງົບ ໃຫ້ແກ່ຄະນະປະຈໍາສະພາແຫ່ງຊາດ, ສະພາປະຊາຊົນຂັ້ນແຂວງ ຕາມພາລະບົດບາດ, ສິດ ແລະ ໜ້າທີ່ ທີ່ກໍານົດໄວ້ໃນກົດໝາຍ ໂດຍໃຫ້ເອົາໃຈໃສ່ປັບປຸງກົນໄກປະສານງານກັບທຸກພາກສ່ວນທີ່ກ່ຽວຂ້ອງ ໂດຍສະເພາະກັບກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ສະຫະພັນນັກຮົບເກົ່ແຫ່ງຊາດ, ກອງບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບແຂວງ, ສະຫະພັນນັກຮົບເກົ່າແຂວງແລະ ພາກສ່ວນທີ່ກ່ຽວຂ້ອງຂັ້ນສູນ ແລະ ທ້ອງຖິ່ນ ເພື່ອໃຫ້ມີຄວາມຄ່ອງຕົວ, ວ່ອງໄວ ແລະ ມີຄຸນນະພາບ ແນໃສ່ເຮັດສໍາເລັດໜ້າທີ່ໄດ້ຮັບມອບໝາຍດ້ວຍປະສິດທິຜົນສູງ.

(ພາບ ແລະ ຂ່າວ: ສອນສັກ ວັນວິໄຊ)