ເພື່ອເປັນການປຶກສາຫາລືການເຄື່ອນໄຫວວຽກງານປະຈໍາປີ 2023ຂອງະນະກໍາມະການຍຸຕິທໍາ ແລະ ປກຊ-ປກສ, ສະນັ້ນມາ, ໃນວັນທີ 18 ທັນວາ 2023 ຢູ່ທີ່ຫ້ອງປະຊຸມສະພາປະຊາຊົນແຂວງຊຽງຂວາງໄດ້ເປີດກອງປະຊຸມຄົບຄະນະຂອງຄະນະກໍາມະການຍຸຕິທໍາ ແລະ ປກຊ-ປກສ ປະຈໍາປີ 2023 ໂດຍການເປັນປະທານຂອງທ່ານ ເກົ້າມົວ ຊົວໂກ້ ຄະນະປະຈໍາ ປະທານຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງທ່ານວຽງໄຊ ສີວິໄຊ ຮອງປະທານສະພາປະຊາຊົນແຂວງ ຜູ້ຊີ້ນໍາວຽກງານຍຸຕິທໍາ ແລະ ປກຊ-ປກສ, ຕ່າງໜ້າຈາກຄະນະກໍາມະການເສດຖະກິດ, ແຜນການ ແລະ ການເງິນ ແລະ ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ມີບັນດາທ່ານສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 7 ເມືອງ ທີ່ສັງກັດໃນຄະນະກໍາມະການຍຸຕິທໍາ ແລະ ປກຊ-ປກສ, ບັນດາທ່ານຫົວໜ້າ-ຮອງຫົວໜ້າພະແນກການ, ກົມກອງ ທີ່ຢູ່ໃນຂົງເຂດຍຸຕິທໍາ ແລະ ປກຊ-ປກສ ແລະ ພະນັກງານສະພາປະຊາຊົນແຂວງທີ່ສັງກັດໃນຄະນະກໍາມະການຍຸຕິທໍາ ແລະ ປກຊ-ປກສ ເຂົ້າຮ່ວມ.

ໃນວາລະດໍາເນີນກອງປະຊຸມ ທ່ານ ແສງເດືອນ ຈັນທະລັງສີ ຮອງປະທານຄະນະກໍາມະການຍຸຕິທໍາ ແລະ ປກຊ-ປກສ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການປີ 2024 ຂອງຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ ເຊິ່ງໃນໄລະຍະ 1 ປີຜ່ານມາຄະນະກໍາມະການຍຸຕິທໍາ ແລະ ປກຊ-ປກສ ໄດ້ເອົາໃຈໃສ່ສຶກສາອົບຮົມດ້ານການເມືອງແນວຄິດໃຫ້ພະນັກງານຢູ່ພາຍໃນຄະນະກໍາມະການ, ໄດ້ປະຕິບັດຕາມ 3 ພາລະບົດບາດຂອງຕົນ ໂດຍສະເພາະແມ່ນໄດ້ເຂົ້າຮ່ວມທາບທາມປະກອບຄໍາເຫັນໃສ່ບັນດາຮ່າງກົດ ໝາຍ ແລະ ປັບປຸງກົດໝາຍທີ່ສະພາແຫ່ງຊາດສົ່ງໃຫ້, ປະເມີນການຈັດຕັ້ງປະຕິບັດກົດໝາຍ, ປະກອບຄໍາເຫັນໃສ່ແຜນພັດທະນາເສດຖະກິດຂອງແຂວງ, ລົງຕິດຕາມກວດກາ, ຊຸກຍູ້ວຽກງານປ້ອງກັນຊາດ-ປ້ອງກັນຄວາມສະຫງົບ, ລົງຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ມະຕິກອງປະຊຸມຂອງສະພາປະຊາຊົນແຂວງຢູ່ບັນເມືອງ, ໄດ້ຮັບຄໍາຮ້ອງຂໍຄວາມເປັນທໍາຂອງປະຊາຊົນ, ຕ້ອນຮັບ ແລະ ໃຫ້ຄໍາປຶກສາທາງດ້ານກົດໝາຍໃຫ້ແກ່ປະຊາຊົນແຂວງຢ່າງເປັນປົກກະຕິ ແລະ ທິດທາງແຜນການໃນຕໍ່ໜ້າຄະນະກໍາມະການຍຸຕິທໍາ ແລະ ປກຊ-ປກສຈະສຸມໃສ່ຍົກສູງສະຕິການເມືອງ, ເອົາໃຈໃສ່ໃນການປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ການເປັນເສນາທິການໃຫ້ໃສະພາແຫ່ງຊາດ ແລະ ສະພາປະຊາຊົນແຂວງ, ສືບຕໍ່ຄົ້ນຄວ້າ, ພິຈາລະນາ, ແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນບັນດາເຜົ່າ ໃຫ້ວ່ອງໄວ, ທັນຕາມກໍງານົດເວລາ ທີ່ກົດໝາຍກໍານົດໄວ້ໃຫ້ໂປ່ງໃສ ແລະ ຍຸຕິທໍາ. ໃນທີ່ປະຊຸມບັນດາຜູ້ແທນກອງປະຊຸມໄດ້ປະກອບຄໍາຄິດ, ຄໍາເຫັນໃສ່ຮ່າງບົດສະຫຼຸບຢ່າງກົງໄປກົງມາ ເພື່ອເຮັດໃຫ້ມີຄວາມຄົບຖ້ວນ, ສົມບູນຂຶ້ນຕື່ມອີກ.

ໃນຕອນທ້າຍ ທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ ຜູ້ຊີ້ນໍາວຽກງານຍຸຕິທໍາ ແລະ ປກຊ-ປກສ ໄດ້ມີຄໍາໂອ້ລົມຕໍ່ກອງປະຊຸມ ເຊິ່ງທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ຄະນະກໍາມະການສາມາດຈັດຕັ້ງປະຕິບັດໄດ້ໃນໄລຍະຜ່ານ ແລະ ທ່ານຍັງໃຫ້ສືບຕໍ່ປັບປຸງເນື້ອໃນບົດສະຫຼຸບຄືນ, ປັບປຸງການຄົ້ນຄວ້າຂໍຄວາມເປັນທໍ າຂອງປະຊາຊົນແຂວງໃຫ້ມີຄວາມສອດຄ່ອງຕື່ມ, ເອົາໃຈໃສ່ປະຕິບັດໜ້າທີ່ວຽກງານຂອງຕົນຕາມພາລະບົດບາດ, ສິດ ແລະ ໜ້າທີ່, ສືບຕໍ່ປະສານສົມທົບກັບຄະນະເລຂາທິການ, ຄະນະກໍາມະການ ແລະ ອົງການປົກຄອງແຂວງໃຫ້ມີຄວາມກົມກຽວກັນຕື່ມອີກ ເພື່ອສະດວກໃນການຈັດຕັ້ງປະຕິບັດໜ້າທີ່ຂອງຕົນໃຫ້ດີຂຶ້ນກວ່າເກົ່າ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ