ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ກອງປະຊຸມຄົບ​ຄະ​ນະກຳ​ມະ​ການ​ວັດທະນະທຳ-ສັງຄົມ ແລະ ບັນດາເຜົ່າ (ຄວສຜ) ເທື່ອທີ 01 ຂອງສະພາປະຊາຊົນ ນະ​ຄອນ​ຫຼວງວຽງ​ຈັນ ຊຸ​ດ​ທີ II (ສປນວ) ໄດ້ດໍາເນີນ​ຂຶ້ນໃນວັນທີ 06 ມິຖຸນາ 2022 ທີ່ຫ້ອງປະຊຸມສຳນັກງານອົງການປົກຄອງ ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ລຳພອຍ ສີອັກຄະຈັນ ຮອງປະທານສະພາປະຊາຊົນ ນະຄອນຫຼວງ ຜູ້ຊີ້ນຳວຽກງານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າແລະ ທ່ານ ນາງ ເກດມະນີ ບັນດາສັກ ກຳມະການຄະນະປະຈຳ, ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນ ນະຄອນຫຼວງ, ມີບັນດາທ່ານກຳມະການສັງກັດຄະນະກຳມະການ, ຮອງປະທານຄະນະກຳມະການ, ​ຄະນະເລຂາທິການ, ບັນດາທ່ານຫົວໜ້າຄະນະສະມາຊິກ ສະພາປະຊາຊົນ ປະຈຳເຂດເລືອກຕັ້ງເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ ດຳເນີນຂຶ້ນເພື່ອເປັນການກະກຽມບັນດາເນື້ອໃນທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 03 ຂອງສະພາປະຊາຊົນ ນະຄອນຫຼວງວຽງຈັນ ໃຫ້ມີເນື້ອໃນຄົບຖ້ວນ ແລະ ເພື່ອເປັນການຍົກສູງຄຸນະພາບ ແລະ ຄວາມເປັນເອກະພາບ ໃນການພິຈາລະນາຕົກລົງບັນຫາສຳຄັນຂອງ ນວ ໃນການຕິດຕາມກວດກາການຈັດຕັ້ງປະຕິບັດຄາດໝາຍສູ້ຊົນ ແຜນພັດທະນາເສດຖະກິດ-ສັງຄົມ, ແຜນງົບປະມານ ປີ 2022 ຂອງພະແນກການກ່ຽວຂ້ອງ.

ກອງປະຊຸມ ໄດ້ຮັບຟັງການເຜີຍແຜ່ມະຕິຂອງຄະນະປະຈຳ ສະພາປະຊາຊົນ ນະຄອນຫຼວງ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ແລະ ມະຕິຂອງຄະນະປະຈຳ ສະພາປະຊາຊົນ ນະຄອນຫຼວງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະມາຊິກ ສະພາປະຊາຊົນ ປະຈຳເຂດເລືອກຕັ້ງເມືອງ. ພ້ອມດຽວກັນນີ້, ກອງປະຊຸມກໍໄດ້ຮັບຟັງການລາຍງານຈາກທ່ານ ຮອງປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ກ່ຽວກັບການເຄື່ອນໄຫວວຽກງານແຕ່ກອງປະຊຸມຄັ້ງປະຖົມມະລືກ ຫາປັດຈຸບັນ ແລະ ທິດທາງແຜນການ 06 ເດືອນທ້າຍປີ 2022 ເຊິ່ງທ່ານໄດ້ໃຫ້ຮູ້ວ່າ: ໄລຍະຜ່ານມາ, ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ໄດ້ຕິດຕາມຊຸກຍູ້ພະແນກສຶກສາທິການ ແລະ ກີລາ ນະຄອນຫຼວງ ໃນການສ້າງນິຕິກຳກ່ຽວກັບກອງທຶນພັດທະນາກິລາ-ກາຍຍະກຳ; ເຂົ້າຮ່ວມຄົ້ນຄວ້າ ແລະ ປະກອບຄຳເຫັນໃສ່ຮ່າງນິຕິກຳຂອງນະຄອນຫຼວງ ເຊິ່ງໄດ້ຖືກຮັບຮອງເອົາໃນກອງປະຊຸມຄັ້ງປະຖົມມະລືກ ຂອງສະພາປະຊາຊົນ ນະຄອນຫຼວງ ຊຸດທີ II ແລະ ກອງປະຊຸມຄະນະປະຈໍາ ສະພາປະຊາຊົນ ນະຄອນຫຼວງ ຈໍານວນ 04 ສະບັບ; ຄົ້ນຄວ້າປະກອບຄຳເຫັນໃສ່ຮ່າງນິຕິກຳທີ່ຈະປັບປຸງ ແລະ ນິຕິກຳສ້າງໃໝ່ ພາຍໃນສະພາປະຊາຊົນ ນະຄອນຫຼວງ ແລະ ນິຕິກຳອື່ນໆ ອີກຈຳນວນໜຶ່ງ. ນອກຈາກນີ້, ກໍໄດ້ເຂົ້າຮ່ວມຄົ້ນຄວ້າປະກອບຄຳເຫັນ ໃສ່ຮ່າງກົດ ໝາຍ ແລະ ໄດ້ຖືກຮັບຮອງເອົາໃນກອງປະຊຸມສະໄໝວິສາມັນ ເທື່ອທີ 1 ແລະ ກອງປະຊຸມສະໄໝສາມັນ ເທື່ອທີ 2 ຈຳນວນ 11 ສະບັບ; ປະກອບຄຳເຫັນໃສ່ຮ່າງກົດໝາຍທີ່ຈະປັບປຸງ ແລະ ສ້າງໃໝ່ ເພື່ອພິຈາລະນາໃນກອງປະຊຸມສະ   ໄໝສາມັນ ເທື່ອທີ 3 ຂອງສະພາແຫ່ງຊາດ ຈຳນວນ 09 ສະບັບ.

ໄລຍະຜ່ານມາ, ໄດ້ລົງຕິດຕາມກວດກາຊຸກຍູ້ການສອບເສັງຈົບຊັ້ນ ປໍ 5, ມໍ 4 ແລະ ມໍ 7 ຢູ່ບັນດາເມືອງ ໃນນະຄອນຫຼວງ; ຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດວຽກງານປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19; ຊຸກຍູ້ການຈັດຕັ້ງປະຕິບັດບັນດາຄາດໝາຍສູ້ຊົນໃນຂົງເຂດທີ່ຕົນຮັບຜິດຊອບ; ສຸມໃສ່ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນປີ 2022 ເພື່ອຊອກໃຫ້ເຫັນບັນຫາ, ຂໍ້ສະເໜີ ທີ່ຈະນຳໄປປັບປຸງ ແລະ ແກ້ໄຂໃນຕໍ່ໜ້າ. ພ້ອມດຽວກັນນີ້, ກໍໄດ້ລົງຕິດຕາມຊຸກຍູ້ວຽກງານຂົງເຂດບັນດາເຜົ່າ ໃນນະຄອນຫຼວງ ແລະ ໄດ້ລົງຢ້ຽມຢາມສະຖານທີ່ຕົວຈິງເຊັ່ນ: ວັດຕາດຊອຍວອຍ, ສະຖານທີ່ທ່ອງທ່ຽວຕ່າງໆ, ລົງຢ້ຽມຢາມກຸ່ມຕົວແບບການກະເສດກະສິກຳ ແລະ ໂຄງການລົງທຶນພັດທະນາທີ່ມີຜົນກະທົບຕໍ່ປະຊາຊົນບັນດາເຜົ່າ. ຜ່ານການລົງຕິດຕາມຕົວຈິງ ເຫັນວ່າການສ້າງວັດວາອາຮາມບາງບ່ອນ ແມ່ນບໍ່ໄປຕາມຂັ້ນຕອນ, ລະບຽບການ ແລະ ຮູບຊົງວັດທະນະທຳລາວ; ການຄຸ້ມຄອງວຽກງານສາສະໜາ ຍັງບໍ່ທັນໄດ້ດີເທົ່າທີ່ຄວນ; ການແກ້ໄຂຂໍ້ຂັດແຍ່ງຕ່າງໆຂອງຜູ້ອອກແຮງງານຍັງຊັກຊ້າ ແລະ ການຄຸ້ມຄອງກອງທຶນກຸ່ມທ້ອນເງິນຂອງແມ່ຍິງຢູ່ບາງບ້ານ ເຄື່ອນໄຫວບໍ່ຖືກຕ້ອງຕາມລະບຽບກອງທຶນວາງອອກ. ຫຼັງຈາກນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ກໍໄດ້ຄົ້ນຄວ້າປະກອບຄຳຄິດຄຳເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນ ເພື່ອຊອກຫາວິທີແກ້ໄຂຮ່ວມກັນໃນຕໍ່ໜ້າ.

ໃນຕອນທ້າຍ, ທ່ານ ນາງ ລຳພອຍ ສີອັກຄະຈັນ ຮອງປະທານສະພາປະຊາຊົນ ນະຄອນຫຼວງ, ຜູ້ຊີ້ນຳວຽກງານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສປນວ ສາມາດຍາດມາໄດ້ໃນໄລຍະຜ່ານມາ ແລະ ກໍໄດ້ມີຄຳເຫັນໂອ້ລົມໂດຍເນັ້ນໃຫ້ຄະນະກຳມະການ ສືບຕໍ່ເອົາ​ໃຈ​ໃສ່​ຈັດ​ຕັ້ງ​ປະ​ຕິ​ບັດ​ບັນ​ດາ​ຄາດ​ໝາຍ ແລະ ທິດ​ທາງແຜນ​ການ​ໃນ​ຕໍ່​ໜ້າ ​ທີ່​ກຳ​ນົດ​ໄວ້ ໃຫ້​ບັນ​ລຸ​ຄາດ​ໝາຍ ແລະ ສຳເລັດຜົນ ຕາມແຜນການທີ່ວາງໄວ້ ຢ່າງມີປະສິດທິພາບ ແລະ ປະສິດທິຜົນ.

 (ນາງ ພອນທິບ ອິນທິລາດ)