(ສພຊ) ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ກະຊວງອຸດສາຫະກໍາ ແລະ ການຄ້າ ສະໄໝທີ V ໄດ້ໄຂຂຶ້ນຢ່າງເປັນທາງການ ໃນຕອນບ່າຍຂອງວັນທີ 25 ກໍລະກົດ 2023 ທີ່ຫ້ອງປະຊຸມໃຫຍ່ຂອງກະຊວງອຸດສາຫະກໍາ ແລະ ການຄ້າ ໂດຍການເຂົ້າຮ່ວມຂອງສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແລະສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງອຸດສາຫະກໍາ ແລະ ການຄ້າ; ມີບັນດາສະຫາຍຮອງເລຂາຄະນະພັກ, ຄະນະປະຈໍາພັກ, ກໍາມະການພັກກະຊວງ, ຄະນະບໍລິຫານງານພັກກະຊວງ, ຄະນະໜ່ວຍພັກຫ້ອງການ, ກົມ, ສະຖາບັນ ແລະ ບັນດາໜ່ວຍພັກລັດວິສາຫະກິດ, 3 ອົງການຈັດຕັ້ງມະຫາຊົນ ພ້ອມດ້ວຍແຂກຖືກເຊີນເຂົ້າຮ່ວມທັງໝົດ 100 ກວ່າສະຫາຍ.

ໃນໂອກາດນີ້, ສະຫາຍ ມະໄລທອງ ກົມມະສິດ ໄດ້ກ່າວເປີດກອງປະຊຸມຄົບຄະນະບໍລິຫານງານພັກກະຊວງ ກາງສະໄໝທີ V ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ, ທົ່ວປວງຊົນລາວທັງຊາດ ພາຍໃຕ້ການນຳພາ-ຊີ້ນຳ ຂອງພັກ ກຳລັງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ຢ່າງຕັ້ງໜ້າ. ໃນນີ້, ກໍໄດ້ຍົກໃຫ້ເຫັນເຖິງ ຜົນງານພົ້ນເດັ່ນໃນທົ່ວຂະແໜງການອຸດສາຫະກໍາ ແລະ ການຄ້າ ທີ່ໄດ້ຂຸ້ນຂ້ຽວຈັດຕັ້ງປະຕິບັດມະຕິກອງປະຊຸມໃຫຍ່ຄະນະບໍລິຫານງານພັກ ຄັ້ງທີ V ຂອງອົງຄະນະພັກ ກະຊວງອຸດສາຫະກໍາ ແລະ ການຄ້າ, ແຜນພັດທະນາອຸດສາຫະກໍາປຸງແຕ່ງ ແລະ ຫັດຖະກໍາ 5 ປີ (2021-2025) ໂດຍຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ, ດ້ວຍຄວາມຕັ້ງໜ້າບຸກບືນ ແລະ ຄວາມສາມັກຄີເປັນປຶກແຜ່ນແໜ້ນໜາ ເຊິ່ງສາມາດບັນລຸໄດ້ຜົນສຳເລັດໃນຫຼາຍດ້ານ ໂດຍສະເພາະດ້ານນິຕິກໍາເຊັ່ນ: ກົດໝາຍວ່າດ້ວຍວິສາຫະກິດ, ດ້ານການສົ່ງເສີມຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ດ້ານການຄຸ້ມຄອງການເໜັງຕີງຂອງລາຄາສິນຄ້າ, ການແກ້ໄຂສະພາບຂາດແຄນນ້ຳມັນ ແລະ ອື່ນໆ.

ໂອກາດດັ່ງກ່າວ, ສະຫາຍ ປອ. ໄຊສົມພອນ ພົມວິຫານ ກໍໄດ້ມີຄໍາເຫັນໂອ້ລົມຕໍ່ກອງປະຊຸມເຊິ່ງກ່ອນອື່ນ ສະຫາຍໄດ້ຍົກໃຫ້ເຫັນຄວາມເປັນຫ່ວງເປັນໃຍ ແລະ ຄວາມເອົາໃຈໃສ່ຂອງກົມການເມືອງສູນກາງພັກ ຕໍ່ການພັດທະນາຂະແໜງອຸດສາຫະກໍາ ແລະ ການຄ້າ ຂອງປະເທດເຮົາ ເພື່ອນໍາໃຊ້ທ່າແຮງອຸດສາຫະກໍາ 4.0 ໃນການຫັນເປັນອຸດສາຫະກໍາ ແລະ ທັນສະໄໝ ຂອງປະເທດ ຕາມທິດສີຂຽວ ແລະ ຍືນຍົງ. ພ້ອມກັນນັ້ນ, ສະຫາຍໄດ້ຊີ້ນໍາຢ່າງເລິກເຊິ່ງເຖິງຖອງໃຫ້ເອົາໃຈໃສ່ວຽກງານສຶກສາອົບຮົມດ້ານການເມືອງ-ແນວຄິດໃຫ້ແກ່ສະມາຊິກພັກ-ພະນັກງານ ໃຫ້ມີຄວາມຮັບຮູ້ຢ່າງກວ້າງ ຂວາງ, ປັບປຸງ ແລະ ກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຕາມທິດສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການນຳພາຂອງພັກ; ກໍ່ສ້າງພະນັກງານ ໃຫ້ມີລະດັບຄວາມຮູ້ທາງດ້ານທິດສະດີການ ເມືອງ ມີຄວາມຮູ້ທາງດ້ານວິຊາສະເພາະຢ່າງໜັກແໜ້ນ; ບັນຈຸສັບຊ້ອນພະນັກງານ ໃຫ້ຖືກຕ້ອງເໝາະສົມຕາມມາດຖານຕຳແໜ່ງງານທີ່ກຳນົດໄວ້; ປັບປຸງນິຕິກຳເກົ່າທີ່ບໍ່ສອດຄ່ອງ ແລະ ສ້າງນິຕິກໍາໃໝ່ໃຫ້ພຽງພໍ ແລະ ແທດເໝາະກັບການຂະຫຍາຍຕົວຂອງເສດຖະກິດ ແລະ ສັງຄົມ.

ໃນວາລະກອງປະຊຸມ ຍັງໄດ້ດໍາເນີນການປ່ອນບັດທາບທາມຄວາມເຊື່ອໝັ້ນໄວ້ວາງໃຈຕໍ່ການນໍາພາ ແລະ ການປະກອບຄຳຄິດເຫັນທີ່ຈິງໃຈ, ກົງໄປກົງມາ ແລະ ນຳໃຊ້ສິດປະຊາທິປະໄຕຢ່າງເຕັມສ່ວນ ຕໍ່ການນຳພາລວມ ແລະ ບຸກຄົນ ເພື່ອປັບປຸງແກ້ໄຂການຊີ້ນຳ-ນຳພາວຽກງານຂະແໜງອຸດສາຫະກໍາ ແລະ ການຄ້າ ໃຫ້ກ້າວໜ້າ ແລະ ຍາດໄດ້ຜົນງານທີ່ພົ້ນເດັ່ນ ແລະ ບັນລຸຜົນສຳເລັດຕາມຄາດໝາຍທີ່ວາງໄວ້.

ກອງປະຊຸມເປີດກວ້າງ ຄົບຄະນະກາງສະໄໝຂອງຄະນະບໍລິຫານງານພັກ ແລະ ກອງປະຊຸມພາຍໃນຄະນະບໍລິຫານງານພັກກະຊວງອຸດສາຫະກຳ ແລະ ການຄ້າ ຈະໄດ້ດໍາເນີນໄປຈົນເຖິງວັນທີ 27 ກໍລະກົດ ຈຶ່ງຈະສໍາເລັດ.