ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ກອງປະຊຸມຄະນະຮັບຜິດຊອບປັບປຸງກົດໝາຍວ່າດ້ວຍ ການແກ້ໄຂຄຳຮ້ອງທຸກ ໄດ້ຈັດຂຶ້ນໃນຕອນເຊົ້າວັນທີ 17 ກຸມພາ 2021 ທີ່ສະພາແຫ່ງຊາດ ນະຄອນຫລວງວຽງຈັນ, ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ສະພາແຫ່ງຊາດ, ເຂົ້າຮ່ວມມີຮອງປະທານກຳມາທິການຍຸຕິທຳ, ຮອງປະທານກຳມາທິການ ປກຊ-ປກສ, ຮອງປະທານສະຫະພັນກຳມະບານລາວ, ຮອງປະທານສະຫະພັນແມ່ຍິງລາວ ແລະ ຕາງໜ້າຈາກພາກສ່ວນທີ່ກ່ຽວຂ້ອງ.

ຈຸດປະສົງຂອງການຈັດກອງປະຊຸມໃນຄັ້ງນີ້ ແມ່ນເພື່ອລາຍງານຜົນການຈັດຕັ້ງການທາບທາມການປັບປຸງກົດໝາຍ ແລະ ຄົ້ນຄວ້າປຶກສາຫາລື ເພື່ອຄວາມເປັນເອກະພາບກັນ ຕໍ່ການປັບປຸງເນື້ອໃນຂອງກົດໝາຍວ່າດ້ວຍ ການແກ້ໄຂຄຳຮ້ອງທຸກ ໂດຍສະເພາະເນື້ອໃນທີ່ພົວພັນກັບບັນດາອົງການທີ່ຮັບຜິດຊອບໃນການພິຈາລະນາ ແລະ ແກ້ໄຂຄໍາຮ້ອງທຸກທາງດ້ານກົນໄກ ແລະ ຂັ້ນຕອນໃນການຮັບ ແລະ ພິຈາລະນາ ຄໍາສະເໜີ, ຄໍາຮ້ອງຟ້ອງ ແລະ ຄໍາຮ້ອງຂໍຄວາມເປັນທຳເພື່ອຮັບປະກັນໃຫ້ການຈັດຕັ້ງປະຕິບັດ ມີຄວາມສອດຄ່ອງ, ວ່ອງໄວ ແລະ ຖືກຕ້ອງ ຕາມພາລະບົດບາດ, ສິດ ແລະ ໜ້າທີ່ ທີ່ໄດ້ກໍານົດໄວ້ໃນກົດໝາຍ ແລະ ລັດຖະທຳມະນູນ.

ໃນກອງປະຊຸມທ່ານ ຄຳແພງ ວິລະພັນ ໄດ້ລາຍງານສະພາບການເຄື່ອນໄຫວການຈັດຕັ້ງທາບທາມປັບປຸງກົດ  ໝາຍໃນໄລຍະຜ່ານມາ ເຊິ່ງມີເນື້ອໃນບາງຕອນວ່າ: ພາຍຫລັງກອງປະຊຸມຄະນະປະຈໍາສະພາແຫ່ງຊາດ ປະຈຳເດືອນ ສິງຫາ 2021 ໄດ້ໃຫ້ທິດຊີ້ນຳໃນການຄົ້ນຄວ້າ ແລະ ຈັດຕັ້ງການທາບທາມການປັບປຸງກົດໝາຍ, ກອງເລຂາຊ່ວຍວຽກຄະນະຮັບຜິດຊອບ ໄດ້ດຳເນີນຈັດກອງປະຊຸມທາບທາມປະກອບຄໍາເຫັນຂຶ້ນ ຈຳນວນ 3 ຄັ້ງຄື: ຄັ້ງທີ I ທີ່ແຂວງວຽງຈັນ ໃນຄັ້ງວັນທີ 17-18 ກັນຍາ 2021, ຄັ້ງທີ 2 ທີ່ແຂວງບໍລິຄຳໄຊ ໃນຄັ້ງວັນທີ 17-18 ທັນວາ 2021 ແລະ ຄັ້ງທີ 3 ທີ່ນະຄອນຫລວງວຽງຈັນ (ໃນຮູບແບບອອນລາຍທາງໄກທົ່ວປະເທດ) ໃນຄັ້ງວັນທີ 6 ມັງກອນ 2022 ໂດຍມີຜູ້ເຂົ້າຮ່ວມທັງໝົດຈໍານວນ 254 ທ່ານ, ຍິງ 48 ທ່ານ. ພ້ອມກັນນັ້ນ, ຍັງໄດ້ຈັດກອງປະຊຸມຮ່ວມເຮັດວຽກສະເພາະກັບອົງການກວດກາແຫ່ງລັດ, ສໍານັກງານປະທານປະເທດ ແລະ ສຳນັກງານນາຍົກລັດຖະມົນຕີ ໂດຍສົມທົບກັບ ກຳມາທິການກົດ ໝາຍຄົ້ນຄວ້າປຶກສາຫາລືເອກະພາບກັນໃນການປັບປຸງເນື້ອໃນ ພາກທີ III ໝວດທີ I ການພິຈາລະນາ ແລະ ແກ້ໄຂຄໍາສະເໜີ ໃຫ້ມີຄວາມສອດຄ່ອງກັບການປັບປຸງກົດໝາຍວ່າດ້ວຍ ການກວດກາລັດ ແລະ ພາລະບົດບາດຂອງອົງການທີ່ພິຈາລະນາ ແລະ ແກ້ໄຂຄໍາສະເໜີ ໃນຄັ້ງວັນທີ 10 ກຸມພາ 2022.

ຈາກນັ້ນ, ປະທານກອງປະຊຸມໄດ້ຕັ້ງປະເດັນເຈາະຈີ້ມ ເພື່ອຄົ້ນຄວ້າ ແລະ ແລກປ່ຽນ, ສະເໜີເນື້ອໃນການຄົ້ນຄວ້າ ປັບປຸງກົດໝາຍ; ພ້ອມນັ້ນ, ບັນດາຜູ້ເຂົ້າຮ່ວມກໍໄດ້ຜັດປ່ຽນກັນແລກປ່ຽນ, ປະກອບຄຳຄິດຄຳເຫັນ ເພື່ອເຮັດໃຫ້ການປັບປຸງກົດໝາຍສະບັບດັ່ງກ່າວ ມີເນື້ອໃນຄົບຖ້ວນ ສົມບູນ ແລະ ສອດຄ່ອງຕາມຈຸດປະສົງ ແລະ ລະດັບໝາຍທີ່ວາງໄວ້.

(ພາບ ແລະ ຂ່າວ: ກົງທະນູຄຳ ພິພັດເສລີ)