ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


(ສພຊ) ວັນທີ 2 ກຸມພາ 2022 ນີ້, ຢູ່ທີ່ຫ້ອງປະຊຸມຊັ້ນສອງສະໂມສອນຂອງແຂວງ ສາລະວັນ ໄດ້ຈັດກອງປະຊຸມ ຄະນະປະຈໍາສະພາປະຊາຊົນແຂວງ (ສພຂ) ສາລະວັນ ເປີດກວ້າງ ປະຈໍາເດືອນ ມັງກອນ 2022 ແລະ ວາງທິດທາງສືບຕໍ່ ເດືອນ ກຸມພາ 2022, ເປັນປະທານກອງປະຊຸມໂດຍ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະປະຈໍາ ສພຂ ສາລະວັນ, ມີບັນດາທ່ານຄະນະປະຈໍາ, ປະທານ-ຮອງປະທານຄະນະກໍາມະການ ແລະ ຄະນະເລຂາທິການ, ພ້ອມດ້ວຍຕາງໜ້າຈາກພະແນກການອ້ອມຂ້າງແຂວງ ເຂົ້າຮ່ວມໃນຄັ້ງນີ້.

ທ່ານ ສົມພອນ ແສງສຸລິຈັນ ເລຂາທິການ ສພຂ ສາລະວັນ ໄດ້ຜ່ານຮ່າງບົດສະຫຼຸບການເຄື່ອນໄຫວວຽກງານ ປະຈໍາເດືອນ ມັງກອນ 2022 ແລະ ທິດທາງແຜນການປະຈໍາເດືອນ ກຸມພາ 2022 ເຊິ່ງໄລຍະຜ່ານມາຄະນະປະຈໍາ ສພຂ ສາລະວັນ ໄດ້ເອົາໃຈໃສ່ຊີ້ນໍາ-ນໍາພາການເຄື່ອນໄຫວປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດຊອບສູງ, ໂດຍລວມກໍ່ໄດ້ມີຜົນສໍາເລັດຫຼາຍດ້ານ ເປັນຕົ້ນ: ດ້ານນິຕິກຳໃຕ້ກົດໝາຍ ໄດ້ສໍາເລັດການເປີດກອງປະຊຸມທາບທາມປັບປຸງຮ່າງນິຕິກໍາໃຕ້ກົດໝາຍ “ຂໍ້ຕົກລົງວ່າດ້ວຍ ການຕ້ານ, ສະກັດກັ້ນ ແລະ ແກ້ໄຂຢາເສບຕິດຢູ່ແຂວງສາລະວັນ” ໂດຍການປະສານສົມທົບ ແລະ ຊຸກຍູ້ອົງການພາກສ່ວນທີ່ກ່ຽວຂ້ອງ ໃນການຄົ້ນຄວ້າຮ່າງນິຕິກໍາໃຕ້ກົດໝາຍດັ່ງກ່າວ ທີ່ຮັບຮອງໃນກອງປະຊຸມສະໄໝສາມັນເທື່ອທີ 2 ຂອງ ສພຂ ສາລະວັນ ຊຸດທີ II ເພື່ອສາມາດປະກາດໃຊ້ທົ່ວແຂວງ; ດ້ານການຕົກລົງບັນຫາສໍາຄັນພື້ນຖານຂອງແຂວງ ໄດ້ພິຈາລະນາ ຕົກລົງບັນຫາພື້ນຖານຂອງແຂວງຕາມການສະເໜີຂອງອົງການປົກຄອງແຂວງ ຜ່ານກອງປະຊຸມຂອງຄະນະປະຈໍາ ສພຂ; ດ້ານການຕິດຕາມ-ກວດກາ ໄດ້ເຄື່ອນໄຫວຕິດຕາມ-ກວດກາ ສະພາບບັນຫາຂອງໂຄງການເຊົ່າສໍາປະທານທີ່ດິນ ປູກກ້ວຍ ທີ່ບ້ານຫາງພູນ້ອຍ ເມືອງສາລະວັນ; ໄດ້ເປີດກອງປະຊຸມປຶກສາຫາລື ກ່ຽວກັບຄຳຮ້ອງຂໍຄວາມເປັນທຳ ຈໍານວນ 3 ເລື່ອງ ແລະ ຄຳສະເໜີຂອງປະຊາຊົນ ຈໍານວນ 5 ເລື່ອງ; ໄດ້ເຄື່ອນໄຫວໂຄສະນາເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ແລະ ສພຂ ສາລະວັນ ຊຸດທີ II, ໄດ້ເຄື່ອນໄຫວຮ່ວມກັບສະພາການຄ້າ ແລະ ອຸດສາຫະກຳ ມອບເຄື່ອງຊ່ວຍເຫຼືອທີ່ລະດົມຈາກບໍລິສັດ, ອົງການຈັດຕັ້ງສັງຄົມເປັນຕົ້ນ: ອຸປະກອນການແພດ, ເຄື່ອງປ້ອງກັນພະຍາດໂຄວິດ-19, ອຸປະກອນການຮຽນ, ເຄື່ອງນຸ່ງຮົ່ມ, ເຂົ້າສານໜຽວ ແລະ ເຄື່ອງອຸປະໂພກ-ບໍລິໂພກຈໍານວນໜຶ່ງ ລວມມູນຄ່າທັງໝົດ 91 ລ້ານກວ່າກີບ), ເຊິ່ງໃນນັ້ນ ມີການປະກອບສ່ວນຈາກ ສພຂ ມູນຄ່າ 1 ກວ່າລ້ານກີບ ມອບໃຫ້ 3 ເມືອງພູດອຍຄື: ເມືອງສະໝ້ວຍ, ເມືອງຕະໂອ້ຍ, ເມືອງຕຸ້ມລານ; ສໍາລັບວຽກງານທິດທາງແຜນການຕໍ່ໜ້າ ແມ່ນຈະສືບຕໍ່ປະສານສົມທົບ ແລະ ຊຸກຍູ້ອົງການພາກສ່ວນທີ່ກ່ຽວຂ້ອງ ແລະ ຄະນະກໍາມະການ ສພຂ ໃນການຄົ້ນຄວ້າຮ່າງນິຕິກໍາໃຕ້ກົດໝາຍ ຂໍ້ຕົກລົງ ຂອງທ່ານເຈົ້າແຂວງ ທີ່ຮັບຮອງໃນກອງປະຊຸມສະໄໝສາມັນ ເທື່ອທີ 2 ຂອງ ສພຂ ສາລະວັນ ເພື່ອໃຫ້ສາມາດປະກາດໃຊ້ທົ່ວແຂວງ, ສືບຕໍ່ພິຈາລະນາ ຕົກລົງບັນຫາສໍາຄັນຂອງແຂວງ ຕາມການສະເໜີຂອງອົງການປົກຄອງແຂວງ ຜ່ານກອງປະຊຸມຂອງຄະນະປະຈໍາ ສພຂ ສາລະວັນ, ກະກຽມລົງເຄື່ອນໄຫວຕິດຕາມກວດກາ ບັນດາຫາງສຽງສັງຄົມ, ປະກົດການຫຍໍ້ທໍ້ຕ່າງໆ ທີ່ພົ້ນເດັ່ນ ຕາມການສະເໜີຂອງປະຊາຊົນ ຢູ່ບັນດາເມືອງ; ສືບຕໍ່ເອົາໃຈໃສ່ຕ້ອນຮັບປະຊາຊົນ ແລະ ປະສານສົບທົບ ກັບພາກສ່ວນທີ່ກ່ຽວຂ້ອງ ໃນການແກ້ໄຂບັນຫາຄໍາຮ້ອງທຸກຂອງປະຊາຊົນ ໃຫ້ວ່ອງໄວ ພ້ອມທັງສອດຄ່ອງກັບລະບຽບ-ກົດໝາຍ.
ພ້ອມນັ້ນ, ກອງປະຊຸມຍັງໄດ້ນໍາບັນຫາທີ່ພົ້ນເດັ່ນ ເຂົ້າມາປຶກສາຄົ້ນຄວ້າໃນກອງປະຊຸມ ໂດຍສະເພາະ ສະພາບການຈັດຕັ້ງປະຕິບັດສອງວາລະແຫ່ງຊາດ ວ່າດ້ວຍ: ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ບັນຫາຢາເສບຕິດ, ການຈັດຕັ້ງປະຕິບັດຕ້ານສະກັດກັ້ນການແຜ່ລະບາດຂອງພະຍາດໂຄວິດ-19, ສະພາບການຄຸ້ມຄອງການຈັດຕັ້ງປະຕິບັດໂຄງການສໍາປະທານປູກກ້ວຍຢູ່ບ້ານຫາງພູນ້ອຍ, ບັນຫາຂໍ້ຂັດແຍ່ງລະຫວ່າງປະຊາຊົນ, ສະພາບການຄຸ້ມຄອງການນໍາໃຊ້ປ່າຜະລິດທີ່ໄດ້ມີການບຸກລຸກ ແລະ ບັນຫາອື່ນໆທີ່ສໍາຄັນ, ທັງນີ້ເພື່ອພ້ອມກັນຄົ້ນຄວ້າຊອກຫາທາງແກ້ໄຂຮ່ວມກັນຕາມຄວາມຮັບຜິດຊອບຂອງແຕ່ລະພາກສ່ວນ ໃຫ້ມີມາດຕະການ, ມີການຕິດຕາມ-ກວດກາ, ທັນສະພາບການ ແລະ ແກ້ໄຂໃຫ້ສຳເລັດ.

ດີລຳພົນ ພົມມະຈັນ