ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

      (ສພຊ) ໃນລະຫວ່າງວັນທີ 21-23 ກຸມພາ 2022 ທີ່ຫ້ອງປະຊຸມຄະນະປະຈຳສະພາແຫ່ງຊາດ ໄດ້ມີກອງປະຊຸມຄະນະປະຈຳສະພາແຫ່ງຊາດ ປະຈຳເດືອນກຸມພາ 2022 (ໃນຮູບແບບອອນລາຍ) ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານຄະນະປະຈຳສະພາແຫ່ງຊາດ ເຂົ້າຮ່ວມມີບັນດາຮອງປະທານຄະນະປະຈຳສະພາແຫ່ງຊາດ, ກຳມະການຄະນະປະຈຳສະພາແຫ່ງຊາດ, ຕາງໜ້າຈາກບັນດາກະຊວງ, ອົງການ ແລະ ແຂກຖືກເຊີນ.

ກອງປະຊຸມ ໄດ້ຮັບຟັງການລາຍງານຮ່າງແຜນການກະກຽມ ແລະດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີIX; ລາຍງານຜົນສໍາເລັດການດໍາເນີນກອງປະຊຸມຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະພາປະຊາຊົນແຂວງ ຈາກໍາມາທິການວຽກງານສະມາຊິກສະພາແຫ່ງຊາດ; ລາຍງານວຽກງານຂອງກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ກໍາມາທິການການຕ່າງປະເທດ; ກໍາມາທິການວັດທະນທໍາສັງຄົມ; ກໍາມາທິການບັນດາເຜົ່າ; ກໍາມາທິການແຜນການ, ການເງິນ ແລະ ການກວດສອບ; ບົດລາຍງານຂອງກຳມາທິການຍຸຕິທຳ ກ່ຽວກັບການສະເໜີແຕ່ງຕັ້ງ ຜູ້ພິພາກສາຊັ້ນສີ່ຂອງສານປະຊາຊົນ ຕາມການສະ ເໜີຂອງສານປະຊາຊົນສູງສຸ. ຈາກນັ້ນ, ບັນດາທ່ານຄະນະປະຈຳໄດ້ສຸມໃສ່ປະກອບຄໍາເຫັນຢ່າງມີຈຸດສຸມເຂົ້າສູ່ບັນຫາ ຄົ້ນຄວ້າໃສ່ບັນດາບົດລາຍງານຕ່າງໆ ທີ່ນໍາມາລາຍງານໃນກອງປະຊຸມໃນຄັ້ງນີ້ ເພື່ອຮັບປະກັນການຕົກລົງບັນຫາຢ່າງມີຄວາມເປັນເອກະພາບ, ສາມາດເປັນບ່ອນອີງໃນການຈັດຕັ້ງປະຕິບັດ ແລະ ນໍາຜົນປະໂຫຍດລວມມາສູ່ປະເທດຊາດ ແລະ ປະຊາຊົນບັນດາເຜົ່າຢ່າງແທ້ຈິງ.

ທັງນີ, ກໍເພື່ອຮັບປະກັນໃຫ້ການພິຈາລະນາ ແລະ ຕົກລົງບັນຫາສໍາຄັນພື້ນຖານຂອງປະເທດຊາດ ໃຫ້ມີປະສິດທິພາບ, ປະສິດທິຜົນ ແລະ ເພື່ອກໍານົດຫົວຂໍ້ເນື້ອໃນແບ່ງງານໃຫ້ພາກສ່ວນຕ່າງໆ ໃນການຮັບໃຊ້ ແລະ ສ້າງສິ່ງອໍານວຍຄວາມສະດວກຮອບດ້ານໃຫ້ແກ່ການກະກຽມ ແລະ ດໍາເນີນກອງປະຊຸມຄະນະປະຈໍາສະພາແຫ່ງຊາດ ຮັບປະກັນຄຸນນະພາບ ແລະ ທັນເວລາ.


(ພາບ ແລະ ຂ່າວ: ສອນສັກ ວັນວິໄຊ)