(ສພຊ) ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນພະຈິກ 2023 ໄດ້ດໍາເນີນໃນລະຫວ່າງວັນທີ 27-28 ພະຈິກ 2023 ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈຳສະພາແຫ່ງຊາດ, ມີບັນດາທ່ານຮອງປະທານຄະນະປະຈຳສະພາແຫ່ງຊາດ, ບັນດາທ່ານກຳມະການຄະນະປະຈຳສະພາແຫ່ງຊາດ ແລະ ພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.
ກອງປະຊຸມຄະນະປະຈຳສະພາແຫ່ງຊາດ ໄດ້ຮັບຟັງການລາຍງານ ຜົນສຳເລັດການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX; ຜົນສຳເລັດການດໍາເນີນກອງປະຊຸມ ປະຈຳປີ 2023 ຂອງຄະນະເລຂາທິການສະພາແຫ່ງຊາດ ຮ່ວມກັບອົງການຈັດຕັ້ງພາຍໃນສະພາແຫ່ງຊາດ ແລະ ຄະນະເລຂາທິການສະພາປະຊາຊົນຂັ້ນແຂວງ; ບົດລາຍງານ ຄວາມຄືບໜ້າໃນການກະກຽມເປັນເຈົ້າພາບ ຈັດກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດ (CLV) ຄັ້ງທີ 1; ການກະກຽມຂະບວນການຂີ່ລົດຖີບສາມັກຄີ ໃນໄລຍະກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ຄັ້ງທີ 1; ຜົນການປຶກສາຫາລືຮ່ວມກັບບັນດາກະຊວງ ແລະ ອົງການ ກ່ຽວກັບແຜນການສ້າງ ແລະ ປັບປຸງກົດໝາຍ ປະຈຳປີ 2024 ຂອງຄະນະປະຈໍາສະພາແຫ່ງຊາດ; ແຜນການເຄື່ອນໄຫວການປະເມີນຜົນ ການຕິດຕາມກວດກາໂຄງການໄຟຟ້າພະລັງງານນ້ຳ ທີ່ສົ່ງຜົນກະທົບຕໍ່ສິ່ງແວດລ້ອມສັງຄົມ ແລະ ທຳມະຊາດ, ການຊົດເຊີຍຜົນກະທົບຕໍ່ສິ່ງແວດລ້ອມສັງຄົມ ແລະ ທຳມະຊາດ ແລະ ມາດຕະຖານການກໍ່ສ້າງ; ແຜນການລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກກໍ່ສ້າງຮາກຖານການເມືອງ, ວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ, ວຽກງານຊົນເຜົ່າ ແລະ ສາສະໜາ ຕິດພັນກັບການປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍຂົງເຂດ ປ້ອງກັນຊາດ-ປ້ອງກັນຄວາມສະຫງົບ ແລະ ບັນດາເຜົ່າ ຢູ່ເຂດເລືອກຕັ້ງທີ 3 ແຂວງຫຼວງນໍ້າທາ ແລະ ເຂດເລືອກຕັ້ງທີ 5 ແຂວງບໍ່ແກ້ວ ຂອງທ່ານຮອງປະ ທານຄະນະປະຈຳສະພາແຫ່ງຊາດ; ຜົນການຄົ້ນຄວ້າ ໜັງສືສະເໜີຂອງລັດຖະບານ ກ່ຽວກັບການສະເໜີຫັນ ປ່ຽນ ທີ່ດິນປ່າໄມ້ທໍາມະຊາດ ເປັນດິນອຸດສາຫະກໍາ ລັກສະນະຊົ່ວຄາວ ໃນເຂດທີ່ດິນປ່າສະຫງວນພູອິນຖິ່ນ ເພື່ອນຳໃຊ້ເຂົ້າໃນ ໂຄງການຂຸດຄົ້ນຖ່ານຫີນ ຢູ່ເຂດບ້ານບໍ່ຈ່ານ, ເມືອງຫີນເຫີບ ແລະ ບ້ານດອນ, ບ້ານທ່າ ເມືອງເຟືອງ, ແຂວງວຽງຈັນ ຂອງບໍລິສັດ ບໍ່ແຮ່ສຳພັນ ຈຳກັດ; ຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການສະເໜີຂໍຫັນປ່ຽນທີ່ດິນປ່າໄມ້ທຳມະຊາດ ໄປເປັນທີ່ດິນອຸດສາຫະກຳລັກສະນະຊົ່ວຄາວ ເພື່ອນຳໃຊ້ເຂົ້າໃນໂຄງການຂຸດຄົ້ນ ແລະ ປຸງແຕ່ງແຮ່ເຫຼັກ ຢູ່ເຂດບ້ານທົ່ງໄກ່ໂອກ ເມືອງຊານໄຊ ແຂວງອັດຕະປື ຂອງບໍລິສັດວັງຕັດສຳຫຼວດແຮ່ທາດ ຈຳກັດ ແລະ ພິຈາລະນາຄຳຮ້ອງຂໍຄວາມເປັນທໍາຈຳນວນໜຶ່ງ. ພ້ອມທັງຮັບຟັງລາຍງານ ຄວາມຄືບໜ້າການຈັດສັນງົບປະມານໂຄງການລົງທຶນຂອງລັດ ປະຈຳປີ 2024; ຜົນການປັບປຸງບັນດາຮ່າງມະຕິ ໃນຂົງເຂດຄວາມຮັບຜິດຊອບຂອງກຳມາທິການແຜນການ, ການເງິນ ແລະ ການກວດສອບ.