(ສພຊ) ປະຕິບັດຕາມກົດໝາຍວ່າດ້ວຍສະພາແຫ່ງຊາດ ມາດຕາ 67 ກ່ຽວກັບກອງປະຊຸມຄະນະປະຈໍາສະພາແຫ່ງຊາດ, ໃນລະຫວ່າງວັນທີ 9-11 ພະຈິກ 2022 ຄະນະປະຈໍາສະພາແຫ່ງຊາດ ໄດ້ດໍາເນີນກອງປະຊຸມສະໄໝສາມັນປະຈໍາເດືອນ ພະຈິກ 2022 ຂອງຕົນຂຶ້ນຢູ່ທີ່ຫ້ອງປະຊຸມຄະນະປະຈໍາສະພາແຫ່ງຊາດ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ, ເຂົ້າຮ່ວມກອງປະຊຸມດັ່ງກ່າວ ມີບັນດາທ່ານ ຮອງປະທານຄະນະປະຈໍາສະພາແຫ່ງຊາດ, ກຳມະການຄະນະປະຈໍາສະພາແຫ່ງຊາດ ແລະ ແຂກທີ່ຖືກເຊີນຈາກພາສ່ວນທີ່ກ່ຽວຂ້ອງ.
ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນພະຈິກ 2022 ໄດ້ຮັບຟັງການລາຍງານ, ການກວດກາ ແລະ ໃຫ້ທິດຊີ້ນໍາຕໍ່ບັນດາເນື້ອໃນທີ່ຈະນໍາເຂົ້າພິຈາລະນາ ຢູ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ເປັນຕົ້ນ ບົດລາຍງານການກະກຽມຄວາມພ້ອມຮອບດ້ານ ໃຫ້ແກ່ການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX; ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາ ປີ 2022 ແລະ ແຜນການປະຈໍາປີ 2023 ຂອງສະພາແຫ່ງຊາດ; ບົດລາຍງານຜົນການກວດກາເນື້ອໃນຮອບດ້ານຂອງຮ່າງກົດ ໝາຍຈໍານວນ 4 ສະບັບ ຄື ຮ່າງກົດໝາຍວ່າດ້ວຍຫໍພິພິດຕະພັນ, ຮ່າງກົດໝາຍວ່າດ້ວຍການທາງນໍ້າ, ຮ່າງກົດໝາຍວ່າດ້ວຍທະບຽນສານ ແລະ ຮ່າງກົດໝາຍວ່າດ້ວຍວິສາຫະກິດ; ບົດລາຍງານຜົນການທາບທາມຮ່າງກົດໝາຍ ຈໍານວນ 12 ສະບັບ ທີ່ຈະນໍາເຂົ້າພິຈາລະນາຢູ່ ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX; ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ປະຈໍາປີ 2022 ແລະ ທິດທາງແຜນການ ປະຈໍາປີ 2023; ບົດລາຍງານຄວາມຂືບໜ້າຂອງການຈັດຕັ້ງປະຕິບັດ ວາລະແຫ່ງຊາດວ່າດ້ວຍການແກ້ໄຂຄວາມຫຍຸຸ້ງຍາກທາງດ້ານເສດຖະກິດ-ການເງິນ, ວາລະແຫ່ງຊາດວ່າດ້ວຍການແກ້ໄຂບັນ ຫາຢາເສບຕິດ; ຮ່າງບົດລາຍງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ກ່ຽວກັບການຈັດ ຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງ ແຜນການ ປີ 2023; ບົດລາຍງານຂອງສານປະຊາຊົນສູງສຸດ ກ່ຽວກັບການປະເມີນຜົນການຈັດຕັ້ງປະຕິບັດ ກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍການດໍາເນີນຄະດີແພ່ງ; ບົດລາຍງານຂອງອົງການໄອຍະການປະຊາຊົນ ກ່ຽວກັບການປະເມີນຜົນການຈັດຕັ້ງປະຕິ ບັດ ກົດໝາຍວ່າດ້ວຍອົງການໄອຍະການປະຊາຊົນ ແລະ ກົດໝາຍວ່າດ້ວຍການດໍາເນີນຄະດີອາຍາ. ພ້ອມກັນນັ້ນ, ກອງປະຊຸມຄະນະປະຈໍາສະພາແຫ່ງຊາດ ຍັງໄດ້ຮັບຟັງບົດລາຍງານຜົນຂອງການຕິດຕາມກວດກາໃນຫົວຂໍ້ຕ່າງໆ ເປັນຕົ້ນ ບົດລາຍງານຜົນການຕິດຕາມກວດກາວຽກງານ ຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ສະຫະພັນນັກຮົບເກົ່າ ທີ່ຕິດພັນກັບການຈັດຕັ້ງປະຕິບັດ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ; ບົດລາຍງານຜົນກະທົບຕໍ່ສິ່ງແວດລ້ອມທໍາມະຊາດ ແລະ ສົງຄົມ ຈາກໂຄງການກໍ່ສ້າງນໍ້າອູ 3 ແລະ ນໍ້າອູ 4; ບົດລາຍງານການອອກໃບຕາດິນ; ບົດລາຍງານການຈັດຕັ້ງປະຕິບັດນະໂຍບາຍ ແລະ ນິຕິກຳ ກ່ຽວກັບການຊຸກຍູ້ສົ່ງເສີມປັດໄຈການຜະລິດ ເປັນຕົ້ນ ການຜະລິດອາຫານສັດ, ຝຸ່ນ ເພື່ອຕອບສະໜອງຄວາມຕ້ອງການພາຍໃນ ທົດແທນການນຳເຂົ້າ; ບົດລາຍງານການສ້າງວິຊາຊີບ, ພັດທະນາສີມືແຮງງານ ແລະ ການສ້າງ ວຽກເຮັດງານທຳຂອງປະຊາຊົນ ເພື່ອແກ້ໄຂບັນຫາກຈານວ່າງງານ; ບົດລາຍງານການເຂົ້າຮຽນໃນສາຍອາຊີວະສຶກສາ ແລະ ການສຶກສາຊັ້ນສູງ ສົກຮຽນ 2022-2023 ແລະ ບົດລາຍງານຜົນການກວດກາຂອງກໍາມາທິການແຜນການ, ການເງິນ ແລະ ການກວດສອບ 6 ເດືອນທ້າຍປີ 2022 ແລະ ຫົວຂໍ້ອື່ນຈໍານວນໜຶ່ງ. ສໍາລັບວຽກງານການຕ່າງປະເທດ, ກອງປະຊຸມຄະນະປະຈໍາສະພາແຫ່ງຊາດ ໄດ້ຮັບຟັງການລາຍງານກ່ຽວກັບ ຜົນສໍາເລັດການເຂົ້າຮ່ວມກອງປະຊຸມລັດຖະສະພາອາຊີປາຊີຟິກ (APPF) ຄັ້ງທີ 30 ແລະ ການເຄື່ອນໄຫວຢ້ຽມຢາມຢ່າງເປັນທາງການຂອງ ຄະນະຜູ້ແທນຂັ້ນສູງຂອງສະພາແຫ່ງຊາດ ເຊິ່ງນໍາພາໂດຍທ່ານ ປະທານສະພາແຫ່ງຊາດ ແຫ່ງ ສປປ ລາວ ຢູ່ຣາຊະອານາຈັກໄທ; ບົດລາຍງານການກະກຽມຄວາມພ້ອມໃຫ້ແກ່ ຄະນະຜູ້ແທນຂັ້ນສູງສະພາແຫ່ງຊາດ ແຫ່ງ ສປປລາວ ເຊິ່ງນໍາພາໂດຍທ່ານ ປະທານສະພາແຫ່ງຊາດ ໃນການເຂົ້າຮ່ວມກອງປະຊຸມລັດຖະສະພາລະຫວ່າງຊາດອາຊຽນ (AIPA) ຄັ້ງທີ 43 ແລະ ການເຄື່ອນໄຫວຢ້ຽມຢາມທາງການຢູ່ ຣາຊະອານາຈັກກໍາປູເຈຍ.
(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)