(ສພຊ) ປະຕິບັດຕາມກົດໝາຍວ່າດ້ວຍສະພາແຫ່ງຊາດ ແລະ ມະຕິວ່າດ້ວຍການເຄື່ອນໄຫວຂອງ ຄະນະປະຈໍາສະພາແຫ່ງຊາດ, ໃນລະຫວ່າງວັນທີ 26-28 ກັນຍາ 2022 ຄະນະປະຈໍາສະພາແຫ່ງຊາດ ໄດ້ດໍາເນີນກອງປະຊຸມປະຈໍາເດືອນ ກັນຍາ 2022 ຂອງຕົນ ຊຶ່ງຈັດຂຶ້ນຢູ່ຫ້ອງປະຊຸມຄະນະປະຈໍາສະພາແຫ່ງຊາດ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ. ພ້ອມກັນນັ້ນ ມີບັນດາທ່ານ ຮອງປະທານຄະນະປະຈໍາສະພາແຫ່ງຊາດ, ກຳມະການຄະນະປະຈໍາສະພາແຫ່ງຊາດ ແລະ ແຂກຖືກເຊີນຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.
ກອງປະຊຸມຄະນະປະຈໍາສະພາແຫ່ງຊາດ ໄດ້ພິຈາລະນາຕົກລົງບັນຫາສໍາຄັນພື້ນຖານຂອງປະເທດຊາດ ຕາມກົດໝາຍ ແລະ ການສະເໜີຂອງພາກສ່ວນແກ່ຂ້ອງ ເປັນຕົ້ນ ບົດລາຍງານແຜນການດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງ ຊາດ ຊຸດທີ IX; ບົດລາຍງານກ່ຽວກັບຫົວຂໍ້ທີ່ຈະນໍາເຂົ້າພິຈາລະນາຢູ່ ກອງປະຊຸມຮ່ວມ ລະຫວ່າງ ຄະນະປະຈໍາສະພາແຫ່ງຊາດ ແລະ ຄະນະລັດຖະບານ; ບົດລາຍງານຜົນສໍາເລັດການດໍາເນີນກອງປະຊຸມສະ ໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II; ບົດລາຍງານແຜນການສ້າງ ແລະ ປັບປຸງກົດໝາຍ ແຕ່ປີ 2023 ຫາ 2025; ບົດລາຍງານຜົນການກວດກາເນື້ອໃນຮອບດ້ານຂອງ ຮ່າງກົດໝາຍວ່າດ້ວຍການກວດກາລັດ ແລະ ຮ່າງກົດໝາຍວ່າດ້ວຍການກວດສອບແຫ່ງລັດ; ບົດລາຍງານແຜນການທາບທາມຮ່າງກົດໝາຍ ຈໍານວນ 12 ສະບັບ ທີ່ຈະນໍາເຂົ້າພິຈາລະນາຮັບຮອງຢູ່ ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍຫັນປ່ຽນທີ່ດິນປ່າໄມ້ທໍາມະຊາດ ເປັນທີ່ດິນປະເພດອື່ນ ເພື່ອນໍາໃຊ້ເຂົ້າໃນການພັດທະນາໂຄງການຕ່າງໆ, ການຂໍຍົກເວັ້ນການປະຕິບັດບາງມາດຕາຂອງກົດໝາຍ ໃຫ້ແກ່ໂຄງ ການລົງທຶນຂອງພາກເອກະຊົນຈໍານວນໜຶ່ງ; ບົດລາຍງານກ່ຽວກັບການຈັດຕັ້ງປະຕິບັດ ບ້ວງເງິນເກີນແຜນຂອງທ້ອງຖິ່່ນ ແລະ ລາຍຮັບອື່ນໆຈໍານວນໜຶ່ງ; ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 9 ເດືອນ 2022 ແລະ ແຜນການ ປີ 2023; ບົດລາຍງານກ່ຽວກັບຜົນສໍາເລັດການເຄື່ອນໄຫວວຽກງານການຕ່າງປະເທດ ຂອງຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະມິດຕະພາບລັດຖະສະພາ ລວມທັງແຜນການຕ້ອນຮັບ ຄະນະຜູ້ແທນລັດຖະສະພາປະເທດຕ່າງໆ, ບົດລາຍງານການກະກຽມເຂົ້າຮ່ວມກອງປະຊຸມສາກົນຕ່າງໆ; ບົດລາຍງານແຜນການຕິດຕາມກວດກາ ໂຄງການພັດທະນາເສດຖະກິດ-ສັງຄົມ ທີ່ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ແລະ ສິ່ງແວດລ້ອມ; ບົດລາຍງານຜົນການກວດສອບ ກ່ຽວກັບການຈັດຕັ້ງປະຕິບັດໂຄງການລົງທຶນຈໍານວນໜຶ່ງ; ບົດລາຍງານກ່ຽວກັບການເໜັງຕີງ ແລະ ການຄຸ້ມຄອງລາຄາສິນຄ້າ ແລະ ການນໍາເຂົ້ານໍ້າມັນເຊື້ອໄຟ; ບົດລາຍງານການຄົ້ນຄວ້າການສະເໜີຂໍແຕ່ງຕັ້ງຮອງປະທານສານປະຊາຊົນ ເຂດ I ແລະ III ແຂວງຊຽງຂວາງ, ຮ່າງມະຕິຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງສານປະຊາຊົນສຸງສຸດ; ບົດລາຍງານການປັບປຸງຮ່າງມະຕິວ່າດ້ວຍການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ; ບົດລາຍງານກ່ຽວກັບການພິຈາລະນາແກ້ໄຂ ຄໍາຮ້ອງຂໍຄວາມເປັນທໍາຂອງປະຊາຊົນ. ບັນດາກະຊວງ, ອົງການ ທີ່ກ່ຽວຂ້ອງ ໄດ້ເອົາໃຈໃສ່ຕິດຕາມຊຸກຍູ້ ການຈັດຕັ້ງປະຕິບັດ.
(ພາບ: ນາງ ສຸພາວັນ ຫອມສະນິດ; ຂ່າວ: ນາງ ໄຊໂສພາພອນ ມິ່ງມຸງຄຸນ)