ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 (ສພຊ) ໃນລະຫວ່າງວັນທີ 18-19 ທັນວາ 2021 ທີ່ເມືອງວັງວຽງ ແຂວງວຽງຈັນ, ກໍາມາທິການບັນດາເຜົ່າ (ກບຜ) ສະພາແຫ່ງຊາດ ໄດ້ມີກອງປະຊຸມພາຍໃຕ້ຫົວຂໍ້ “ຄວາມຮູ້ພື້ນຖານກ່ຽວກັບວຽກງານຊົນເຜົ່າ ແລະ ວຽກງານສາສະໜາ ໃຫ້ແກ່ສະມາຊິກສະພາແຫ່ງຊາດ (ສສຊ), ສະມາຊິກສະພາປະຊາຊົນແຂວງ (ສສຂ) ແລະ ພະນັກງານ-ວິຊາການ ເຂດເລືອກຕັ້ງທີ 1-13;ພາຍໃຕ້ການເປັນປະທານຂອງທ່ານ ຄໍາຈັນ ໂສຕາປະເສີດ ປະທານ ກບຜ; ໂດຍການເຂົ້າຮ່ວມຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ທັງເປັນຜູ້ຊີ້ນຳ ກບຜ; ມີບັນດາທ່ານຮອງປະທານ ກບຜ, ສສຊ, ສສຂ ຈາກ 13 ເຂດເລືອກຕັ້ງ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ.

ທັງນີ້, ກໍເພື່ອໃຫ້ ສສຊ ຊຸດທີ IX ທີ່ເປັນກຳມະການຂອງ ກບຜ ຊຸດໃໝ່ ສາມາດຮຽນຮູ້ ແລະ ກຳໄດ້ເນື້ອໃນນິຕິກຳກ່ຽວຂ້ອງກັບພາລະບົດບາດ, ສິດ ແລະ ໜ້າທີ່ຂອງຕົນ; ຮັບຮູ້ ແລະ ເຂົ້າໃຈ ທີ່ຕັ້ງ, ພາລະບົດບາດ, ສິດ ແລະ  ໜ້າທີ່ ຂອງ ກບຜ; ເພື່ອຮັບຮູ້ ແລະ ເຂົ້າໃຈ ມະຕິວ່າດ້ວຍການປະສານງານ ລະຫວ່າງ ກບຜ ກັບຂະແໜງການທີ່ກ່ຽວຂ້ອງ; ສ້າງຄວາມເຂົ້າໃຈ ແລະ ເຊື່ອມຊຶມ ດຳລັດວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ; ດຳລັດ່າດ້ວຍວຽກງານເຜົ່າ ຢູ່ ສປປລາວ ແລະ ເພື່ອເຮັດໃຫ້ ສສຊ ທີ່ເປັນກຳມະການຂອງ ກບຜ ໄດ້ຮຽນຮູ້ບົດຮຽນປະສົບການ, ການຕິດຕາມກວດກາ ແລະ ແກ້ໄຂບັນຫາກ່ຽວກັບຊົນເຜົ່າ ແລະ ສາສະໜາ ໃຫ້ຖືກຕ້ອງຕາມລະບຽບກົດໝາຍ.

ໃນພິທີ, ທ່ານຮອງປະທານສະພາແຫ່ງຊາດ ໄດ້ກ່າວວ່າ: ເພື່ອເປັນການປຶກສາຫາ ແລະ ແລກປ່ຽນຄວາມຄິດເຫັນທາງດ້ານວິຊາການຮ່ວມກັນ ແລະ ເພື່ອກ້າວໄປສູ່ຄວາມເປັນເອກະພາບໃນການຈັດຕັ້ງປະຕິບັດວຽກງານ ທັງເປັນການຄົ້ນຄວ້າປະກອບຄຳເຫັນຕໍ່ແຜນພັດທະນາວຽກງານຂອງ ກບຜ ເຊິ່ງເປັນເນື້ອໃນທີ່ສໍາຄັນເພາະຈະເປັນແຜນວຽກພື້ນຖານໃຫ້ແກ່ການຈັດຕັ້ງປະຕິບັດພາລະບົດບາດຂອງ ກບຜ ສະພາແຫ່ງຊາດ ຊຸດທີ IX ໃຫ້ໄດ້ທັງຄຸນນະພາບ ແລະ ປະລິມານ; ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມສຸມສະຕິປັນຍາ, ຄວາມຮູ້ຄວາມສາມາດ ແລະ ປະສົບການຜ່ານມາ ເຂົ້າໃນການປະກອບຄໍາຄິດຄໍາເຫັນ ແລະ ແລກປ່ຽນບົດຮຽນຢ່າງກົງໄປກົງມາ ເພື່ອພ້ອມກັນນຳເອົາບົດຮຽນທີ່ເປັນປະໂຫຍດໄປຈັດຕັ້ງປະຕິບັດໃຫ້ສອດຄ່ອງກັບພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບຂອງຕົນ ໃຫ້ມີຄວາມຮັດກຸມ, ສອດຄ່ອງ ກັບສະພາບຄວາມເປັນຈິງ, ຖືກຕ້ອງຕາມແນວທາງ, ນະໂຍບາຍ, ລັດຖະທຳມະນູນ ແລະ ກົດໝາຍ.

(ພາບ ແລະ ຂ່າວ: ອານຸສອນ ພູມມີທອນ)