ໃນວັນທີ 4-5 ກັນຍາ 2023 ທີ່ຫ້ອງປະຊຸມສະພາປະຊາຊົນແຂວງຜົ້ງສາລີ, ໄດ້ດໍາເນີນກອງປະຊຸມການປະເມີນການຈັດຕັ້ງປະຕິບັດກົດໝາຍ 4 ສະບັບ ໃນຂົງເຂດສະພາແຫ່ງຊາດ ໂດຍການເປັນປະທານຂອງທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສະພາແຫ່ງຊາດ, ເຂົ້າຮ່ວມມີທ່ານ ທອງສີ ເສົາສຸລິພົນ ຮອງເລຂາພັກແຂວງ, ປະທານສະພາປະຊາຊົນແຂວງ, ທ່ານ ຄຳຜອຍ ວັນນະສານ ເລຂາພັກແຂວງ ເຈົ້າແຂວງແຂວງຜົ້ງສາລີ, ບັນດາທ່ານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ສະມາຊິກສະພາປະຊາຊົນແຂວງ, ຄະນະເລຂາທິການສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກການ ຂອງອົງການປົກຄອງແຂວງ,ຂົງເຂດຕຸລາການ, ຄະນະນໍາຈາກ 2 ກໍາລັງປ້ອງກັນຊາດ-ປ້ອງກັນຄວາມສະຫງົບ, ເຈົ້າເມືອງ, ອົງການຈັດຕັ້ງມະຫາຊົນຂັ້ນແຂວງ, ອົງການຈັດຕັ້ງສັງຄົມ, ສະຖາບັນການສຶກສາ, ລັດວິສາຫະກິດພາກລັດ-ເອກະຊົນ ພ້ອມດ້ວຍພະນັກງານ-ລັດຖະກອນ ຈາກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເຂົ້າຮ່ວມຢ່າງພ້ອມພຽງ
ກົດໝາຍ 4 ສະບັບ ໃນຂົງເຂດສະພາແຫ່ງຊາດ ແລະ ສະພາປະຊາຊົນແຂວງ ທີ່ຖືກປະເມີນໃນຄັ້ງນີ້ ປະກອບມີ: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ.
ທ່ານ ປະທານກອງປະຊຸມ ກ່າວເປີດກອງປະຊຸມ ໂດຍຍົກໃຫ້ເຫັນຄວາມໝາຍ, ຄວາມສຳຄັນ ແລະ ຄວາມຈຳເປັນໃນການປັບປຸງກົດໝາຍທັງ 4 ສະບັບດັ່ງກ່າວ ເນື່ອງຈາກກົດໝາຍທັງ 4 ສະບັບ ຕິດພັນ ເຊິ່ງກັນ ແລະ ກັນ ແລະ ໄດ້ຮັບການປັບປຸງເປັນແຕ່ລະໄລຍະມາຫຼາຍຄັ້ງແລ້ວ ແຕ່ຍັງມີຄວາມຈຳເປັນຕ້ອງໄດ້ຮັບການປັບປຸງອີກ ເພື່ອໃຫ້ສອດຄ່ອງກັບສະພາບຕົວຈິງ ຕາມແນວທາງນະໂຍບາຍຂອງພັກ-ລັດ, ສະພາບການຂະຫຍາຍຕົວຂອງເສດຖະກິດ-ສັງຄົມ ຂອງປະເທດຊາດ ກໍ່ຄືສາກົດ ແລະ ພາກພື້ນ, ເພື່ອໃຫ້ຖືກຕ້ອງ ສອດຄ່ອງກັບກົດໝາຍວ່າດ້ວຍການສ້າງນິຕິກຳ ແລະ ເປັນການຍາດແຍ່ງເອົາຄຳຄິດຄຳເຫັນຂອງເປົ້າໝາຍຕ່າງໆໃນສັງຄົມ ເພື່ອນຳໄປຄົ້ນຄວ້າປັບປຸງກົດໝາຍ ເຮັດໃຫ້ກາຍເປັນກົດໝາຍ ຂອງປະຊາຊົນ, ມາຈາກປະຊາຊົນ ແລະ ຮັບໃຊ້ປະຊາຊົນຢ່າງແທ້ຈິງ.
ໃນກອງປະຊຸມ, ຄະນະຮັບຜິດຊອບໄດ້ຜ່ານບົດປະເມີນການຈັດຕັ້ງປະຕິບັດກົດໝາຍ 4 ສະບັບດັ່ງກ່າວ ແລະ ປະທານກອງປະຊຸມ ໄດ້ມີການເຈາະຈີ້ມຕໍ່ແຕ່ລະກົດໝາຍ ເພື່ອສາມາດຮີບໂຮມບັນດາຄຳຄິດຄຳເຫັນທີ່ຫຼາກຫຼາຍເພື່ອເຮັດໃຫ້ກົດໝາຍມີຄວາມຮັດກຸມ ແລະ ຈະແຈ້ງຂຶ້ນກວ່າເກົ່າ ສາມາດປະຕິບັດໄດ້ຢ່າງມີປະສິດທິພາບ. ບັນດາທ່ານທີ່ເຂົ້າຮ່ວມໄດ້ສຸມຈິດສຸມໃຈ, ສະຕິປັນຍາປະກອບຄໍາຄິດເຫັນຢ່າງກົງໄປກົງມາ, ພ້ອມທັງຍົກໃຫ້ເຫັນດ້ານດີ, ຜົນປະໂຫຍດ, ຜົນໄດ້ຮັບ, ບັນດາເນື້ອໃນທີ່ຍັງບໍ່ຈະແຈ້ງ, ບໍ່ຮັດກຸມ ມີຄວາມສົມບູນ, ຄົບຖ້ວນຂຶ້ນຕື່ມ ເຊິ່ງການປະກອບຄຳເຫັນຂອງຜູ້ເຂົ້າຮ່ວມໃນຄັ້ງນີ້ ໄດ້ມີການວິເຄາະໃນທຸກແງ່ມູມຂອງແຕ່ລະມາດຕາ, ແຕ່ລະໝວດ ທີ່ໄດ້ເຈາະຈີ້ມຕໍ່ແຕ່ລະກົດໝາຍຢ່າງມີຈຸດສຸມ ເຮັດໃຫ້ຄະນະຮັບຜິດຊອບປັບປຸງບັນດາກົດໝາຍໄດ້ມີຂໍ້ມູນ, ຄໍາຄິດເຫັນທີ່ຊັດເຈນ ເຊິ່ງຈະເປັນພື້ນຖານອັນຈໍາເປັນໃຫ້ແກ່ການປັບປຸງເນື້ອໃນຂອງບັນດາກົດໝາຍໃຫ້ມີຄວາມສົມບູນ, ຄົບຖ້ວນຮັດກຸມກວ່າເກົ່າ, ສາມາດນໍາໄປພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນຂອງສະພາແຫ່ງຊາດຄັ້ງຕໍ່ໄປ ແລະ ທັງເປັນການສ້າງຄວາມພ້ອມໃນການກະກຽມ ແລະ ດໍາເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ X, ສະພາປະຊາຊົນຂັ້ນແຂວງ ຊຸດທີ III ໃນຕໍ່ໜ້າ.
(ພາບ ແລະ ຂ່າວ: ນັກຂ່າວສະພາປະຊາຊົນແຂວງ)