ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 ​

(ສພຊ) ໃນລະຫວ່າງວັນທີ 9-10 ກຸມພາ 2022, ທີ່ນະຄອນໄກສອນ ພົມວິຫານແຂວງສະຫວັນນະເຂດ ກໍາມາທິການບັນດາເຜົ່າ (ກບຜ) ສະພາແຫ່ງຊາດ (ສພຊ) ໄດ້ຈັດກອງປະຊຸມສຳມະນາກ່ຽວກັບການຄຸ້ມຄອງການເຄື່ອນໄຫວວຽກງານສາສະໜາ ໃຫ້ແກ່ສະມາຊິກສະພາແຫ່ງຊາດ (ສສຊ) ແລະ ພະນັກງານ-ລັດຖະກອນທີ່ຮັບຜິດຊອບວຽກງານຊົນເຜົ່າ ຈາກ 6 ເຂດເລືອກຕັ້ງ (ເຂດເລືອກຕັ້ງທີ 12-17); ໂດຍການເປັນປະທານຂອງທ່ານ ຄໍາຈັນ ໂສຕາປະເສີດ ປະທານ ກບຜ; ເຂົ້າຮ່ວມມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ; ມີຮອງປະທານ ກບຜ, ຮອງລັດຖະມົນຕີກະຊວງພາຍໃນ, ຮອງປະທານແນວລາວສ້າງຊາດ, ສສຊ ຈາກ 6 ເຂດເລືອກຕັ້ງ, ຫົວໜ້າກົມໃຫຍ່ສັນຕິບານ, າງໜ້າຈາກອົງການສາສະໜາຕ່າງໆ, ຫົວໜ້າ-ຮອງຫົວໜ້າກົມ ແລະ ຫົວໜ້າ-ຮອງຫົວໜ້າພະແນກ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທັງນີ້, ເພື່ອໃຫ້ ສສຊ ຊຸດທີ IX ທີ່ເປັນກຳມະການຂອງ ກບຜ ຊຸດໃໝ່ ສາມາດຮຽນຮູ້ ແລະ ກຳໄດ້ເນື້ອໃນນິຕິກຳທີ່ກ່ຽວຂ້ອງກັບພາລະບົດບາດ, ສິດ ແລະ ໜ້າທີ່ຂອງຕົນ; ຮັບຮູ້ ແລະ ເຂົ້າໃຈ ທີ່ຕັ້ງ, ພາລະບົດບາດ, ສິດ ແລະ ໜ້າທີ່ ຂອງ ກບຜ ແລະ ມະຕິ ວ່າດ້ວຍການປະສານງານ ລະຫວ່າງ ກບຜ ກັບຂະແໜງການທີ່ກ່ຽວຂ້ອງ ທັງເປັນການສ້າງຄວາມເຂົ້າໃຈ ແລະ ເຊື່ອມຊຶມດຳລັດ ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ເພື່ອເຮັດໃຫ້ ສສຊ ທີ່ເປັນກຳມາການຂອງ ກບຜ ຊຸດໃໝ່ ໄດ້ຮຽນຮູ້ບົດຮຽນປະສົບການ ການຕິດຕາມກວດກາ ແລະ ສາສະໜາ ໃຫ້ຖືກຕ້ອງຕາມລະບຽບກົດໝາຍ.

ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງມະຕິຕົກລົງຂອງຄະນະປະຈຳສະພາແຫ່ງຊາດ ວ່າດ້ວຍການຈັດຕັ້ງ ແລະ ເຄື່ອນໄຫວຂອງ ກບຜ; ມະຕິວ່າດ້ວຍການພົວພັນລະຫວ່າງກບຜ ກັບອົງການ ແລະ ຂະແໜງການທີ່ກ່ຽວຂ້ອງ; ດຳລັດວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ຢູ່ ສປປລາວ; ດຳລັດວ່າດ້ວຍວຽກງານຊົນເຜົ່າ; ບົດລາຍງານການຕີລາຄາສະພາບການຈັດຕັ້ງປະຕິບັດ ດຳລັດ ວ່າດ້ວຍການຄຸ້ມຄອງ ແລະ ການປົກປ້ອງການເຄື່ອນໄຫວສາສະໜາ ຢູ່ ສປປ ລາວ; ການປະຕິບັດພາລະບົດບາດ ແລະ ວຽກງານສາສະໜາ ຂອງກະຊວງພາຍໃນ ຕິດພັນກັບການເຄື່ອນໄຫວວຽກງານຕົວຈິງ;ການປະຕິບັດພາລະບົດບາດ ແລະ ໜ້າທີ່ ຂອງກົມສາສະ ໜາຂອງສູນກາງແນວລາວສ້າງຊາດ; ການປະຕິບັດພາລະບົດບາດ ແລະ ໜ້າທີ່ຂອງກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ຕິດພັນກັບການເຄື່ອນໄຫວວຽກງານຕົວຈິງ ແລະ ບາງບົດຮຽນກ່ຽວກັບການຕິດຕາມກວດກາວຽກງານຊົນເຜົ່າ-ສາສະໜາ ຂອງ ກບຜ ສະພາແຫ່ງຊາດ ຊຸດທີ VIII (2016-2020); ພ້ອມນັ້ນ, ຜູ້ເຂົ້າຮ່ວມຍັງໄດ້ສຸມສະຕິປັນຍາ, ຄວາມຮູ້ຄວາມສາມາດ ແລະ ປະສົບການຜ່ານມາ ເຂົ້າໃນການປະກອບຄໍາຄິດຄໍາເຫັນ ແລະ ແລກປ່ຽນບົດຮຽນຢ່າງກົງໄປກົງມາ, ມີລັກສະນະສ້າງສັນ ພ້ອມກັນຊອກໃຫ້ເຫັນເຖິງດ້ານດີ, ດ້ານອ່ອນທີ່ຄົງຄ້າງ ແລະ ສະເໜີວິທີແກ້ໄຂໃນຕໍ່ໜ້າ  ເພື່ອພ້ອມກັນນຳເອົາບົດຮຽນທີ່ເປັນປະໂຫຍດໄປຈັດຕັ້ງປະຕິບັດໃຫ້ສອດຄ່ອງກັບພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບຂອງຕົນ ໃຫ້ມີຄວາມຮັດກຸມ, ສອດຄ່ອງ ກັບສະພາບຄວາມເປັນຈິງ, ຖືກຕ້ອງຕາມແນວທາງ, ນະໂຍບາຍ, ລັດຖະທຳມະນູນ ແລະ ກົດໝາຍ.

ໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ໄດ້ກ່າວວ່າ: ໃຫ້ເອົາໃຈໃສ່ເຊື່ອມຊຶມເນື້ອໃນນິຕິກຳຕ່າງໆທີ່ກ່ຽວຂ້ອງ, ປະສານສົມທົບ, ຍົກສູງບົດບາດໃນການຊຸກຍູ້ຕິດຕາມກວດກາແຕ່ຫົວທີ, ປົກກະຕິ ແລະ ຕໍ່ເນືອງ; ພ້ອມນັ້ນ, ທ່ານຍັງໄດ້ເນັ້ຕື່ມອີກວ່າ: ພັກ-ລັດເຮົາເຄົາລົບສິດທິໃນການເຊື່ອຖື ຫລື ບໍ່ເຊື່ອຖື ຂອງພົນລະເມືອງລາວບັນດາເຜົ່າ ແຕ່ການເຊື່ອຖືນັ້ນຕ້ອງສາມາດຢູ່ຮ່ວມກັນໄດ້ໂດຍສັນຕິປອງດອງ ບໍ່ຈຳແນກ, ແບ່ງແຍກ ແລະ ຊ່ວຍເຫລືອເບິ່ງແຍງເຊິ່ງກັນ ແລະກັນ.

(ພາບ ແລະ ຂ່າວ: ອານຸສອນ ພູມມີທອນ)