ຕອນເຊົ້າວັນທີ 29 ມິຖຸນາ 2023 ນີ້ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມກະກຽມເນື້ອໃນຮອບດ້ານໃຫ້ແກ່ກອງປະຊຸມສະໄໝສາມັນເທື່ອທີ5 ຂອງສະພາປະຊາຊົນແຂວງຊຸດທີII, ກອງປະຊຸມການຈັດຕັ້ງປະຕິບັດວຽກງານ 6 ເດືອນຕົ້ນປີ 2023 ຂອງຄະນະເລຂາທິການ ແລະ ສ່ອງແສງວຽກງານພາຍໃນສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ມີໄຊ ມີວິໄລ ກຳມະການຄະນະປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ ມີ ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງການຜ່ານຮ່າງແຈ້ງການກ່ຽວກັບການສະຫລຸບລາຍງານ ການເຄື່ອນໄຫວວຽກງານ ຂອງຄະນະກຳມະການ, ຄະນະເລຂາທິການ ແລະ ບັນດາຂະແໜງ ພາຍໃນສະພາປະຊາຊົນແຂວງ ເປັນຕົ້ນກ່ຽວກັບການສະຫລຸບລາຍງານການເຄື່ອນໄຫວວຽກງານປະຈຳເດືອນ, ສາມເດືອນ, ໜຶ່ງປີ ແລະ ຫ້າປີ ໃຫ້ມີຄວາມເປັນເອກະພາບກັນ ເພື່ອຮັບປະກັນໃຫ້ການປະຕິບັດພາລະບົດບາດ, ສິດ ແລະ ໜ້າທີ່ ໃນການເປັນເສນາທິການໃຫ້ແກ່ສະພາປະຊາຊົນແຂວງ, ຄະນະປະຈຳສະພາປະຊາຊົນແຂວງ ມີປະສິດທິພາບ ແລະ ທັນກັບກຳນົດເວລາ; ພ້ອມດຽວກັນ ບັນດາທ່ານໄດ້ມີການແລກປ່ຽນປະກອບຄຳຄິດເຫັນຕໍ່ກັບຮ່າງແຈ້ງການກ່ຽວກັບການສະຫລຸບລາຍງານ ການເຄື່ອນໄຫວວຽກງານ ຂອງຄະນະກຳມະການ, ຄະນະເລຂາທິການ ແລະ ບັນດາຂະແໜງ ພາຍໃນສະພາປະຊາຊົນແຂວງ ໃຫ້ມີຄວາມເປັນເອກະພາບກັນ  ແລະ ບັນດາທ່ານ ຍັງໄດ້ແລກປ່ຽນປະກອບຄຳຄິດເຫັນຕໍ່ການກະກຽມກອງປະຊຸມພາຍໃນສະພາປະຊາຊົນແຂວງ ທີ່ຈະໄຂຂື້ນໃນຕໍ່ໜ້າ ຢ່າງມີຈຸດສຸມ ເພື່ອເຮັດໃຫ້ການກະກຽມເນື້ອໃນຮອບດ້ານຂອງກອງປະຊຸມ ໃຫ້ສຳເລັດສົມບຸນ ແລະ ທວງທັນເວລາທີ່ກຳນົດໄວ້.

ຕອນທ້າຍ ທ່ານ ມີໄຊ ມີວິໄລ ກຳມະການຄະນະປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ ຍັງໄດ້ມີຄຳເຫັນຊີ້ແຈງ ແລະ ເອກະພາບກັນກ່ຽວກັບການຈັດຕັ້ງປະຕິບັດວຽກງານບັນດາຂະແໜງ ພາຍໃນສະພາປະຊາຊົນແຂວງ ແລະ ເນັ້ນໜັກ ໃຫ້ບັນດາອານຸກຳມະການກະກຽມເນື້ອໃນກອງປະຊຸມສະພາປະຊາຊົນແຂວງທີ່ຈະໄຂຂື້ນຕໍ່ໜ້າ ກ່ອນອື່ນຮຽກຮ້ອງໃຫ້ເອົາໃຈໃສ່ກະກຽມຮ່າງເອກະສານ ແລະ ວຽກງານຮອບດ້ານຕ່າງໆໃຫ້ສຳເລັດ, ໃຫ້ມີຄຸນນະພາບທີ່ສຸດ ພ້ອມທັງປະສານສົມທົບກັບອົງການປົກຄອງແຂວງທີ່ກ່ຽວຂ້ອງ ເພື່ອກຽມຄວາມພ້ອມ ແລະ ຮັບປະກັນໃຫ້ທວງທັນກັບເວລາທີ່ກຳນົດຂອງກອງປະຊຸມ.

                                                                                                                                                              ພາບຂ່າວ ວັນນີ ແຝງບົວວັນ