(ສພຊ) ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ ຄົບຮອບ 113 ປີ (8 ມີນາ 1910-8 ມີນາ 2023) ໃຫ້ເປັນຂະບວນຟົດຟື້ນ ຄະນະພັກສະພາແຫ່ງຊາດ ແລະ ອຳນາດການປົກຄອງແຂວງວຽງຈັນ ທີ່ໄດ້ເຫັນຄວາມສຳຄັນຂອງເອື້ອຍນ້ອງແມ່ຍິງ ໃນວັນແມ່ຍິງສາກົນທີ່ມີຄວາມໝາຍຄວາມສຳຄັນ ເຊິ່ງສະແດງເຖິງມູນເຊື້ອຂອງແມ່ຍິງທົ່ວໂລກ ກໍຄືແມ່ຍິງລາວ ໃນການຕໍ່ສູ້ພິລະອາດຫານຄຽງບ່າຄຽງໄຫຼ່ກັບເພດຊາຍ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເຕົ້າໂຮມຄວາມສາມັກຄີ ແລະ ການພົວພັນອັນມີເນື້ອໃນເລິກເຊິ່ງຂອງວັນແມ່ຍິງສາກົນ ໃນວັນທີ 10 ມີນາ 2023 ກອງທຶນຊ່ວຍເຫຼືອສັງຄົມສະພາແຫ່ງຊາດ ແລະ ສະຫະພັນແມ່ຍິງສະພາແຫ່ງຊາດ ນໍາພາໂດຍທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມສະພາແຫ່ງຊາດ ແລະ ທ່ານ ນາງ ມະນີວັນ ເຢຍປາວເຮີ ປະທານຄະນະບໍລິຫານງານສະຫະພັນແມ່ຍິງສະພາແຫ່ງຊາດ ພ້ອມດ້ວຍຄອບຄົວການນໍາຂອງສະພາແຫ່ງຊາດ ແລະ ເອື້ອຍນ້ອງແມ່ຍິງທັງໝົດພາຍໃນສະພາແຫ່ງຊາດ ໄດ້ເດີນທາງຢ້ຽມຢາມ ແລະ ມອບເຄື່ອງຊ່ວຍເຫຼືອໃຫ້ ເມືອງເຟືອງ ແຂວງວຽງຈັນ.

ໂອກາດດັ່ງກ່າວ ຄະນະ ໄດ້ເຂົ້າພົບປະເຮັດວຽກກັບຄະນະສະຫະພັນແມ່ຍິງແຂວງວຽງຈັນ ແລະ ແມ່ຍິງເມືອງເຟືອງ ເຊິ່ງໄດ້ກ່າວຕ້ອນຮັບຈາກທ່ານ ຄຳເພັດ ຈັນສົມພູ ເຈົ້າເມືອງໆເຟືອງ; ໄດ້ຮັບຟັງການລາຍງານກ່ຽວກັບການສ້າງວຽກເຮັດງານທຳ, ການຜະລິດສິນຄ້າຂອງແມ່ຍິງ ເພື່ອສ້າງລາຍຮັບ ແລະ ແກ້ໄຂຊີວິດການເປັນຢູ່ໃນຄອບຄົວໃຫ້ດີຂຶ້ນ ຈາກທ່ານ ນາງ ມະໄລສີ ທຳມະໂຄດ ປະທານສະຫະພັນແມ່ຍິງແຂວງວຽງຈັນ ແລະ ຮັບຟັງການລາຍງານບົດຮຽນກ່ຽວກັບການສ້າງຕັ້ງກອງທຶນຊ່ວຍເຫຼືອສັງຄົມ ສະພາແຫ່ງຊາດ ຈາກທ່ານ ນາງ ມະນີວັນ ເຢຍປາວເຮີ ປະທານຄະນະບໍລິຫານງານສະຫະພັນແມ່ຍິງສະພາແຫ່ງຊາດ ຈາກນັ້ນ, ຍັງໄດ້ສົນທະນາແລກປ່ຽນ ແລະ ຖອດຖອນບົດຮຽນກ່ຽວກັບການເຄື່ອນໄຫວວຽກງານຂອງແມ່ຍິງສະພາແຫ່ງຊາດ ແລະ ແມ່ຍິງແຂວງວຽງຈັນອີກດ້ວຍ.

ຈາກນັ້ນ, ຄະນະ ໄດ້ນໍາເອົາເຄື່ອງອຸປະກອນການແພດຈໍານວນໜຶ່ງ ທີ່ລະດົມ, ຂົນຂວາຍ ຈາກພາຍໃນ ແລະ ຕ່າງປະເທດ ເພື່ອປະກອບເຂົ້າໃນການຮັບໃຊ້ວຽກງານຫ້ອງການ ແລະ ເພື່ອອໍານວຍຄວາມສະດວກໃຫ້ແກ່ແພດໝໍ ໃນການປິ່ນປົວຄົນເຈັບ. ເຄື່ອງທີ່ນໍາມາມອບໃນຄັ້ງນີ້ ປະກອບມີ: ຄອມພິວເຕີຕັ້ງໂຕະ, ເຄື່ອງວັດແທກອຸນຫະພູມ, ຕຽງຄົນເຈັບ, ຕຽງກວດຄົນເຈັບ, ໂຕະອຸປະກອນການແພດ, ລໍ້ບໍາບັດ, ຜ້າປູບ່ອນ, ຊຸດພົມຢາງສີຟ້າ, ເຈວລ້າງມື ແລະ ຜ້າປິດປາກ ລວມມູນຄ່າ 260 ລ້ານກີບ.

ຫຼັງຈາກນັ້ນ, ຄະນະ ໄດ້ເດີນທາງໄປຢ້ຽມຊົນສະຖານທີ່ທ່ອງທ່ຽວຫາດດອນກາງ ທີ່ສວຍສົດງົດງາມທາງທຳມະຊາດ ແລະ ໄດ້ໄປຢ້ຽມຊົມວັດສິນໄຊຍະຣາມ ບ້ານໂນນຫີນແຮ່ ດິນແດນອະລິຍະທຳ ແຫ່ງເມືອງເຟືອງ ແຂວງວຽງຈັນ ພ້ອມກັບຖວາຍວັດຖຸປັດໄຈຈຳນວນໜຶ່ງ.

(ພາບ ແລະ ຂ່າວ: ນາງ ນິດຕາ ຄຸນປາກດີ)