(ສພຊ) ໃນວັນທີ 14 ກໍລະກົດ 2023 ທີ່ຫໍສະພາແຫ່ງຊາດ ນະຄອນຫຼວງວຽງຈັນ ໄດ້ມີພິທີມອບ-ຮັບເຄື່ອງອຸປະກອນການແພດ ເຊິ່ງກ່າວມອບໂດຍທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມສະພາແຫ່ງຊາດ ແລະ ຕາງໜ້າຮັບໂດຍສະມາຊິກສະພາແຫ່ງຊາດ 5 ແຂວງຄື: ຜົ້ງສາລີ, ອຸດົມໄຊ, ບໍ່ແກ້ວ, ຫົວພັນ ແລະ ຊຽງຂວາງ; ມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ບັນດາທ່ານຄະນະກອງທຶນຊ່ວຍເຫຼືອສັງຄົມສະພາແຫ່ງຊາດ, ພຣະອາຈານ ດຣ. ພົງສະຫວັນ ອານຸສິນ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ອຸປະກອນທີ່ນຳມາມອບໃນຄັ້ງນີ້ ປະກອບມີເຄື່ອງວັດແທກອຸນຫະພູມ, ລໍ້ຄ້ຳບຳບັດ, ຊຸດກັນພະຍາດໃນຫ້ອງຜ່າຕັດ, ຜ້າອັດປາກ-ດັງ ແລະ ອື່ນໆ ທັງໝົດ 24 ລາຍການ ລວມມູນຄ່າ 750 ລ້ານກີບ ເຊິ່ງແມ່ນກອງທຶນຊ່ວຍເຫຼືອສັງຄົມສະພາແຫ່ງຊາດ ໄດ້ລະດົມ, ຂົນຂວາຍຈາກພາຍໃນ ແລະ ຕ່າງປະເທດ ເພື່ອໃຫ້ບັນດາທ່ານສະມາຊິກສະພາແຫ່ງຊາດ ມອບຕໍ່ໃຫ້ບັນດາໂຮງໝໍຂອງ 5 ແຂວງດັ່ງກ່າວ ເພື່ອປະກອບເຂົ້າໃນການນຳໃຊ້ອຳນວຍຄວາມສະດວກໃຫ້ແກ່ແພດ, ໝໍ ໃນການປິ່ນປົວຄົນເຈັບ ແລະ ການແກ້ໄຂການແຜ່ລະບາດຂອງພະຍາດໂຄວິດ-19 ທີ່ຍັງມີການສືບຕໍ່ແຜ່ລະບາດຢູ່ພາຍໃນປະເທດ.