(ສພຊ) ໃນລະຫວ່າງວັນທີ 16-19 ມັງກອນ 2024 ທ່ານ ຮສ. ປອ. ລິນຄໍາ ດວງສະຫວັນ ກຳມະການສໍາຮອງສູນກາງພັກ, ຄະນະປະຈໍາສະພາແຫ່ງຊາດ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມດ້ວຍຄະນະ ໂດຍມີກົມຄຸ້ມຄອງບໍ່ແຮ່, ກະຊວງພະລັງງານ ແລະ ບໍ່ແຮ່ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກົດໝາຍວ່າດ້ວຍແຮ່ທາດ ແລະ ມະຕິຂອງສະພາແຫ່ງຊາດ ກ່ຽວກັບໂຄງການຊຸກຍູ້ການຜະລິດທີ່ສໍາຄັນ ແລະ ການຫຼຸດຜ່ອນການນໍາເຂົ້າ ແລະ ທົດລອງຂຸດຄົ້ນແຮ່ທາດ ຢູ່ແຂວງຄໍາມ່ວນ ແລະ ແຂວງສະຫວັນນະເຂດ.
ການລົງເຄື່ອນຕິດຕາມກວດກາຊຸກຍູ້ການຈັດຕັ້ງປະຕິບັດກົດໝາຍ ແລະ ມະຕິຂອງສະພາແຫ່ງຊາດໃນຄັ້ງນີ້, ທ່ານ ຮສ. ປອ. ລິນຄໍາ ດວງສະຫວັນ ພ້ອມດ້ວຍຄະນະ ໄດ້ເຂົ້າພົບການນໍາຂອງແຂວງຄໍາມ່ວນ ແລະ ທ່ານເຈົ້າແຂວງໆສະ ຫວັນນະເຂດ ເພື່ອລາຍງານຈຸດປະສົງໃນການເຄື່ອນໄຫວເຮັດວຽກຢູ່ພາຍໃນແຂວງ; ພ້ອມດຽວກັນນັ້ນ, ກໍໄດ້ຈັັດກອງປະຊຸມເຮັດວຽກຮ່ວມກັບສະພາປະຊາຊົນແຂວງ (ສພຂ) ແລະ ພະແນກການທີ່ກ່ຽວຂ້ອງຂອງສອງແຂວງຄື: ແຜນການ ແລະ ການລົງທຶນ, ຊັບພະຍາກອນທຳມະຊາດ ແລະ ສິ່ງແວດລ້ອມ, ພະລັງງານ ແລະ ບໍ່ແຮ່, ກະສິກຳ ແລະ ປ່າໄມ້, ອຸດ ສາຫະກຳ ແລະ ການຄ້າ, ແລະ ພະແນກການເງິນ ເພື່ອຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານໂຄງ ການທົດລອງຂຸດຄົ້ນແຮ່ທາດຕາມຂໍ້ຕົກລົງຂອງທ່ານນາຍົກລັດຖະມົນຕີ ວ່າດ້ວຍການອະນຸຍາດການຂຸດຄົ້ນແຮ່ທາດແບບທົດລອງ ສະບັບເລກທີ 61/ນຍ, ລົງວັນທີ 21/6/2021 ແລະ ການຈັດຕັ້ງປະຕິບັດບັນດາມະຕິຂອງສະພາແຫ່ງຊາດ ເຊິ່ງກອງປະຊຸມໄດ້ຮັບຟັງການລາຍງານຈາກພະແນກການທີ່ກ່ຽວຂ້ອງ ແລະ ມີການແລກປ່ຽນຄໍາຄິດຄໍາເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີທີ່ຄວນເສີມຂະຫຍາຍ ແລະ ດ້ານອ່ອນຂໍ້ຄົງຄ້າງທີ່ຕ້ອງໄດ້ຊອກຫາວິທີແກ້ໄຂ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.
ຜ່ານການຮັບຟັງການລາຍງານ, ທ່ານ ຮສ. ປອ. ລິນຄໍາ ດວງສະຫວັນ ໃນນາມປະທານກອງປະຊຸມ ໄດ້ມີຄໍາເຫັນຊີ້ ນໍາໃຫ້ພາກສ່ວນກ່ຽວຂ້ອງສືບຕໍ່ຈັດຕັ້ງປະຕິບັດວຽກງານທີ່ຢູ່ໃນຄວາມຮັບຜິດຊອບຂອງຕົນ ເປັນຕົ້ນ: ການຊຸກຍູ້ການຜະລິດ ແລະ ການຫຼຸດຜ່ອນການນໍາເຂົ້າ ສຳຄັນແມ່ນຕ້ອງກຳນົດບຸລິມະສິດ ແລະ ທ່າແຮງແຕ່ລະເຂດພາຍໃນຂອງແຂວງ ແລະ ໃນຂົງເຂດວຽກງານແຮ່ທາດ: ຮີບຮ້ອນປະເມີນຜົນການຈັດຕັ້ງປະຕິບັດໂຄງການທົດລອງຂຸດຄົ້ນແຮ່ທາດທີ່ກໍາລັງຈັດຕັ້ງປະຕິບັດຢູ່ພາຍໃນແຂວງ ໃຫ້ມີປະສິດທິພາບ, ປະສິດທິຜົນ, ຍືນຍົງ ພ້ອມທັງມີມາດຕະການຢ່າງເຂັ້ມງວດຕໍ່ໂຄງ ການທີ່ບໍ່ມີປະສິດທິຜົນ ຄວນໂຈະ ແລະ ສໍາລັບໂຄງການໃດທີ່ມີປະສິດທິຜົນ ຄວນໃຫ້ສືບຕໍ່ຈັດຕັ້ງປະຕິບັດໃຫ້ສໍາເລັດ ໂດຍຫັນເຂົ້າສູ່ການດຳເນີນໂຄງການແບບປົກກະຕິ; ການຄົ້ນຄວ້າອະນຸມັດໂຄງການຂຸດຄົ້ນແຮ່ທາດໃນຕໍ່ໜ້າ ຕ້ອງໃຫ້ສອດຄ່ອງກັບຍຸດທະສາດການພັດທະນາແຮ່ທາດທີ່ສະພາແຫ່ງຊາດໄດ້ຮັບຮອງໃນກອງປະຊຸມສະໄໝສາມັນເທື່ອທີ 5 ທີ່ຜ່ານມາ ແລະ ແຈ້ງການຂອງຄະນະເລຂາທິການສະພາແຫ່ງຊາດ ກ່ຽວກັບການພິຈາລະນາການອະນຸມັດໂຄງການຂຸດຄົ້ນແຮ່ທາດ ສະບັບເລກທີ 647/ຄລສ, ລົງວັນທີ 27 ທັນວາ 2023. ຂົງເຂດວຽກງານອຸດສາຫະກຳ ແລະ ການຄ້າ: ໃຫ້ສືບຕໍ່ຊຸກຍູ້ສົ່ງເສີມການຜະລິດປຸງແຕ່ງສິນຄ້າເພື່ອສົ່ງອອກຜະລິດຕະພັນສໍາເລັດຮູບຕ່າງໆ ໃຫ້ມີຄວາມຄ່ອງຕົວ. ຂົງ ເຂດວຽກງານກະສິກໍາ ແລະ ປ່າໄມ້: ເອົາໃຈໃສ່ຄົ້ນຄວ້າ, ປັບປຸງນະໂຍບາຍ ແລະ ນິຕິກຳ ກ່ຽວກັບການສົ່ງເສີມວຽກງານການຟື້ນຟູ ແລະ ປູກໄມ້ ໂດຍການມີສ່ວນຮ່ວມລະຫວ່າງພາກລັດ, ຜູ້ປະກອບການ ແລະ ປະຊາຊົນ ໃຫ້ມີຄວາມຊັດເຈນ ແລະ ຮັດກຸມ; ສ້າງແຜນຟື້ນຟູປ່າ, ປູກໄມ້ທົດແທນ ແລະ ປົກປັກຮັກສາໃນແຕ່ລະຂົງເຂດ ເພື່ອໃຫ້ສອດຄ່ອງກັບແຜນແມ່ບົດຈັດສັນທີ່ດິນແຫ່ງຊາດ ໃຫ້ມີເນື້ອທີ່ປ່າປົກຫຸ້ມກວມ 70%; ສຸມໃສ່ຕິດຕາມ, ກວດກາ ແລະ ສັງລວມການປະຕິບັດພັນທະຕ່າງໆກ່ຽວກັບວຽກງານຟື້ນຟູປ່າໄມ້ ແລະ ປູກໄມ້ທົດແທນ ຕາມສັນຍາສຳປະທານ, ກົດໝາຍ, ມະຕິສະ ພາແຫ່ງຊາດ ແລະ ນິຕິກຳອື່ນທີ່ກ່ຽວຂ້ອງ ຂອງບັນດາໂຄງການກໍ່ສ້າງເຂື່ອນໄຟຟ້າ, ບໍ່ແຮ່, ໂຄງລ່າງພື້ນຖານ ທີ່ໄດ້ຮັບອະ ນຸຍາດຈາກລັດຖະບານໃນໄລຍະຜ່ານມາ. ຂົງເຂດວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ: ໃຫ້​ສືບ​ຕໍ່ເອົາ​ໃຈ​ໃສ່​ສຳ​ຫຼວດ, ວັດ​ແທກ, ຂຶ້ນ​ທະບຽນ​ອອກ​ໃບ​ຕາດິນ ແລະ ການຈັດສັນທີ່ດິນ ​​ບັນລຸ​ຕາມ​ແຜນການ​ທີ່​ວາງ​ໄວ້ ​ພ້ອມທັງສືບຕໍ່ຜັນຂະຫຍາຍແຜນແມ່ບົດຈັດສັນທີ່ດິນແຫ່ງຊາດ ແລະ ແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມຂັ້ນແຂວງ ໂດຍຕິດພັນກັບການຊຸກຍູ້ຢ່າງແຂງແຮງໃນການຈັດຕັ້ງຜັນຂະຫຍາຍກົດໝາຍວ່າດ້ວຍທີ່ດິນ ເຂົ້າໃນຊິວິດຕົວຈິງໃຫ້ທົ່ວເຖິງ ແລະ ມີຜົນສັກສິດ; ສືບ​ຕໍ່​ຕິດຕາມຢ່າງ​ໃກ້​ຊິດບັນຫາຜົນ​ກະທົບຕໍ່່ສິ່ງແວດລ້ອມ ສັງຄົມ ແລະ ທໍາມະຊາດ ​ທີ່​ອາດ​ຈະ​ເກີດ​ຂຶ້ນ​ຈາກ​ໂຄງການ​ພັດທະນາ​ຕ່າງໆ ​ເຊັ່ນ: ໂຄງການ​ພັດທະນາ​ໄຟ ຟ້າ, ​ໂຄງການ​ຂຸດ​ຄົ້ນ​ແຮ່ທາດ, ​ໂຄງການ​ພັດທະນາ​ພື້ນຖານ​ໂຄງ​ລ່າງອື່ນໆ.
ພ້ອມກັນນີ້, ຄະນະຍັງໄດ້ເດີນທາງໄປຢ້ຽມຢາມເຂດພື້ນທີ່ຕົວຈິງຂອງແຂວງຄໍາມ່ວນ ຄື: ໂຄງການຂຸດຄົ້ນ ແລະ ປຸງແຕ່ງແຮ່ທາດ ໂດຍສະເພາະແຮ່ເກືອໂປຕາສ ຂອງບໍລິສັດ ຊີໂນອາກຣີ ໂປຕາສ ພັດທະນາແຮ່ທາດ ຈໍາກັດ ແລະ ບໍລິ ສັດ ລາວຄາຍຢວນ ບໍ່ແຮ່ ຈໍາກັດ ຢູ່ເມືອງທ່າແຂກ ແຂວງຄໍາມ່ວນ; ໂຄງການຂຸດຄົ້ນແຮ່ເຫຼັກ (ແບບທົດລອງ) ຂອງບໍລິ ສັດ ລາວມີໄຊ ພັດທະນາບໍ່ແຮ່ ຈໍາກັດ ທີ່ເມືອງພິນ ແລະ ໂຄງການບໍ່ຄໍາ-ທອງ ເຊໂປນ ຂອງບໍລິສັດ ລ້ານຊ້າງ ມິເນໂຣນສ ທີ່ເມືອງວິລະບູລີ ແຂວງສະຫວັນນະເຂດ.
ໃນໄລຍະທີ່ຄະນະລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານຢູ່ສອງແຂວງ, ທ່ານປະທານ ກສຕສ ໃນນາມຫົວໜ້າຄະນະ ໄດ້ມອບຄອມພິວເຕີທີ່ໄດ້ຮັບການຊ່ວຍເຫຼືອຈາກຄະນະກອງທຶນຊ່ວຍເຫຼືອສັງຄົມ ຂອງສະພາແຫ່ງຊາດ ໃຫ້ແກ່ ສພຂ ຄໍາມ່ວນ ແລະ ສພຂ ສະຫວັນນະເຂດ ພາກສ່ວນລະ 01 ຊຸດ ເພື່ອປະກອບສ່ວນເຂົ້າໃນການປະຕິ ບັດວຽກງານໃຫ້ມີຄວາມສະດວກວ່ອງໄວຂຶ້ນຕື່ມ.