(ສພຊ) ໃນລະຫວ່າງວັນທີ 7-10 ມັງກອນ 2024 ທ່ານ ຮສ. ປອ. ລິນຄໍາ ດວງສະຫວັນ ກຳມະການສໍາຮອງສູນກາງພັກ, ຄະນະປະຈໍາສະພາແຫ່ງຊາດ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກົດໝາຍ ແລະ ມະຕິຂອງສະພາແຫ່ງຊາດ ກ່ຽວກັບໂຄງການທົດລອງຂຸດຄົ້ນແຮ່ທາດ ແລະ ການປຸງແຕ່ງນໍ້າມັນແອັດຊັງເພື່ອຊົມໃຊ້ພາຍໃນ ຢູ່ແຂວງຊຽງຂວາງໂດຍມີກົມວິຊາການທີ່ກ່ຽວຂ້ອງຂອງກະຊວງ ເປັນຕົ້ນ: ກົມຄຸ້ມຄອງບໍ່ແຮ່, ກະຊວງພະລັງງານ ແລະ ບໍ່ແຮ່; ກົມການຄ້າພາຍໃນ ແລະ ກົມອຸດສາຫະກຳ, ກະຊວງອຸດສາຫະກຳ ແລະ ການຄ້າ; ກົມພາສີ, ກົມປະຕິຮູບລັດວິສາຫະກິດ ແລະ ປະ ກັນໄພ, ກະຊວງການເງິນ ໄດ້ເຂົ້າຮ່ວມເປັນຄະນະລົງເຄື່ອນໄຫວ.

ການລົງເຄື່ອນຕິດຕາມກວດກາຊຸກຍູ້ການຈັດຕັ້ງປະຕິບັດກົດໝາຍ ແລະ ມະຕິຂອງສະພາແຫ່ງຊາດໃນຄັ້ງນີ້, ທ່ານ ຮສ. ປອ ລິນຄໍາ ດວງສະຫວັນ ພ້ອມດ້ວຍຄະນະ ໄດ້ເຂົ້າພົບທ່ານເຈົ້າແຂວງໆຊຽງຂວາງ ເພື່ອລາຍງານຈຸດປະສົງໃນການເຄື່ອນໄຫວເຮັດວຽກຢູ່ພາຍໃນແຂວງ; ພ້ອມດຽວກັນນັ້ນ, ກໍໄດ້ຈັັດກອງປະຊຸມເຮັດວຽກຮ່ວມກັບສະພາປະຊາຊົນແຂວງ ແລະ ພະແນກການທີ່ກ່ຽວຂ້ອງຂອງແຂວງ ເປັນຕົ້ນ: ພະແນກແຜນການ ແລະ ການລົງທຶນ, ພະແນກຊັບພະຍາ ກອນທຳມະຊາດ ແລະ ສິ່ງແວດລ້ອມ, ພະແນກພະລັງງານ ແລະ ບໍ່ແຮ່, ພະແນກກະສິກຳ ແລະ ປ່າໄມ້, ພະແນກອຸດສາ ຫະກຳ ແລະ ການຄ້າ, ພະແນກການເງິນ ເພື່ອຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານໂຄງການທົດລອງຂຸດຄົ້ນແຮ່ທາດ ຕາມຂໍ້ຕົກລົງຂອງທ່ານນາຍົກລັດຖະມົນຕີ ວ່າດ້ວຍການອະນຸຍາດການຂຸດຄົ້ນແຮ່ທາດແບບທົດລອງ ສະບັບເລກທີ 61/ນຍ, ລົງວັນທີ 21/6/2021 ແລະ ການຈັດຕັ້ງປະຕິບັດບັນດາມະຕິຂອງສະພາແຫ່ງຊາດ ເຊິ່ງກອງປະຊຸມໄດ້ຮັບຟັງການລາຍງານຈາກພະແນກການທີ່ກ່ຽວຂ້ອງ ແລະ ໄດ້ມີການແລກປ່ຽນຄໍາຄິດຄໍາເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີທີ່ຄວນເສີມຂະຫຍາຍ ແລະ ດ້ານອ່ອນຂໍ້ຄົງຄ້າງທີ່ຕ້ອງໄດ້ຊອກຫາວິທີແກ້ໄຂ ເພື່ອເຮັດໃຫ້ການ ຈັດຕັ້ງປະຕິບັດວຽກງານດັ່ງກ່າວ ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.

ຜ່ານການຮັບຟັງການລາຍງານ, ທ່ານ ຮສ. ປອ. ລິນຄໍາ ດວງສະຫວັນ ໃນນາມປະທານຮ່ວມກອງປະຊຸມ ໄດ້ມີຄໍາເຫັນຊີ້ນໍາໃຫ້ພາກສ່ວນທີ່ກ່ຽວຂ້ອງ ສືບຕໍ່ຈັດຕັ້ງປະຕິບັດວຽກງານທີ່ຢູ່ໃນຄວາມຮັບຜິດຊອບຂອງຕົນ ເປັນຕົ້ນ: ຂົງເຂດວຽກງານແຮ່ທາດ: ຮີບຮ້ອນປະເມີນຜົນການຈັດຕັ້ງປະຕິບັດໂຄງການທົດລອງຂຸດຄົ້ນແຮ່ທາດທີ່ກໍາລັງຈັດຕັ້ງປະຕິບັດຢູ່ພາຍໃນແຂວງໃຫ້ມີປະສິດທິພາບ, ປະສິດທິຜົນ ພ້ອມທັງມີມາດຕະການຢ່າງເຂັ້ມງວດຕໍ່ໂຄງການທີ່ບໍ່ມີປະສິດທິຜົນ ຄວນໂຈະ ແລະ ໂຄງການໃດທີ່ມີປະສິດທິຜົນ ສືບຕໍ່ຈັດຕັ້ງປະຕິບັດໃຫ້ສໍາເລັດ ໂດຍຫັນເຂົ້າສູ່ການດຳເນີນໂຄງການແບບປົກກະຕິ; ການຄົ້ນຄວ້າອະນຸມັດໂຄງການຂຸດຄົ້ນແຮ່ທາດໃນຕໍ່ໜ້າ ຕ້ອງໃຫ້ສອດຄ່ອງກັບຍຸດທະສາດການພັດທະນາແຮ່ທາດ ທີ່ສະພາແຫ່ງຊາດໄດ້ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX. ຂົງເຂດວຽກງານອຸດສາຫະກຳ ແລະ ການຄ້າ: ໃຫ້ສືບຕໍ່ຊຸກຍູ້ສົ່ງເສີມການຜະລິດປຸງແຕ່ງສິນຄ້າເພື່ອສົ່ງອອກຜະລິດຕະພັນສໍາເລັດຮູບຕ່າງໆ ໃຫ້ມີຄວາມຄ່ອງຕົວ; ໃຫ້ພາກສ່ວນກ່ຽວຂ້ອງ ຮີບຮ້ອນປະເມີນການຈັດຕັ້ງປະຕິບັດໂຄງການປຸງແຕ່ງນໍ້າມັນຂອງ ບໍລິສັດ ຍອດງື່ມ ພາວເວີ ຈໍາກັດ ເພື່ອເປັນຂໍ້ມູນລາຍງານຕໍ່ຄະນະປະຈໍາສະພາແຫ່ງຊາດ ຕາມມະຕິຂອງຄະນະປະຈຳສະ ພາແຫ່ງຊາດ ສະບັບເລກທີ 238/ຄປຈ, ລົງວັນທີ 03 ກັນຍາ 2023. ຂົງເຂດວຽກງານກະສິກໍາ ແລະ ປ່າໄມ້: ເອົາໃຈໃສ່ ຄົ້ນຄວ້າ, ປັບປຸງນະໂຍບາຍ ແລະ ນິຕິກຳ ກ່ຽວກັບການສົ່ງເສີມວຽກງານການຟື້ນຟູ ແລະ ປູກໄມ້ ໂດຍການມີສ່ວນຮ່ວມ ລະຫວ່າງພາກລັດ, ຜູ້ປະກອບການ ແລະ ປະຊາຊົນ ໃຫ້ມີຄວາມຊັດເຈນ ແລະ ຮັດກຸມ ພ້ອມທັງສ້າງແຜນຟື້ນຟູປ່າ, ປູກໄມ້ທົດແທນ ແລະ ປົກປັກຮັກສາໃນແຕ່ລະຂົງເຂດ ເພື່ອໃຫ້ສອດຄ່ອງກັບແຜນແມ່ບົດຈັດສັນທີ່ດິນແຫ່ງຊາດ ໃຫ້ມີເນື້ອທີ່ປ່າປົກຫຸ້ມ 70%; ສຸມໃສ່ຕິດຕາມ, ກວດກາ ແລະ ສັງລວມ ການປະຕິບັດພັນທະຕ່າງໆກ່ຽວກັບວຽກງານຟື້ນຟູປ່າໄມ້ ແລະ ປູກໄມ້ທົດແທນ ຕາມສັນຍາສຳປະທານ, ກົດໝາຍ, ມະຕິສະພາແຫ່ງຊາດ ແລະ ນິຕິກຳອື່ນທີ່ກ່ຽວຂ້ອງ ຂອງບັນດາໂຄງການກໍ່ສ້າງເຂື່ອນໄຟຟ້າ, ບໍ່ແຮ່, ໂຄງລ່າງພື້ນຖານ ທີ່ໄດ້ຮັບອະນຸຍາດຈາກລັດຖະບານໃນໄລຍະຜ່ານມາ. ຂົງເຂດວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ: ໃຫ້​ສືບ​ຕໍ່ເອົາ​ໃຈ​ໃສ່​ສຳ​ຫຼວດ, ວັດ​ແທກ, ຂຶ້ນ​ທະບຽນ​ອອກ​ໃບ​ຕາດິນ ​ໃຫ້​ສາມາດ​ບັນລຸ​ຕາມ​ແຜນການ​ທີ່​ວາງ​ໄວ້ ພ້ອມທັງສືບຕໍ່ຜັນຂະຫຍາຍແຜນແມ່ບົດຈັດສັນທີ່ດິນແຫ່ງຊາດ ແລະ ແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມຂອງແຂວງ ໂດຍຕິດພັນກັບການຊຸກຍູ້ຢ່າງແຂງແຮງໃນການຈັດຕັ້ງຜັນຂະຫຍາຍກົດໝາຍວ່າດ້ວຍທີ່ດິນ ເຂົ້າໃນຊີວິດຕົວຈິງໃຫ້ທົ່ວເຖິງ ແລະ ມີຜົນສັກສິດ; ສືບ​ຕໍ່​ຕິດຕາມຢ່າງ​ໃກ້ຊິດບັນຫາຜົນ​ກະທົບຕໍ່່ສິ່ງແວດລ້ອມສັງຄົມ ແລະ ທໍາມະຊາດ ​ທີ່​ອາດ​ຈະ​ເກີດຂຶ້ນ​ຈາກ​ໂຄງການ​ພັດທະນາ​ຕ່າງໆ ​ເປັນ​ຕົ້ນ​ໂຄງການ​ພັດທະນາ​ໄຟຟ້າ, ​ໂຄງການ​ຂຸດ​ຄົ້ນ​ແຮ່ທາດ, ​ໂຄງການ​ພັດທະນາ​ພື້ນຖານ​ໂຄງ​ລ່າງອື່ນໆ.

ຫຼັງຈາກນັ້ນ, ຄະນະຍັງໄດ້ເດີນທາງໄປເຂດພື້ນທີ່ຕົວຈິງບາງໂຄງການຂຸດຄົ້ນ ແລະ ປຸງແຕ່ງແຮ່ຄໍາ ຢູ່ເມືອງຄໍາ, ໂຄງການຂຸດຄົ້ນ ແລະ ປຸງແຕ່ງແຮ່ຫາຍາກ ຢູ່ເຂດບ້ານສວນມອນ, ໜອງໂອນ ແລະ ຍອດລ້ຽງ ແລະ ໄດ້ລົງຢ້ຽມຢາມໂຮງງານປະສົມນໍ້າມັນຂອງບໍລິສັດ ຍອດງື່ມ ພາວເວີ ຈໍາກັດ.

ໃນໄລຍະຄະນະລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານຢູ່ແຂວງຊຽງຂວາງໃນຄັ້ງນີ້, ທ່ານປະທານ ກສຕສ ໃນນາມຫົວໜ້າຄະນະ ໄດ້ມອບຄອມພິວເຕີທີ່ໄດ້ຮັບການຊ່ວຍເຫຼືອຈາກຄະນະກອງທຶນຊ່ວຍເຫຼືອສັງຄົມ ຂອງສະພາແຫ່ງຊາດ ໃຫ້ແກ່ສະພາປະຊາຊົນແຂວງຊຽງຂວາງ ຈໍານວນ 1 ຊຸດ ເພື່ອປະກອບສ່ວນເຂົ້າໃນວຽກງານໃຫ້ມີຄວາມສະດວກຂຶ້ນຕື່ມ.