ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​(ສພຊ) ໂດຍໄດ້ຮັບການສະໜັບສະໜູນຈາກອົງການເຮວວີຕັດ (HELVETAS LAOS) ໃນໂຄງການກ້າວໄປພ້ອມກັນ (you go project) ວັນທີ 26 ກຸມພາ 2022, ທີ່ເມືອງວັງວຽງ ແຂວງວຽງຈັນ ກຳມາທິການວຽກງານສະມາຊິກສະພາແຫ່ງຊາດ (ກວສຊ) ໄດ້ຈັດກອງປະຊຸມສຳມະນາກ່ຽວກັບການປະກອບຄຳເຫັນໃສ່ຮ່າງມະຕິ ຂອງຄະນະປະຈຳສະພາແຫ່ງຊາດ ໂດຍການເປັນປະທານຂອງທ່ານ ສຸບັນ ສະວະບຸດ ປະທານກວສຊ; ເຂົ້າຮ່ວມມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ ຜູ້ຊີ້ນຳ ກວສຊ; ມີຮອງປະທານ ກວສຊ,  ກຳມະການ ກວສຊ ໃນທົ່ວປະເທດ, ພະນັກງານ-ລັດຖະກອນ ແລະ ແຂກຖືກເຊີນເຂົ້າຮ່ວມ.

ທັງນີ້, ເພື່ອເປັນການເຜີຍແຜ່ນິຕິກຳທີ່ສຳຄັນ ຂອງຄະນະປະຈຳສະພາແຫ່ງຊາດ ພ້ອມທັງເປັນການສືບຕໍ່ທາບທາມ 2 ຮ່າງນິຕິກຳ ຂອງຄະນະປະຈຳສະພາແຫ່ງຊາດ ຄັ້ງທີ 2 ພາຍຫລັງທີ່ໄດ້ປັບປຸງຕາມຄຳຄິດຄຳເຫັນຂອງຄະນະປະຈຳສະພາແຫ່ງຊາດ ແລະ ສະມາຊິກສະພາແຫ່ງຊາດບາງແຂວງ ເຊິ່ງໄດ້ຈັດທາບທາມຄຳຄິດຄຳເຫັນຢູ່ແຂວງບໍລິຄຳໄຊມາຄັ້ງໜຶ່ງແລ້ວ ແລະ ເປັນການປຶກສາຫາລື ແລະ ແນະນຳວິທີການເຄື່ອນໄຫວວຽກງານ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະພາປະຊາຊົນແຂວງ.

ທ່ານ ຄຳໃບ ດຳລັດ ໄດ້ມີຄຳເຫັນໂອ້ລົມ ແລະ ຕີລາຄາສູງ ພ້ອມທັງເນັ້ນໜັກໃຫ້ສືບຕໍ່ຄົ້ນຄວ້າປັບປຸງ 2 ຮ່າງມະຕິແລ້ວລາຍງານໃຫ້ຄະນະປະຈຳສະພາແຫ່ງຊາດຮັບຊາບ, ເພີ່ມທະວີການເຊື່ອມຊຶມ, ກຳແໜ້ນ ແນວທາງນະໂຍບາຍຂອງພັກ ໂດຍສະເພາະມະຕິກອງປະຊຸມໃຫຍ່ຄັ້ງທີ XI ຂອງພັກ, ບັນດາກົດໝາຍ, ນິຕິກຳຕ່າງໆຂອງລັດ; ເອົາໃຈໃສ່ວຽກງານຄຸ້ມຄອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ລວມທັງການປັບປຸງກົງຈັກຊ່ວຍວກຢູ່ສະພາປະຊາຊົນແຂວງ ກໍຄືຂັ້ນເມືອງ; ເພີ່ມທະວີການປະສານສົມທົບກັບພາກສ່ວນທີ່ກ່ຽວຂ້ອງ ເພື່ອຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ກະກຽມປັບປຸງກົດໝາຍທີ່ພົວພັນກັບການເລືອກຕັ້ງ ກໍຄືການເຄື່ອນໄຫວຂອງສະພາແຫ່ງຊາດ ແລະ ສະພາປະຊາຊົນແຂວງ ແລະ ເອົາໃຈໃສ່ປັບປຸງແບບແຜນວິທີເຮັດວຽກ ໂດຍສະເພາກົນໄກການປະສານງານ ລະຫວ່າງຄະນະກຳມາທິການ ແລະ ບັນດາກຳມະການຂອງຕົນ, ລະບົບການລາຍງານສ່ອງແສງຂອງກຳມະການ ຕໍ່ຄະນະກຳມາທິການ, ການປະສານງານລະຫວ່າງກຳມາທິການ ກັບພາກສ່ວນຕ່າງໆ.

(ພາບ ແລະ ຂ່າວ: ອາລິນ ສຸພິມມະປະດິດ)