ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ລະຫວ່າງວັນທີ 24-25 ກຸມພາ 2022 ທີ່ມືອງວັງວຽງແຂວງວຽງຈັນ, ກຳມາທິການວັດທະນະທຳສັງຄົມ (ກວທສ) ໄດ້ສຳເລັດກອງປະຊຸມເຝິກອົບຮົມຍົກລະດັບຄວາມສາມາດໃຫ້ແກ່ສະມາຊິກສະພາແຫ່ງຊາດ (ສສຊ) ແລະ ພະນັກງານລັດຖະກອນ ທີ່ສັງກັດ ກວທສ ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ປະທານ ກວທສ; ເຂົ້າຮ່ວມມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ ທັງເປັນຜູ້ຊີ້ນຳ ກວທສ,  ມີບັນດາທ່ານຮອງປະທານ ກວທສ; ສສຊ ທີ່ສັງກັດ ກວທສແລະ ພະນັກງານວິຊາການທີ່ກ່ຽວຂ້ອງ.

ທັງນີ້ ເພື່ອສ້າງຄວາມເຂັ້ມແຂງທາງດ້ານວິຊາການ ໃຫ້ ສສຊ  ທີ່ເປັນກໍາມະການຂອງກໍາມາທິການ ແລະ ພະນັກງານລັດຖະກອນ ທີ່ສັງກັດກວທສ ໂດຍສະເພາະແມ່ນບັນດາ ສສຊ ທີ່ເປັນກໍາມະການຂອງ ກວທສໂດຍສ່ວນໃຫຍ່ແມ່ນສະມາຊິກໃໝ່; ເພື່ອຍົກລະດັບຄວາມຮູ້ຄວາມສາມາດ, ປະສົບການ ແລະ ຄວາມເຂົ້າໃຈ ທາງດ້ານທິດສະດີ ແລະ ພຶດຕິກຳໃນການຈັດຕັ້ງປະຕິບັດວຽກງານຕົວຈິງໃຫ້ ສສຊ ໃນການປະຕິບັດ 3 ພາລະບົດບາດຂອງສະພາແຫ່ງຊາດໃຫ້ສູງຂຶ້ນເທື່ອລະກ້າວ.

ກອງປະຊຸ, ໄດ້ຮັບຟັງທັກສະ ແລະ ບົດຮຽນໃນການສ້າງກົດໝາຍ, ການປະເມີນການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍ; ການຍົກສູງການຈັດຕັ້ງປະຕິບັດພາລະບົດບາດດ້ານການຕົລົງບັນຫາສໍາຄັນພື້ນຖານຂອງປະເທດຊາດ; ການຈັດຕັ້ງປະຕິບັດພາລະບົດບາດດ້ານນິຕິບັນຍັດ ແລະ ການຈັດຕັ້ງປະຕິບັດພາລະບົດບາດດ້ານການຕິດຕາມກວດກາ.

ທ່ານ ຄຳໃບ ດຳລັດ ໄດ້ມີຄຳເຫັນໂອ້ລົມວ່າ: ກອງປະຊຸມເຝິກອົບຮົມຄັ້ງນີ້ ມີຄວາມໝາຍສໍາຄັນຫລາຍ ເຊິ່ງເປັນການຍົກຂີດຄວາມສາມາດໃຫ້ແກ່ບັນດາທ່ານ ສສຊ ທີ່ສັງກັດ ກວທສ ແລະ ພະນັກງານລັດຖະກອນພາຍໃນ ກວທສ ໃນການຈັດຕັ້ງປະຕິບັດພາລະບົດບາດ, ສິດໜ້າທີ່ຂອງຕົນກໍຄືການເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ.

(ພາບ ແລະ ຂ່າວ: ນາງ ນິດຕາ ຄຸນປາກດີ)