ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໂດຍສືບຕໍ່ທິດຊີ້ນໍາຂອງກອງປະຊຸມຄະນະປະຈໍາສະພາແຫ່ງຊາດ ເພື່ອຮັບປະກັນໃຫ້ເນື້ອໃນການປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ ມີເນື້ອໃນຮັດກຸມ, ຄົບຖ້ວນ, ສົມບູນ, ມີປະສິດທິພາບ, ປະສິດທິຜົນ, ຖືກ ຕ້ອງຕາມຫລັກວິທະຍາສາດ ຂອງການສ້າງກົດໝາຍ, ສໍາເລັດຕາມແຜນການດຳເນີນງານຂອງຄະນະຮັບຜິດຊອບປັບປຸງກົດໝາຍ ແລະ ເປັນການກະກຽມຄວາມພ້ອມຮອບດ້ານ ກ່ອນນຳເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX; ໃນວັນທີ 8 ພຶດສະພາ 2022 ທີ່ເມືອງແກ້ວອຸດົມ ແຂວງວຽງຈັນ, ກໍາມາທິການຍຸຕິທໍາ (ກມຍທ) ສະພາແຫ່ງຊາດ ໄດ້ຈັດກອງປະຊຸມກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍການແກ້ໄຂຄຳຮ້ອງທຸກ (ສະບັບປັບປຸງ) ໂດຍການເປັນປະທານຂອງທ່ານ ຄໍາແພງ ວິລະພັນ ປະທານກໍາມາທິການຍຸຕິທໍາສະພາແຫ່ງຊາດ; ມີບັນດາທ່ານຄະນະຮັບຜິດຊອບປັບປຸງກົດໝາຍ, ຮອງປະທານກໍາມາທິການ, ຮອງລັດຖະມົນຕີ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ສູນກາງແນວລາວສ້າງຊາດ, ສູນກາງຊາວໜຸ່ມປະຊາຊົນປະຕິວັດລາວ, ຄະນະບໍລິຫານງານສູນກາງກໍາມະບານລາວ, ສະຫະພັນນັກຮົບເກົ່າລາວ, ສະຫະພັນແມ່ຍິງ, ບັນດາທ່ານອະດີດການນໍາ ແລະ ອົງການຕ່າງໆອ້ອມຂ້າງສູນກາງ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ແຂກທີ່ຖືກເຊີນເຂົ້າຮ່ວມ.
ທັງນີ້, ເພື່ອປະກັນໃຫ້ແກ່ການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ໄດ້ດຳເນີນໄປຕາມຂັ້ນຕອນຂອງການປັບປຸງກົດໝາຍ ຕາມທີ່ໄດ້ກໍານົດໄວ້ໃນກົດໝາຍວ່າດ້ວຍການສ້າງນິຕິກໍາ, ພ້ອມທັງຮັບປະກັນໃຫ້ເນື້ອໃນຂອງກົດໝາຍມີຄວາມຄົບຖ້ວນ, ສົມບູນ ແລະ ສອດຄ່ອງກັບແນວທາງນະໂຍບາຍຂອງພັກ-ລັດ ໃນການຄຸ້ມຄອງເສດຖະກິດ-ສັງຄົມ ຕາມກົດໝາຍ ແລະ ສອດຄ່ອງກັບພາລະບົດບາດ, ສິດ ແລະ ໜ້າທີ່ຂອງບັນດາອົງການລັດທີ່ຮັບຜິດຊອບໃນການຮັບ ແລະ ແກ້ໄຂຄໍາຮ້ອງທຸກ ຕາມເນື້ອໃນຈິດໃຈ ມະຕິຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ວ່າດ້ວຍການຄຸ້ມຄອງລັດ ຄຸ້ມຄອງສັງຄົມ ດ້ວຍກົດໝາຍ ສະບັບເລກທີ 037/ຄບສພ, ລົງວັນທີ 8 ມິຖຸນາ 2018 ແລະ ມະຕິກົມການເມືອງສູນກາງພັກ ວ່າດ້ວຍການຍົກສູງຄຸນນະພາບການດໍາເນີນຄະດີຕາມຂະບວນການຍຸຕິທໍາ ສະບັບເລກທີ 112/ກມສພ, ລົງວັນທີ 02 ມິຖຸນາ 2020 ທັງເພື່ອຮັບປະກັນໃຫ້ການຄົ້ນຄວ້າ ແລະ ກະກຽມຄວາມພ້ອມຮອບດ້ານທາງດ້ານເນື້ອໃນການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ, ພາຍຫລັງການຊີ້ນຳຂອງກອງປະຊຸມຄະນະປະຈໍາສະພາແຫ່ງຊາດ ໃຫ້ມີເນື້ອໃນຮັດກຸມ, ຄົບຖ້ວນ, ສົມບູນ ແລະ ມີຄວາມພ້ອມ ກ່ອນນຳເຂົ້າພິຈາລະນາໃນກອງປະຊຸມສະພາແຫ່ງຊາດ.
ກອງປະຊຸມ ໄດ້ຮັບຟັງການນໍາສະເໜີເນື້ອໃນການຄົ້ນຄວ້າປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ; ຈາກນັ້ນ, ປະທານກອງປະຊຸມ ໄດ້ໃຫ້ທິດຊີ້ນໍາໃນການຄົ້ນຄວ້າ ແລະ ກວດກາເນື້ອໃນຮ່າງກົດໝາຍວ່າດ້ວຍການແກ້ໄຂຄຳຮ້ອງທຸກ; ບັນດາຜູ້ເຂົ້າຮ່ວມໄດ້ພ້ອມກັນຄົ້ນຄວ້າ ແລະ ກວດກາເນື້ອໃນການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ (ພາກທີ I ແລະ ພາກທີ II); (ພາກທີ III ໝວດທີ 1, 2, 3 ແລະ 4) ແລະ (ພາກທີ IV, V, VI, VII ແລະ VIII).
ໃນພິທີ, ທ່ານ ຄໍາແພງ ວິລະພັນ ໄດ້ກ່າວວ່າ: ກອງປະຊຸມຄັ້ງນີ້ ຈະໄດ້ພ້ອມກັນຄົ້ນຄວ້າ, ປຶກສາຫາລື ແລະ ກວດກາເນື້ອໃນຕ່າງໆ ຢ່າງຮອບດ້ານ ໃຫ້ມີຄວາມເປັນເອກະພາບ ເພື່ອເຮັດໃຫ້ເນື້ອໃນຂອງກົດໝາຍວ່າດ້ວຍການແກ້ໄຂຄໍາຮ້ອງທຸກ ມີເນື້ອຈະແຈ້ງ, ຮັດກຸມ ແລະ ແທດເໝາະກັບສະພາບຕົວຈິງຂອງການພັດທະນາເສດຖະກິດ-ສັງຄົມ ໃນປັດຈຸບັນ, ຮັບປະກັນໃຫ້ການກໍານົດພາລະບົດບາດ, ສິດ ແລະ ໜ້າທີ່ຂອງບັນດາອົງການ ທີ່ຮັບຜິດຊອບໃນການແກ້ໄຂຄໍາຮ້ອງທຸກ ມີຄວາມສອດຄ່ອງ, ບໍ່ເຮັດໜ້າທີ່ແທນກັນ ແລະ ບໍ່ກ້າວກ່າຍກັນ, ແນໃສ່ເຮັດໃຫ້ການປະຕິບັດລັດຖະທໍາມະນູນ ແລະ ກົດໝາຍ ມີຜົນສັກສິດ, ໂປ່ງໃສ ແລະ ຍຸຕິທໍາ ໃນສັງຄົມ ກອງປະຊຸມແມ່ນຈະພ້ອມກັນສຸມໃສ່ກວດກາເນື້ອໃນທັງໝົດ VIII ພາກ 53 ມາດຕາ ເຊິ່ງການຈັດຕັ້ງປະຕິບັດຂອງກອງປະຊຸມ ແມ່ນຈະປະກອບຄຳເຫັນໃສ່ແຕ່ລະມາດຕາເປັນການລະອຽດ; ພ້ອມນັ້ນ, ທ່ານຍັງໄດ້ຮຽກຮ້ອງມາຍັງບັນດາຜູ້ເຂົ້າຮ່ວມ ຈົ່ງໄດ້ສຸມສະຕິປັນຍາ ເຂົ້າໃນການຄົ້ນຄວ້າປະກອບຄໍາຄິດເຫັນຕໍ່ບັນດາເນື້ອໃນ ດ້ວຍຄວາມຮັບຜິດຊອບ ເພື່ອເຮັດໃຫ້ກົດໝາຍດັ່ງກ່າວ ມີເນື້ອໃນຄົບຖ້ວນ, ຮອບດ້ານ, ລະອຽດ, ຈະແຈ້ງ ແລະ ຖືກຕ້ອງກັບສະພາບຕົວຈິງ ຂອງການພັດທະນາເສດຖະກິດ-ສັງຄົມ ແລະ ການປົກຄອງໃນປັດຈຸບັນ ແລະ ອະນາຄົດ.
ກອງປະຊຸມດັ່ງກ່າວ, ໄດ້ຮັບການສະໜັບສະໜູນຈາກແຜນງານເຊກາ (CEGA) ແລະ ຈະດໍາເນີນໄປຈົນເຖິງວັນທີ 10 ພຶດສະພາ 2022 ຈຶ່ງຈະສໍາເລັດ.
(ພາບ ແລະ ຂ່າວ: ສຸພາວັນ ຫອມສະນິດ)