ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

         (ສພຊ) ເພື່ອຮັບປະກັນໃຫ້ເນື້ອໃນຂອງຮ່າງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ທີ່ຈະນໍາເຂົ້າພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ມີຄວາມກຽມ ພ້ອມທາງດ້ານເນື້ອໃນທີ່ແນ່ນອນ ແລະ ສອດຄ່ອງກັບລັດຖະທຳມະນູນ, ກົດໝາຍ ແລະ ການຈັດຕັ້ງປະຕິບັດວຽກງານຕົວ ຈິງໃນປັດຈຸບັນ.

ໂດຍປະຕິບັດຕາມກົດໝາຍວ່າດ້ວຍການສ້າງນິຕິກຳ ສະບັບເລກທີ 06/ສພຊ, ລົງວັນທີ 16 ພະຈິກ 2021 ມາດຕາ 52 ແລະ 53 ກ່ຽວກັບການມອບສິດໃຫ້ກວດກາຮ່າງກົດໝາຍ ແລະ ເນື້ອໃນຂອງການກວດກາຮ່າງກົດໝາຍ ເມື່ອກົດໝາຍ ສະເໜີຫາຄະນະປະຈຳສະພາແຫ່ງຊາດແລ້ວ, ກໍາມາທິການກົດໝາຍ, ກໍາມາທິການແຜນການ, ການເງິນ ແລະ ການ ກວດສອບ ປະສານສົມທົບກັບ ທະນາຄານແຫ່ງ ສປປລາວ ແລະ ພາກສ່ວນທີ່ກ່ຽວຂ້ອງ ຈຶ່ງໄດ້ຈັດກອງປະຊຸມກວດກາເນື້ອ ໃນຮອບດ້ານຂອງຮ່າງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ທີ່ເມືອງວັງວຽງ ແຂວງວຽງຈັນ ໃນລະຫວ່າງ ວັນທີ 23-24 ເມສານີ້ ໂດຍການເປັນປະທານຂອງທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກ ຮອງປະ ທານສະພາແຫ່ງຊາດ, ເຂົ້າຮ່ວມມີທ່ານ ປະທານ-ຮອງປະທານກຳມາທິການແຜນການ, ການເງິນ ແລະ ການກວດສອບ, ຮອງປະທານກຳມາທິການກົດໝາຍ, ຮອງຜູ້ວ່າການທະນາຄານ ແຫ່ງ ສປປລາວ, ຮອງລັດຖະມົນຕີກະຊວງຍຸຕິທຳ, ທີ່ປຶກ ສາດ້ານກົດ ໝາຍຂອງຄະນະປະຈໍາສະພາແຫ່ງຊາດ, ຫົວໜ້າກົມກົດໝາຍ ກະຊວງຍຸຕິທຳ, ຫົວໜ້າກົມນິຕິກຳ ຫ້ອງວ່າ ການສຳນັກງານນາຍົກລັດຖະມົນຕີ, ຫົວໜ້າກົມກົດໝາຍ ຫ້ອງວ່າການສຳນັກງານປະທານປະເທດ, ຫົວໜ້າກົມກົດ ໝາຍສະພາແຫ່ງຊາດ, ຫົວໜ້າກົມການເງິນ, ການທະນາຄານ ແລະ ການກວດສອບສະພາແຫ່ງຊາດ ແລະ ພາກສ່ວນທີ່ ກ່ຽວຂ້ອງ.
ກອງປະຊຸມໄດ້ພ້ອມກັນຄົ້ນຄວ້າ, ປະກອບຄຳເຫັນຢ່າງກົງໄປກົງມາ ໂດຍມີການປັບປຸງຕໍ່ເນື້ອໃນຂອງຫລາຍມາດ ຕາ ເພື່ອເຮັດໃຫ້ມີຄວາມຄົບຖ້ວນ, ຮັດກຸມ ເພື່ອລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ໃນທ້າຍເດືອນເມສາ ນີ້ ແລະ ສາມາດນຳເຂົ້າພິຈາລະຮັບຮອງໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ຢ່າງມີປະ ສິດທິຜົນ.

ໂອກາດດັ່ງກ່າວ ທ່ານ ນາງ ສູນທອນ ໄຊຍະຈັກ ໄດ້ມີຄໍາເຫັນກ່າວເປີດກອງປະຊຸມວ່າ: ການສ້າງ ແລະ ປັບປຸງກົດໝາຍ ເປັນວຽກງານໜຶ່ງທີ່ສຳຄັນຂອງສະພາແຫ່ງຊາດ ຕາມ 3 ພາລະບົດບາດ ຂອງສະພາແຫ່ງຊາດ, ສະ ນັ້ນ ການຈັດກອງປະຊຸມໃນຄັ້ງນີ້ ຈຶ່ງມີຄວາມໝາຍສຳຄັນຫລາຍ ເພາະຈະເປັນການຄົ້ນຄວ້າເນື້ອໃນຂອງຮ່າງກົດ ໝາຍຢ່າງລະອຽດ, ຮອບດ້ານ ແນໃສ່ເຮັດໃຫ້ຮ່າງກົດໝາຍມີເນື້ອໃນທີ່ຄົບຖ້ວນ, ຮັດກຸມ ແລະ ສາມາດນຳເຂົ້າພິຈາລະ ນາຮັບຮອງເອົາໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ທີ່ຈະໄຂຂຶ້ນໃນເດືອນມິຖຸນານີ້. ສະນັ້ນ ຂໍຮຽກຮ້ອງມາຍັງຄະນະຮັບຜິດຊອບປັບປຸງຮ່າງກົດໝາຍ ແລະ ບັນດາທ່ານທີ່ເຂົ້າຮ່ວມກອງປະຊຸມ ຈົ່ງພ້ອມ ກັນສຸມສະຕິປັນຍາໃນການຄົ້ນຄວ້າ, ຄິດຫງໍາ ໂດຍລົງເລິກບັນຫາທີ່ພົວພັນກັບຄວາມຮັບຜິດຊອບຂອງຕົນ ເພື່ອເຮັດໃຫ້ ເນື້ອໃນຂອງກົດໝາຍ ມີຄວາມສອດຄ່ອງກັບລັດຖະທຳມະນູນ, ກົດໝາຍອື່ນທີ່ປະກາດໃຊ້ແລ້ວ, ສົນທິສັນຍາ, ສັນຍາ ສາກົນທີ່ກ່ຽວຂ້ອງ ແລະ ການຈັດຕັ້ງປະຕິບັດຕົວຈິງ, ພາຍຫລັງສຳເລັດກອງປະຊຸມຄັ້ງນີ້ ແມ່ນ ຈະໄດ້ລາຍງານຜົນ ການກວດກາເນື້ອໃນຮອບດ້ານຂອງຮ່າງກົດໝາຍ ຕໍ່ກອງປະຊຸມຄະນະປະຈຳສະພາແຫ່ງຊາດ ມີຄຳເຫັນຊີ້ນຳ.

(ກົມກົດໝາຍ, ກໍາມາທິການກົດໝາຍ ສະພາແຫ່ງຊາດ)