(ສພຊ) ໃນລະຫວ່າງວັນທີ 22-28 ມັງກອນ 2024 ຄະນະຜູ້ແທນກໍາມາທິການແຜນການ, ການເງິນ ແລະ ການກວດສອບ (ກຜງສ) ນໍາໂດຍສະຫາຍ ປອ. ລີເບີ ລີບົວປາວ ກໍາມະການສູນກາງພັກ, ຄະນະປະຈໍາສະພາແຫ່ງຊາດ, ປະທານ ກຜງສ ພ້ອມດ້ວຍຄະນະ ໄດ້ໄປທັດສະນະສຶກສາ ແລະ ແລກປ່ຽນບົດຮຽນ ຢູ່ ສສ.ຫວຽດນາມ ກັບກໍາມາທິການການເງິນ ແລະ ງົບປະມານ; ກໍາມາທິການເສດຖະກິດ; ສະພາປະຊາຊົນ, ຄະນະກໍາມະການປະຊາຊົນ ແຂວງເຫງະອານ ແລະ ແຂວງຮ່າຕິງ ກ່ຽວກັບການສ້າງ ແລະ ປັບປຸງກົດໝາຍ, ການພິຈາລະນາຮັບຮອງແຜນການລົງທຶນຂອງລັດ, ການຕິດຕາມກວດກາວຽກງານໃນຂົງເຂດການເງິນ, ເງິນຕາ, ກວດສອບ ແລະ ກວດກາ.

ໃນໂອກາດດັ່ງກ່າວ, ຄະນະໄດ້ພົບປະສອງຝ່າຍກັບສະຫາຍ ເລ ກວາງ ແໝ້ງ (Lê Quang Mạnh) ກໍາມະການສູນກາງພັກ, ຄະນະປະຈໍາສະພາແຫ່ງຊາດ, ປະທານກໍາມາທິການການເງິນ ແລະ ງົບປະມານ ເຊິ່ງທັງສອງຝ່າຍໄດ້ແລກ ປ່ຽນບົດຮຽນ ແລະ ລາຍງານໂດຍຫຍໍ້ສະພາບພົ້ນເດັ່ນຂອງການພັດທະນາເສດຖະກິດ-ສັງຄົມ ຂອງ ສປປລາວ ແລະ ສສ.ຫວຽດນາມ ລວມທັງແລກປ່ຽນຢ່າງກົງໄປກົງມາກ່ຽວກັບພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ ກໍຄືຂອງກໍາມາທິການ ເປັນຕົ້ນການພິຈາລະນາຮັບຮອງ ແລະ ການຕິດຕາມກວດກາແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ, ການຈັດສັນງົບປະມານໂຄງການລົງທຶນຂອງລັດ, ການແກ້ໄຂຄໍາຮ້ອງ ແລະ ຄໍາສະເໜີຂອງປະຊາຊົນ, ການສ້າງ ແລະ ປັບປຸງກົດໝາຍ ໃນຂົງເຂດຄວາມຮັບຜິດຊອບ ແລະ ການຮ່ວມມືໃນຕໍ່ໜ້າ.

ນອກຈາກນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ລົງເຄື່ອນໄຫວຢ້ຽມຢາມພື້ນຖານເສດຖະກິດຂອງແຂວງເຫງະອານ ແລະ ຮ່າຕິງ ເປັນຕົ້ນເຂດພັດທະນາອຸດສາຫະກໍາ WHA, ເຂດພັດທະນາອຸດສາຫະກໍາ ຫວຽດນາມ-ສິງກະ ໂປ (VSIP), ໂຮງງານຫຼອມເຫຼັກ FORMOSA, ໂຮງງານຜະລິດໝໍ້ໄຟລົດໄຟຟ້າ, ທ່າເຮືອສາກົນ ລາວ-ຫວຽດ ວຸງອ່າງ ລວມທັງຢ້ຽມຊົມສະຖານທີ່ສໍາຄັນ ແລະ ຮ່ອງຮອຍປະຫວັດສາດການປະຕິວັດຂອງສອງແຂວງດັ່ງກ່າວ.