ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 9 ກຸມພາ 2022 ທີ່ສະພາແຫ່ງຊາດ, ກໍາມາທິການປ້ອງກັນຊາດປ້ອງກັນຄວາມສະຫງົບ (ຊສ) ໄດ້ຈັດກອງປະຊຸມສະຫລຸບຖອດຖອບົດຮຽນວຽກງານປະສານງານລະຫວ່າງ ຊສ ຂອງສະພາແຫ່ງຊາດ ກັບກະຊວງປ້ອງກັນປະເທດກະຊວງປ້ອງກັນຄວາມສະຫງົບແລະ ສະຫະພັນນັກຮົບເກົ່າ ໃນ 5 ປີຜ່ານມາ (2016-2020) ແລະ ພິທີລົງນາມຂໍ້ຕົກລົງຮ່ວມວ່າດ້ວຍການປະສານງານ 5 ປີຕໍ່ໜ້າ (2021-2025) ໂດຍການເປັນປະທານຮ່ວມຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແລະ ທ່ານ ພົອ. ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ; ມີບັນດາທ່ານປະທານຮອງປະທານກໍາມາທິການຂອງສະພາແຫ່ງຊາດ, ເລຂາທິການສະພາແຫ່ງຊາດ, ຮອງລັດຖະມົນຕີກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ນາຍ ແລະ ພົນທະຫານ, ນາຍ ແລະ ພົນຕໍາຫລວດ ແລະແຂກຖືກເຊີນເຂົ້າຮ່ວມ.

ກອງປະຊຸມ ໄດ້ຮັບຟັງການຕີລາຄາໂດຍສັງເຂບກ່ຽວກັບການເຄື່ອນໄຫວປະສານງານໄລຍະ 5 ປີ (2016-2020) ແລະ ກໍານົດທິດທາງແຜນການ 5 ປີ ຕໍ່ໜ້າ (2021-2025); ການປະກອບຄໍາເຫັນຂອງປະທານກປຊສ; ຫົໜ້າຄະນະປະສານງານກະຊວງປ້ອງກັນປະເທດ; ຫົວໜ້າຄະນະປະສານງານກະຊວງປ້ອງກັນຄວາມສະຫງົບ; ຫົວໜ້າຄະນະປະສານງານສະຫະພັນນັກຮົບເກົ່າແຫ່ງຊາດ ແລະ ບັນດາທ່ານຜູ້ແທນກອງປະຊຸມ.

ໂອກາດດັ່ງກ່າວ, ທ່ານປະທານສະພາແຫ່ງຊາດ ໄດ້ມີຄໍາເຫັນໂອ້ລົມຕໍ່ກອງປະຊຸມໂດຍທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ຄະນະປະສານງານຍາດມາໄດ້ ແລະ ໄດ້ສະເໜີໃຫ້​ແຕ່​ລະ​ພາກສ່ວນ ນຳ​ໄປ​ຄົ້ນ​ຄ້ວາ ​ແລະ ​ເປັນ​ບ່ອນ​ອີງ​ໃນ​ການຈັດ​ຕັ້ງວຽກງານປະສານ​ງານໃຫ້ໄດ້ດີ​ ​ແລະ ມີ​ປະສິດທິ​ຜົນ​ສູງ.

ຈາກນັ້ນ, ໄດ້ມີພິທີລົງນາມຂໍ້ຕົກລົງຮ່ວມວ່າດ້ວຍການປະສານງານ 5 ປີຕໍ່ໜ້າ (2021-2025) ລະຫວ່າງ ກປຊສ ຂອງສະພາແຫ່ງຊາດ ກັບຄະນະປະສານງານກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບແລະ ສະຫະພັນນັກຮົບເກົ່າແຫ່ງຊາດ ໂດຍການເຂົ້າຮ່ວມເປັນສັກຂີພະຍານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດແລະ ທ່ານ ພົ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ຜູ້ຊີ້ນໍາວຽກງານ ປກຊປກສ ແລະສະຫະພັນນັກຮົບເກົ່າແຫ່ງຊາດ.

(ພາບ ແລະ ຂ່າວ: ສອນສັກ ວັນວິໄຊ)