ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ລະຫວ່າງວັນທີ 17-18 ທັນວາ 2021 ກຳມາທິການການຕ່າງປະເທດ (ກຕທ) ສະພາແຫ່ງຊາດ ໄດ້ຈັດກອງປະຊຸມເຝິກອົບຮົມຍົກສູງຂີດຄວາມສາມາດ ໃນການປະຕິບັດໜ້າທີ່ວຽກງານຂອງກົມທີ່ເປັນເສນາທິການຮັບໃຊ້ໃຫ້ແກ່ວຽກງານຕ່າງປະເທດຂອງສະພາແຫ່ງຊາດ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສັນຍາ ປຣະເສີດ ປະທານ ກຕທ, ມີບັນດາທ່ານຮອງປະທານ ກຕທ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ, ພະນັກງານວິຊາການພາຍໃນ ກຕທ, ນັກວິທະຍາກອນ, ນັກສຳມະນາກອນທີ່ເປັນວິຊາການຈາກກົມ, ສູນພາຍໃນສະພາແຫ່ງຊາດ ແລະ ພະນັກງານວິຊາການຮັບຜິດຊອບວຽກງານການຕ່າງປະເທດສະພາແຂວງວຽງຈັນເຂົ້າຮ່ວມ.

ຈຸດປະສົງຂອງການຈັດກອງປະຊຸມຄັ້ງນີ້ ເພື່ອເປັນການເຜີຍແຜ່ກ່ຽວກັບບັນດານິຕິກຳ ແລະ ລະບຽບການຕ່າງໆ ທີ່ກ່ຽວຂ້ອງກັບວຽກງານການຕ່າງປະເທດ ຂອງສະພາແຫ່ງຊາດ ໃຫ້ແກ່ພະນັກງານວິຊາການທີ່ຮັບຜິດຊອບວຽກງານດັ່ງກ່າວ ແລະ ເພື່ອຍົກລະດັບຄວາມຮູ້, ຄວາມສາມາດ ແລະ ຄວາມເຂົ້າໃຈໃຫ້ແກ່ພະນັກງານທີ່ຮັບໃຊ້ວຽກງານການຕ່າງປະເທດໃນການກວດສອບສອງຝ່າຍ ແລະ ຫລາຍຝ່າຍ.

            ກອງປະຊຸມ ໄດ້ຮັບຟັງການສະເໜີກ່ຽວກັບນະໂຍບາຍການຕ່າງປະເທດຂອງພັກ-ລັດຖະບານ ກ່ຽວກັບການພົວພັນຮ່ວມມື ລະຫວ່າງ ສປປລາວ ກັບຕ່າງປະເທດ; ເຜີຍແຜ່ມະຕິຄະນະປະຈຳສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ກຕທ; ເຜີຍແຜ່ຂໍ້ຕົກລົງຂອງຄະນະເລຂາທິການສະພາແຫ່ງຊາດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມພົວພັນລັດຖະສະພາສອງຝ່າຍ ແລະ ຂອງກົມລັດຖະສະພາຫລາຍຝ່າຍ; ການຍົກສູງຄຸນນະພາບການເປັນເສນາທິການທີ່ດີໃນການກະກຽມຕ້ອນຮັບຄະນະຜູ້ແທນຕ່າງປະເທດ ແລະ ການເຄື່ອນໄຫວຢ້ຽມຢາມຕ່າງປະເທດຂອງສະພາແຫ່ງຊາດລາວ; ການຮ່ວມມືລັດຖະສະພາພາກພື້ນ ແລະ ສາກົນ; ການກະກຽມດ້ານຕ່າງໆໃຫ້ແກ່ຄະນະຜູ້ແທນສະພາແຫ່ງຊາດລາວ ໃນການເຂົ້າຮ່ວມກອງປະຊຸມອົງການລັດຖະສະພາພາກພື້ນ ແລະ ສາກົນ; ການຄົ້ນຄວ້າໃຫ້ສັດຕະຍາບັນແກ່ສົນທິສັນຍາ ແລະ ສັນຍາສາກົນຂອງສະພາແຫ່ງຊາດຜ່ານລະບົບປະຕູດຽວ ແລະ ຜູ້ເຂົ້າຮ່ວມກອງປະຊຸມໄດ້ຜັດປ່ຽນປະກອບຄຳຄິດຄຳເຫັນໃສ່ບັນດາຫົວຂໍ້ທີ່ນຳມາສະເໜີໃນຄັ້ງນີ້ ນອກຈາກນັ້ນ, ນັກສຳມະນາກອນທີ່ເຂົ້າຮ່ວມທັງໝົດ ໄດ້ແບ່ງກຸ່ມອອກເປັນ 4 ກຸ່ມ ເພື່ອສົນທະນາ ແລະ ຄົ້ນຄວ້າກ່ຽວກັບຫົວຂໍ້ການຮ່າງເອກະສານຂອງກົມພົວພັນລັດຖະສະພາສອງຝ່າຍ ແລະ ຮ່າງເອກະສານຂອງກົມລັດຖະສະພາຫລາຍຝ່າຍ ແລະ ໃຫ້ຕາງໜ້າຂອງແຕ່ລະກຸ່ມຂຶ້ນນຳສະເໜີບົດຄົ້ນຄວ້າ.

ໂອກາດດັ່ງກ່າວ ທ່ານປະທານ ກຕທ ໄດ້ມີຄໍາເຫັນຕໍ່ພິທີເປີດວ່າ: ກອງປະຊຸມເຝິກອົບຮົມຄັ້ງນີ້ ແມ່ນດໍາເນີນໄປເປັນເວລາ 2 ວັນເຕັມ, ເມື່ອເບິ່ງເວລາທຽບໃສ່ກັບເນື້ອໃນທີ່ຍົກຂຶ້ນມາສົນທະນາແລກປ່ຽນ ເຫັນວ່າມີເວລາຈໍາກັດພໍສົມຄວນ, ແຕ່ເຖິງຢ່າງໃດກໍຕາມ ເພື່ອຮັບປະກັນທາງດ້ານເນື້ອໃນ ແລະ ເວລາສະເໜີໃຫ້ອາຈານວິທະຍາກອນເອົາໃຈໃສ່ລົງເລິກອະທິບາຍຊີ້ແຈງບາງບັນຫາທີ່ເຫັນວ່າມີຄວາມສໍາຄັນ ແລະ ຈໍາເປັນ ຕໍ່ນັກສໍາມະນາກອນ ເພື່ອໃຫ້ກໍາໄດ້ເນື້ອໃນທີ່ສຳຄັນ ແລະ ໃຫ້ມີເວລາໃນການສົນທະນາ, ແລກປ່ຽນບົດຮຽນ ແລະ ເຝິກຫັດເຮັດຕົວຈິງນຳກັນໃຫ້ຫລາຍໆ. ທັງນີ້ ກໍເພື່ອເຮັດໃຫ້ການຄົ້ນຄວ້າ, ການສັງລວມ, ການຂຽນເອກະສານສຳຄັນຕ່າງໆ ໃຫ້ມີປະສິດທິພາບປະສິດທິຜົນສູງ, ສາມາດຕອບສະໜອງໃຫ້ກັບຄວາມຮຽກຮ້ອງຕ້ອງການຂອງໜ້າທີ່ວຽກງານຕົວຈິງ ແລະ ເຊື່ອໝັ້ນວ່າ ບັນດານັກສຳມະນາກອນ ທີ່ມາເຂົ້າຮ່ວມກອງປະຊຸມຄັ້ງນີ້ ຈະໄດ້ສຸມຄວາມພະຍາຍາມ ແລະ ເອົາໃຈໃສ່ໃຊ້ເວລາທີ່ຈຳກັດ ໃຫ້ເປັນປະໂຫຍດສູງສຸດ ເພື່ອເກັບກຳ, ຮຽນຮູ້ ແລະ ແລກປ່ຽນບົດຮຽນເຊິ່ງກັນ ແລະ ກັນ, ປະກອບຄວາມຄິດຄວາມເຫັນ ແລະ ຊັກຖາມໃນບັນຫາຕ່າງໆ ທີ່ວິທະຍາກອນ ໄດ້ກະກຽມນໍາມາສະເໜີ ໃຫ້ມີຄວາມເຂົ້າໃຈ ຢ່າງເລິກເຊິ່ງ ແລະ ເຮັດໃຫ້ກອງປະຊຸມໄດ້ຮັບຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ພາຍຫລັງກັບໄປປະຕິບັດໜ້າທີ່ການເມືອງຂອງຕົນ ໃຫ້ສາມາດນຳເອົາຄວາມຮູ້ ແລະ ບົດຮຽນດັ່ງກ່າວ ໄປນໍາໃຊ້ ແລະ ປະຕິບັດໃຫ້ເກີດດອກອອກຜົນຕົວຈິງຫລາຍຂຶ້ນ.

(ສອນສັກວັນວິໄຊ)