​(ສພຊ) ໃນຕອນເຊົ້າມື້ນີ້, ທີ່ສະພາແຫ່ງຊາດ (ສພຊ) ກໍາມາທິການກົດໝາຍ (ກກໝ) ສະພາແຫ່ງຊາດ ໄດ້ຈັດກອງປະຊຸມສະຫລຸບຖອດຖອນບົດຮຽນ ກ່ຽວກັບການຈັດຕັ້ງປະຕິບັດວຽກງານສ້າງ ແລະ ປັບປຸງກົດໝາຍ ໂດຍການເປັນປະທານຂອງທ່ານ ຈະເລີນ ເຍຍປາວເຮີ ຮອງປະທານ ສພຊ ທັງເປັນປະທານ ກກໝ, ມີບັນດາທ່ານຮອງປະທານກໍາມາທິການຂອງສະພາແຫ່ງຊາດ, ຮອງລັດຖະມົນຕີກະຊວງ, ອົງການທີ່ກ່ຽວຂ້ອງ ແລະ ບັນດາຄະນະກົມຕະຫລອດຮອດພະນັກງານ-ລັດຖະກອນ ພ້ອມດ້ວຍແຂກຖືກເຊີນເຂົ້າຮ່ວມ.

             ​ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເປັນການສະຫລຸບຕີລາຄາ ແລະ ຖອດຖອນບົດຮຽນກ່ຽວກັບການສ້າງ ແລະ ປັບປຸງກົດໝາຍ ໃນໄລຍະຜ່ານມາ ແລະ ທິດທາງການແກ້ໄຂໃນຕໍ່ໜ້າ ເພື່ອເຮັດໃຫ້ການສ້າງ ແລະ ປັບປຸງກົດໝາຍ ມີຄວາມເປັນລະບົບ, ສະດວກ, ວ່ອງໄວ, ເອກະພາບກັນ ແລະ ຮັບປະກັນທາງດ້ານເນື້ອໃນຂອງກົດໝາຍ.

​            ກອງປະຊຸມໄດ້ຮັບຟັງການນໍາສະເໜີຮ່າງບົດສະຫລຸບຕີລາຄາ ກ່ຽວກັບການຈັດຕັ້ງປະຕິບັດການສ້າງ ແລະ ປັບປຸງກົດໝາຍໃນໄລຍະຜ່ານມາ, ແຜນການສ້າງ ແລະ ປັບປຸງກົດໝາຍປີ 2022; ການສະຫລຸບຜັນຂະຫາຍກົດໝາຍເປັນນິຕິກໍາໃຕ້ກົດໝາຍ ຈາກຮອງປະທານກໍາມາທິການກົດໝາຍ ແລະ ປຶກສາຫາລື ກ່ຽວກັບແຜນການສ້າງ ແລະ ປັບປຸງກົດໝາຍ ແຕ່ປີ 2023-2025.

(ພາບ ແລະ ຂ່າວ: ສອນສັກ ວັນວິໄຊ)