ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ພິທີເປີດນໍາໃຊ້ແອັບພິເຄຊັນ (Application) ຂອງສະພາແຫ່ງຊາດ ໄດ້ຈັດຂຶ້ນໃນຕອນເຊົ້າວັນທີ  17 ພະຈິກ 2021 ທີ່ຫໍສະພາແຫ່ງຊາດ ໂດຍການເຂົ້າຮ່ວມພິທີເປີດຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ມີບັນດາຮອງປະທານສະພາແຫ່ງຊາດ, ຄະນະເລຂາທິການສະພາແຫ່ງຊາດ, ບັນດາປະທານ-ຮອງປະທານຄະນະສະມາຊິກສະພາແຫ່ງຊາດ ປະຈໍາ 18 ເຂດເລືອກຕັ້ງ ພ້ອມດ້ວຍກົມສື່ມວນຊົນ ຄະນະເລຂາທິການສະພາແຫ່ງຊາດເຂົ້າຮ່ວມ.

ໃນພິທີ, ທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ໄດ້ຂຶ້ນກ່າວຈຸດປະສົງ ຂອງການເປີດນໍາໃຊ້ແອັບພິເຄຊັນ (Application) ຂອງສະພາແຫ່ງຊາດ ເຊິ່ງທ່ານກ່າວວ່າ:  ເພື່ອເປັນການໂຄສະນາ, ເຜີຍແຜ່ແນວທາງນະໂຍບາຍຂອງພັກ, ກົດໝາຍ ແລະ ແຜນພັດທະນາເສດຖະກິດ-ສັງຄົມຂອງລັດ ກໍຄືພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ເປັນຂົວຕໍ່ລະຫວ່າງປະຊາຊົນ ກັບສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ເພື່ອເປັນການສະໜອງຂໍ້ມູນ-ຂ່າວສານໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ປະຊາຊົນທີ່ຢູ່ເຂດເລືອກຕັ້ງຕ່າງໆໃນທົ່ວປະເທດ ໂດຍຜ່ານສື່ສັງຄົມອອນລາຍ ແບບສະດວກ ແລະ ວ່ອງໄວຂຶ້ນ ແລະ ເຂົ້າເຖິງປະຊາຊົນຢູ່ເຂດເລືອກຕັ້ງຕ່າງໆໃນທົ່ວປະເທດ ໂດຍຜ່ານສື່ທີ່ທັນສະໄໝ ແລະ ເຂົ້າເຖິງໄດ້ງ່າຍ ເຮັດໃຫ້ສື່ກາຍເປັນຊ່ອງທາງການສະແດງຄວາມຄິດເຫັນ ທັງເປັນການເສີມຂະຫຍາຍບົດບາດຕັ້ງໜ້າຂອງສື່ມວນຊົນ ແລະ ສິດເປັນເຈົ້າຂອງປະຊາຊົນໃນການປະຕິບັດໜ້າທີ່ການເມືອງຂອງຕົນ.

ການສ້າງຕັ້ງແອັບພິເຄຊັນ (Application) ແມ່ນ ສື່ເອເລັກໂຕຣນິກທີ່ທັນສະໄໝ ເປັນກະບອກສຽງຂອງສະພາແຫ່ງຊາດ ໃນການສະໜອງຂໍ້ມູນ-ຂ່າວສານ ກ່ຽວກັບວຽກງານຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ໃຫ້ແກ່ສັງຄົມໄດ້ຮັບຮູ້ ທັງເປັນການໂຄສະນາເຜີຍແຜ່ແນວທາງນະໂຍບາຍຂອງພັກ, ກົດໝາຍ ແລະ ການພັດທະນາເສດຖະກິດ-ສັງຄົມຂອງລັດ ໃນແຕ່ລະໄລຍະ.

(ກົງທະນູຄຳ ພິພັດເສລີ)