ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR
       (ສພຊ) ວັນທີ 16 ພະຈິກ 2021, ທ່ານ ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດລາວ ໄດ້ເຂົ້າຮ່ວມກອງປະຊຸມການເປັນຄູ່ຮ່ວມລັດຖະສະພາອາຊີ-ເອີຣົບ ຄັ້ງທີ 11 ທີ່ຣາຊະອານາຈັກກຳປູເຈຍ (ຮູບແບບທາງໄກ) ໃນຫົວຂໍ້ “ການແກ້ໄຂບັນຫານ້ຳ, ພະລັງງານ ຄວາມໝັ້ນຄົງທາງດ້ານສະບຽງອາຫານ ພາຍໃຕ້ການປ່ຽນແປງດິນຟ້າອາກາດ” ໂດຍການເປັນປະທານຂອງທ່ານ Suos Yara ຮອງປະທານກຳມາທິການຕ່າງປະເທດ, ການຮ່ວມມືສາກົນ, ຂໍ້ມູນຂ່າວສານ ແລະ ສື່ ຂອງສະພາແຫ່ງຣາຊະອານາຈັກກຳປູເຈຍ; ໂດຍມີ 11 ປະເທດ ເຂົ້າຮ່ວມ.
      ​ ທັງນີ້ ກໍເພື່ອເປັນການປຶກສາຫາລື ແລະ ແລກປ່ຽນຄວາມຄິດຄວາມເຫັນ ຕໍ່ກັບບັນຫາໄພພິບັດທາງທຳມະຊາດຕ່າງໆ ເຊັ່ນ: ອຸທົກກະໄພ, ແຜ່ນດິນໄຫວ…. ທີ່ສົ່ງຜົນສະທ້ອນໂດຍກົງຕໍ່ຄວາມຍືນຍົງຂອງນ້ຳ, ຄວາມໝັ້ນຄົງດ້ານພະລັງງານ ແລະ ສະບຽງອາຫານ ທັງເປັນການຮັບປະກັນຕໍ່ບັນຫາດັ່ງກ່າວ ທີ່ເປັນບັນຫາໃຫຍ່ ແລະ ເປັນບັນຫາພື້ນຖານຂອງບັນດາປະຊາຊາດໃນໂລກ ໂດຍສະເພາະປະເທດກຳລັງພັດທະນາ ແມ່ນເປັນປັດໄຈສຳຄັນເພື່ອບັນລຸຄວາມວັດທະນາຖາວອນ ແລະ ຄວາມໝັ້ນຄົງຂອງສັງຄົມ ແລະ ຄວາມວັດຖະນາຖາວອນຂອງໂລກ.
​       ໃນກອງປະຊຸມ, ທ່ານ ລິນຄຳ ດວງສະຫວັນ ໄດ້ມີຄຳເຫັນວ່າ: ສປປ ລາວ ໄດ້ຍຶດໝັ້ນ ແລະ ມີຄວາມພະຍາຍາມຫລາຍ ໃນການຈັດຕັ້ງປະຕິບັດວາລະ ຮອດປີ 2030 ວ່າດ້ວຍການພັດທະນາແບບຍືນຍົງ ແລະ ຂໍ້ຕົກລົງປາຣີ ວ່າດ້ວຍການປ່ຽນແປງດິນຟ້າອາກາດ ເຂົ້າໃນແຜນພັດທະນາເສດຖະກິດ-ສັງຄົມ ໃນແຕ່ລະປີ ແລະ ຄົ້ນຄວ້າກຳນົດເຂົ້າໃນແຜນແມ່ບົດຈັດສັນທີ່ດິນແຫ່ງຊາດ, ຍຸດທະສາດການເຕີບໂຕສີຂຽວແຫ່ງຊາດ, ຍຸດທະສາດການຄຸ້ມຄອງນ້ຳ ແລະ ຊັບພະຍາກອນນ້ຳແຫ່ງຊາດ, ຍຸດທະສາດການພັດທະນາກະສິກຳ, ແຜນງານແຫ່ງຊາດປະກອອບສ່ວນແກ້ໄຂບັນຫາການປ່ຽນແປງດິນຟ້າອາກາດ ແລະ ໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ກໍໄດ້ພິຈາລະນາຮັບຮອງເອົາແຜນພັດທະນາພະລັງງານໄຟຟ້າຂອງ ສປປ ລາວ ຮອດປີ 2030 ເພື່ອປະກອບສ່ວນເຂົ້າໃນການສົ່ງເສີມການປົກປັກຮັກສາ, ຄຸ້ມຄອງ ແລະ ການນຳໃຊ້ຊັບພະຍາກອນທຳມະຊາດ ໃຫ້ມີປະສິດທິພາບ ປະສິດທິຜົນ ແລະ ມີຄວາມຍືນຍົງ ເພື່ອຜົນປະໂຫຍດລວມ ຂອງບັນດາປະເທດໃນພາກພື້ນ ແລະ ໃນໂລກ.
​ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ບັນດາປະເທດຄູ່ຮ່ວມພັດທະນາ, ສະຖາບັນການເງິນ, ອົງການຈັດຕັ້ງສັງຄົມ ແລະ ຜູ້ປະກອບການທັງພາກລັດ ແລະ ເອກະຊົນ ທີ່ຢູ່ພາຍໃນ ແລະ ຕ່າງປະເທດ ລົງທຶນໃນຂົງເຂດການຜະລິດພະລັງງານສະອາດ ເພື່ອຄວາມໝັ້ນຄົງທາງດ້ານພະລັງງານ ແລະ ດຳເນີນການຜະລິດໃນຂົງເຂດກະສິກຳ ຜະລິດສະບຽງອາຫານ, ຄວາມໝັ້ນຄົງທາງດ້ານສະບຽງອາຫານ ໃນເງື່ອນໄຂທີ່ມີການປ່ຽນແປງດິນຟ້າອາກາດ ທັງເປັນການປະກອບສ່ວນຫລຸດຜ່ອນຄວາມທຸກຍາກໃຫ້ແກ່ປະຊາຊົນ ທັງສະໜັບສະໜູນ ແລະ ການຊ່ວຍເຫລືອ ໃນການສ້າງຊັບພະຍາກອນມະນຸດ, ພື້ນຖານວັດຖຸເຕັກນິກ, ໂຄງລ່າງພື້ນຖານທີ່ຈຳເປັນ ແລະ ຄວາມເຂັ້ມແຂງ ໃນການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດ; ແກ້ໄຂບັນຫາຄວາມໝັ້ນຄົງທາງດ້ານພະລັງງານ ແລະ ສະບຽງອາຫານ ແລະ ຮ່ວມມືກັນຊ່ວຍເຫລືອກັນ ໃນການຄຸ້ມຄອງບໍລິຫານ ແລະ ນຳໃຊ້ນ້ຳ ແລະ ຊັບພະຍາກອນນ້ຳ ຕາມຫລັກການຄຸ້ມຄອງແບບເຊື່ອມສານ ໃຫ້ມີຄຸນນະພາບດີ ແລະ ມີປະລິມານນ້ຳທີ່ພຽງພໍ ເພື່ອຕອບສະໜອງໃຫ້ແກ່ການອຸປະໂພກ-ບໍລິໂພກ ແລະ ການພັດທະນາແບບຍືນຍົງ.
(ພາບ ແລະ ຂ່າວ: ນາງ ອາລິນ ສຸພິມມະປະດິດ)