ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ,  ປະທານສະພາແຫ່ງຊາດ ກ່າວສູນທອນພົດປິດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ຫໍສະພາແຫ່ງຊາດ ນະຄອນ ຫລວງວຽງຈັນ, ໃນວັນທີ 17 ພະຈິກ 2021.

ຮຽນ: – ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດ ແຫ່ງ ສປປລາວ ທີ່ເຄົາລົບ ແລະ ນັບຖືຢ່າງສູງ!

– ບັນດາທ່ານການນໍາຂັ້ນສູງ ຂອງພັກ-ລັດ ທີ່ນັບຖື.

– ບັນດາທ່ານສະມາຊິກສະພາແຫ່ງຊາດ, ແຂກທີ່ມີກຽດ ທີ່ນັບຖື ແລະ  ຮັກແພງທັງຫລາຍ.

ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໄດ້ດໍາເນີນມາເປັນເວລາ 15 ວັນ ໃນທ່າມກາງບັນຍາກາດ ທີ່ທົ່ວພັກ-ລັດ ກໍຄືປະຊາຊົນລາວບັນດາເຜົ່າ ກໍາລັງສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ໂດຍສະເພາະແມ່ນ 2 ວາລະແຫ່ງຊາດໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ, ການເງິນ ແລະ ແກ້ໄຂບັນຫາຢາເສບຕິດ ໄປຄຽງຄູ່ກັບການຈັດຕັ້ງປະຕິບັດມາດຕະການປ້ອງກັນ ການລະບາດຂອງພະຍາດໂຄວິດ-19 ດ້ວຍຄວາມຮັບຜິດຊອບສູງ; ໃນເງື່ອນໄຂດັ່ງກ່າວ ຄະນະປະຈໍາສະພາແຫ່ງຊາດ ໄດ້ມີຄວາມພະຍາຍາມ ນໍາພາການດໍາເນີນກອງປະຊຸມ ທັງຮູບແບບປົກກະຕິ, ຮູບແບບທາງໄກ ເພື່ອສ້າງເງື່ອນ ໄຂໃຫ້ບັນດາທ່ານສະມາຊິກສະພາແຫ່ງຊາດ ໄດ້ປະຕິບັດສິດເປັນຕົວແທນໃຫ້ແກ່ປະຊາຊົນລາວບັນ ດາເຜົ່າ ໃນການພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ ເຊິ່ງມາຮອດມື້ນີ້  ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໄດ້ບັນລຸຜົນສໍາເລັດຕາມຈຸດ ປະສົງລະດັບຄາດໝາຍທີ່ວາງໄວ້.

ກອງປະຊຸມສະໄໝສາມັນເທື່ອນີ້ ໄດ້ພິຈາລະນາຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ ປະຈໍາປີ 2021 ແລະ ທິດທາງແຜນການ ປະຈໍາປີ 2022; ຍຸດທະສາດພັດທະນາພະລັງ ງານໄຟຟ້າ ຂອງ ສປປລາວ 2021-2030;  ວິໄສທັດການພັດທະນາເສດຖະກິດດີຈີຕອນແຫ່ງຊາດ ໄລຍະ 20 ປີ (2021-2040), ຍຸດທະສາດ 10 ປີ (2021-2030) ແລະ ແຜນພັດທະນາເສດຖະກິດດີຈີຕອນແຫ່ງຊາດ 5 ປີ (2021-2025). ກອງປະຊຸມໄດ້ຕີລາຄາສູງຕໍ່ຄວາມພະຍາ ຍາມຊີ້ນໍາຂອງລັດຖະບານ ແລະ ອົງການທີ່ກ່ຽວຂ້ອງ ທີ່ໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍຕ່າງໆ, ສູ້ຊົນຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ຕາມຂອບເຂດສິດ ແລະ ພາລະບົດບາດຂອງຕົນ ທັງມີມາດຕະການໃນການພັດທະນາເສດຖະກິດ ທັງມີການຄວບຄຸມພະຍາດໂຄວິດ-19 ໄປພ້ອມໆກັນ ສາມາດຍາດໄດ້ຜົນສໍາເລັດພົ້ນເດັ່ນຫລາຍດ້ານ ອັນໄດ້ປະກອບສ່ວນເຂົ້າໃນການເຮັດໃຫ້ປະເທດຊາດ ມີສະຖຽນລະພາບທາງດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ເສດຖະກິດສືບຕໍ່ມີການຂະຫຍາຍຕົວຢ່າງຕໍ່ເນື່ອງ, ເຖິງວ່າບໍ່ສາມາດບັນລຸໄດ້ຕາມຄາດໝາຍທີ່ວາງໄວ້ກໍຕາມ ແຕ່ເບິ່ງລວມແລ້ວຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງ ແລະ ຍົກສູງດີຂຶ້ນເປັນກ້າວໆ. ກອງປະຊຸມມອບໃຫ້ລັດຖະບານ ນໍາເອົາຄວາມຄິດເຫັນຂອງກອງປະຊຸມ ໄປປັບປຸງເຂົ້າໃສ່ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ; ແຜນພັດທະນາພະລັງງານໄຟຟ້າ; ແຜນພັດທະນາເສດຖະກິດດີຈີຕອນແຫ່ງຊາດ ໃຫ້ມີເນື້ອໃນຮັດກຸມ, ຄົບຖ້ວນ ແລະ ສາມາດຈັດຕັ້ງປະຕິບັດໃຫ້ເປັນຮູບປະທໍາຫລາຍຂຶ້ນຢ່າງເປັນລະບົບຕໍ່ເນື່ອງ.

ກອງປະຊຸມໄດ້ພິຈາລະນາຮັບຮອງເອົາ ບົດລາຍງານຂອງອົງການກວດກາແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2021 ແລະ ແຜນການ ປະຈໍາປີ 2022, ບົດລາຍງານຜົນການກວດກາຕາມຜົນການກວດສອບ ບົດສະຫລຸບຂາດຕົວການຈັດຕັ້ງປະ ຕິບັດແຜນງົບປະມານແຫ່ງລັດ ປະຈໍາປີ 2019; ບົດລາຍງານຂອງອົງການກວດສອບແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2021 ແລະ ແຜນການ ປະຈໍາປີ 2022, ບົດລາຍງານຜົນການກວດສອບບົດສະຫລຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2020 ເຊິ່ງກອງປະຊຸມໄດ້ສະແດງຄວາມຊົມເຊີຍສັນລະເສີນ ແລະ ຕີລາຄາສູງ ຕໍ່ອົງການກວດກາແຫ່ງລັດ ແລະ ອົງການກວດສອບແຫ່ງລັດ ທີ່ໄດ້ມີຄວາມພະຍາຍາມປະຕິບັດພາລະບົດບາດຂອງຕົນຕາມກົດໝາຍຢ່າງຕັ້ງໜ້າ, ເຮັດໃຫ້ການປະຕິບັດກົດໝາຍມີຄວາມເຂັ້ມງວດ ທ່ຽງທໍາຂຶ້ນ ເປັນຕົ້ນ ສາມາດຊອກເຫັນໄດ້ການລະເມີດວິໄນແຜນການ-ການເງິນ, ເກັບກູ້ງົບປະມານ ແລະ ຊັບສິນຂອງລັດຄືນມາໄດ້ຈໍານວນໜຶ່ງ ເຮັດໃຫ້ສັງຄົມມີຄວາມເຊື່ອໝັ້ນຕໍ່ການນຳພາຂອງພັກ ແລະ ການຄຸ້ມຄອງຂອງລັດ.

ກອງປະຊຸມໄດ້ພິຈາລະນາຮັບຮອງເອົາ ບົດລາຍງານການຈັດຕັ້ງປະຕິບັດແຜນການເຄື່ອນ ໄຫວວຽກງານ ຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ປະຈໍາປີ 2021 ແລະ ແຜນການ ປະຈໍາປີ 2022 ເຊິ່ງກອງປະຊຸມໄດ້ຕີລາຄາສູງຕໍ່ສອງອົງການດັ່ງກ່າວ ທີ່ໄດ້ເອົາໃຈໃສ່ປະຕິບັດພາລະບົດບາດຂອງຕົນ ດ້ວຍຄວາມຮັບຜິດຊອບສູງ, ໄດ້ຍົກສູງຄຸນນະພາບໃນການດໍາເນີນຄະດີຕາມຂະບວນຍຸຕິທໍາ ນັບມື້ດີຂຶ້ນ, ເອົາໃຈໃສ່ປັບປຸງກົນໄກການປະສານງານ ກັບພາກສ່ວນກ່ຽວຂ້ອງ ເພື່ອດໍາເນີນຄະດີໃຫ້ມີຄຸນນະພາບ ແລະ ວ່ອງໄວ; ການຕິດຕາມກວດກາການປະຕິບັດລັດຖະທໍາມະນູນ ແລະ ກົດໝາຍ ເຊິ່ງເປັນການປະກອບສ່ວນເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີຂຶ້ນ.

ກອງປະຊຸມໄດ້ພິຈາລະນາຮັບຮອງເອົາ ການສະເໜີແຕ່ງຕັ້ງສະມາຊິກສະພາຜູ້ພິພາກສາຂອງສານປະຊາຊົນສູງສຸດ ເຊິ່ງປະກອບດ້ວຍບຸກຄະລາກອນທີ່ມີມາດຕະຖານ, ເງື່ອນໄຂຄົບຖ້ວນ  ແລະ ມີປະສົບການຕົວຈິງ  ເຊິ່ງຈະເປັນການປັບປຸງອົງການສິດອໍານາດແຫ່ງລັດຂອງອົງການຕຸລາການໃຫ້ເປັນລະບົບຄົບຊຸດ ແລະ ເຂັ້ມແຂງຂຶ້ນ ເພື່ອເຮັດໃຫ້ການເຄື່ອນໄຫວວຽກງານຂອງສານປະຊາຊົນແຕ່ລະຂັ້ນ ມີບາດກ້າວຫັນປ່ຽນທີ່ດີຂຶ້ນ ປະກອບສ່ວນເຂົ້າໃນການປັບປຸງລະບົບຍຸຕິທໍາ ຂອງພວກເຮົາໃຫ້ໜັກແໜ້ນຂຶ້ນ ເພື່ອສ້າງຄວາມເຊື່ອໝັ້ນໃຫ້ແກ່ປະຊາຊົນລາວບັນດາເຜົ່າ.

ກອງປະຊຸມໄດ້ພິຈາລະນາ ແລະ ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2021 ແລະ ແຜນການ ປະຈໍາປີ 2022 ຂອງສະພາແຫ່ງຊາດ; ການປະກອບຄໍາເຫັນຂອງສູນກາງແນວລາວສ້າງຊາດ ຕໍ່ການເຄື່ອນໄຫວວຽກງານຂອງສະພາແຫ່ງຊາດ ເຊິ່ງເປັນຂໍ້ມູນທີ່ດີໃຫ້ແກ່ການປັບປຸງການເຄື່ອນໄຫວວຽກງານລວມຂອງສະພາແຫ່ງຊາດ. ກອງປະຊຸມໄດ້ຕີລາຄາສູງ ຕໍ່ການນໍາພາ-ຊີ້ນໍາ ຂອງຄະນະປະຈໍາສະພາແຫ່ງຊາດ, ການປະຕິບັດໜ້າທີ່ຂອງກົງຈັກເສນາທິການ ແລະ ບັນດາທ່ານສະມາຊິກສະພາແຫ່ງຊາດ ທີ່ໄດ້ເອົາໃຈໃສ່ຈັດຕັ້ງຜັນຂະຫຍາຍວຽກງານຂອງຕົນ ຕາມພາລະບົດບາດ ແລະ ສິດໜ້າທີ່ ໃນປີ 2021 ເຖິງວ່າຈະເປັນໄລຍະເລີ່່ມຕົ້ນຂອງສະພາແຫ່ງຊາດ ຊຸດທີ IX ແຕ່ກໍມີຜົນສໍາເລັດຫລາຍດ້ານ ເປັນຕົ້ນ ໄດ້ດໍາເນີນ ກອງປະຊຸມຄັ້ງປະຖົມມະລືກ, ກອງປະຊຸມສະໄໝວິສາມັນ ແລະ ສາມັນ ຂອງຕົນ; ໃນນີ້, ສະພາແຫ່ງຊາດ, ຄະນະປະຈໍາສະພາແຫ່ງຊາດ, ກົງຈັກເສນາທິການ ໄດ້ເປັນເຈົ້າການປະຕິບັດພາລະບົດບາດຂອງສະພາແຫ່ງຊາດຢ່າງຄົບຖ້ວນ, ເປັນລະບົບຕໍ່ເນື່ອງ; ການດໍາເນີນກອງປະຊຸມຄະນະປະຈໍາສະພາແຫ່ງຊາດຮ່ວມກັບລັດຖະບານ ແລະ ອົງການກວດກາແຫ່ງລັດ, ອົງການກວດສອບແຫ່ງລັດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ສູນກາງແນວລາວສ້າງຊາດ ແລະ ວຽກງານອື່ນໆ ມີຜົນສໍາເລັດຕາມຄາດໝາຍທີ່ວາງໄວ້.

ກອງປະຊຸມ ໄດ້ພິຈາລະນາ ແລະ ຮັບຮອງເອົາກົດໝາຍ ຈໍານວນ 11 ສະບັບ, ໃນນີ້, ມີກົດໝາຍສ້າງໃໝ່ຈໍານວນ 4 ສະບັບຄື: ຮ່າງກົດໝາຍວ່າດ້ວຍຍານພາຫະນະທາງບົກ, ຮ່າງກົດໝາຍວ່າດ້ວຍຊາຍແດນແຫ່ງຊາດ, ຮ່າງກົດໝາຍວ່າດ້ວຍເຕັກໂນໂລຊີລະດັບສູງ, ຮ່າງກົດໝາຍວ່າດ້ວຍການສໍາຫລວດວັດແທກ ແລະ ສ້າງແຜນທີ່ ແລະ ກົດໝາຍປັບປຸງຈໍານວນ 7 ສະບັບຄື: ກົດໝາຍວ່າດ້ວຍລັດຖະບານ, ກົດໝາຍວ່າດ້ວຍງົບປະມານແຫ່ງລັດ, ກົດໝາຍວ່າດ້ວຍການສ້າງນິຕິກຳ, ກົດໝາຍວ່າດ້ວຍການປະຕິບັດຄໍາຕັດສິນຂອງສານ, ກົດໝາຍວ່າດ້ວຍການຄວບຄຸມຢາສູບ, ກົດໝາຍວ່າດ້ວຍໂທລະຄົມມະນາຄົມ ແລະ ກົດໝາຍວ່າດ້ວຍມໍຣະດົກແຫ່ງຊາດ. ການພິຈາລະນາຮັບຮອງເອົາບັນດາກົດໝາຍດັ່ງກ່າວ ເປັນການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ 5 ປີຂອງສະພາແຫ່ງຊາດ ຊຸດທີ IX, ເປັນການສືບຕໍ່ຫັນປ່ຽນແຂງແຮງ ແລະ ຮອບດ້ານ ໃນການສ້າງລັດທີ່ປົກຄອງດ້ວຍກົດໝາຍໃຫ້ເປັນຮູບປະທໍາ ແລະ ເຂົ້າສູ່ວຽກງານຕົວຈິງເທື່ອລະກ້າວ, ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ນັບມື້ເປັນລະບົບຄົບຊຸດ ແລະ ມີປະສິດທິຜົນ.

ນອກຈາກນັ້ນແລ້ວ, ກອງປະຊຸມ ໄດ້ຮັບຟັງການຊີ້ແຈງ ຕໍ່ບັນຫາພົ້ນເດັ່ນຕ່າງໆທີ່ສັງຄົມ ກໍຄືປະຊາຊົນບັນດາເຜົ່າ ມີຄວາມສົນໃຈຫລາຍ ຈາກທ່ານນາຍົກລັດຖະມົນຕີ, ຮອງນາຍົກລັດຖະມົນ ຕີ-ລັດຖະມົນຕີກະຊວງແຜນການ ແລະ ການລົງທຶນ, ບັນດາລັດຖະມົນຕີ, ຜູ້ວ່າການທະນາຄານແຫ່ງ ສປປລາວ, ຫົວໜ້າອົງການກວດກາແຫ່ງລັດ, ອົງການກວດສອບແຫ່ງລັດ, ປະທານສານປະຊາຊົນສູງສຸດ ແລະ ຫົວໜ້າອົງການໄອຍະການປະຊາຊົນສູງສຸດ. ກອງປະຊຸມສະແດງຄວາມເຊື່ອໝັ້ນວ່າ ແຕ່ລະພາກສ່ວນຈະສືບຕໍ່ເສີມຂະຫຍາຍຜົນສໍາເລັດທີ່ຍາດມາໄດ້ ໃນປີຜ່ານມາ, ສູ້ຊົນຈໍາກັດ ແລະ ແກ້ໄຂອຸປະສັກ, ສິ່ງກີດຂວາງ ໃນຂົງເຂດວຽກງານທີ່ຕົນຮັບຜິດຊອບ ຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ ເພື່ອສ້າງໃຫ້ມີການຫັນປ່ຽນທີ່ດີຂຶ້ນຢ່າງຈະແຈ້ງ, ສືບຕໍ່ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໂດຍສະເພາະຢ່າງຍິ່ງ 2 ວາລະແຫ່ງຊາດ ໃຫ້ເປັນຮູບປະທໍາ ແລະ ມີໝາກຜົນຕົວຈິງຫລາຍຂຶ້ນ.

ຜົນສໍາເລັດຂອງກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ຄັ້ງນີ້  ເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ, ແມ່ນໝາກຜົນແຫ່ງສະຕິປັນຍາ, ການຍົກສູງຄວາມຮັບຜິດຊອບການເມືອງ ຂອງບັນດາທ່ານສະມາຊິກສະພາແຫ່ງຊາດ, ຄວາມຕັດສິນໃຈຂອງລັດຖະບານ, ກະຊວງ, ອົງການທີ່ກ່ຽວຂ້ອງ ທີ່ຈະສືບຕໍ່ພັດທະນາປະ ເທດຊາດໃນທ່າມກາງທີ່ຍັງມີການແຜ່ລະບາດຂອງພະຍາດໂຄວິດ-19.

ເພື່ອສືບຕໍ່ຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມຄັ້ງນີ້, ກອງປະຊຸມ ຮຽກຮ້ອງມາຍັງຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາແຫ່ງຊາດ, ລັດຖະບານ, ອົງການປົກຄອງທ້ອງຖິ່ນ ແລະ ທຸກພາກສ່ວນທີ່ກ່ຽວຂ້ອງ ຈົ່ງໄດ້ຜັນຂະຫຍາຍມະຕິກອງປະຊຸມຄັ້ງນີ້ ເຂົ້າໃນຂອບເຂດຄວາມຮັບຜິດຊອບຂອງຕົນ  ໃຫ້ໄດ້ຮັບຜົນສໍາເລັດເປັນຢ່າງດີ.

ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໄດ້ຮັບຜົນສໍາເລັດຢ່າງຈົບງາມ ກໍຍ້ອນມີການຊີ້ນໍາຢ່າງໃກ້ຊິດ ຈາກກົມການເມືອງ ແລະ ຄະນະເລຂາທິການສູນກາງພັກ,  ຍ້ອນຄວາມຮັບຜິດຊອບສູງຂອງລັດຖະບານ, ກະຊວງ, ບັນດາອົງການທີ່ກ່ຽວຂ້ອງ ແລະ ຂະແໜງ ການກ່ຽວຂ້ອງ, ຕາງໜ້າຄະນະປະຈໍາສະພາແຫ່ງຊາດ, ສະມາຊິກສະພາແຫ່ງຊາດ ຂໍສະແດງຄວາມຂອບໃຈເປັນຢ່າງສູງ ມາຍັງກົມການເມືອງ ແລະ ຄະນະເລຂາທິການສູນກາງພັກ ທີ່ຍາມໃດກໍໄດ້ໃຫ້ການຊີ້ນໍາຢ່າງໃກ້ຊິດຕໍ່ສະພາແຫ່ງຊາດໂດຍຕະຫລອດມາ, ຂໍສະແດງຄວາມຂອບໃຈ ເປັນຢ່າງຍິ່ງມາຍັງບັນດາທ່ານການນໍາພັກ-ລັດ, ສູນກາງແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ທີ່ໄດ້ໃຫ້ກຽດເຂົ້າຮ່ວມ ແລະ ປະຊາຊົນລາວບັນດາເຜົ່າ ທີ່ໄດ້ຕິດຕາມກອງປະຊຸມຂອງພວກເຮົາໃນຄັ້ງນີ້ ຢ່າງຈົດຈໍ່ ແລະ ມີການສົ່ງຄໍາຄິດເຫັນຜ່ານໂທລະສັບສາຍດ່ວນ ມາຍັງກອງປະຊຸມຢ່າງຫລວງຫລາຍ.

ຂໍສະແດງຄວາມຂອບໃຈ ຕໍ່ທຸກພາກສ່ວນກ່ຽວຂ້ອງ ທີ່ໄດ້ປະກອບສ່ວນເຂົ້າໃນຜົນສໍາເລັດຂອງກອງປະຊຸມຄັ້ງນີ້ ເປັນຕົ້ນ ທີມແພດສະເພາະກິດປ້ອງກັນພະຍາດໂຄວິດ-19 ທີ່ຮັບໃຊ້ກອງ ປະຊຸມສະໄໝສາມັນເທື່ອນີ້, ການສະໜອງອິນເຕີເນັດ ເຊິ່ງອໍານວຍຄວາມສະດວກໃຫ້ແກ່ການຈັດກອງປະຊຸມແບບທາງໄກ ແລະ ເຮັດໃຫ້ທຸກພາກສ່ວນສາມາດຕິດຕາມຜ່ານລະບົບອອນລາຍຢ່າງຕໍ່ເນື່ອງ; ພ້ອມກັນນີ້ ຂໍສະແດງຄວາມຂອບໃຈຕໍ່ສື່ມວນຊົນທີ່ໄດ້ນໍາສະເໜີຂ່າວສານ ການດໍາເນີນກອງປະຊຸມໄດ້ທັນສະພາບການແທດຕົວຈິງ ເປັນການປະກອບສ່ວນເຮັດໃຫ້ກອງປະຊຸມຂອງພວກເຮົາໃນຄັ້ງນີ້ ໄດ້ຮັບຜົນສໍາເລັດຢ່າງຈົບງາມ.

ສຸດທ້າຍນີ້, ຕາງໜ້າໃຫ້ກອງປະຊຸມສະພາແຫ່ງຊາດ ຂໍອວຍພອນໄຊອັນປະເສີດມາຍັງ ທ່ານເລຂາທິການໃຫຍ່ ປະທານປະເທດ ຈົ່ງມີພາລານາໄມສົມບູນ, ມີຄວາມຜາສຸກໃນຊີວິດຄອບຄົວ, ມີຜົນສໍາເລັດໃໝ່ໃນການຊີ້ນໍາ-ນໍາພາປະເທດຊາດໃຫ້ກ້າວຂຶ້ນຢ່າງໜັກແໜ້ນ.

ຂໍອວຍພອນໃຫ້ບັນດາທ່ານການນໍາຂັ້ນສູງພັກ-ລັດ, ພະນັກງານ, ທະຫານ, ຕຳຫລວດ ແລະ ປະຊາຊົນລາວບັນດາເຜົ່າໃນທົ່ວປະເທດ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຄອບຄົວ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດຂອງຕົນ.

ໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍປະກາດ ປິດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ຢ່າງເປັນທາງການນັບແຕ່ເວລານີ້ ເປັນຕົ້ນໄປ.

ຂໍຂອບໃຈ