ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

      ທ່ານ ນາງ ວາລີ ເວດສະພົງ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ1 ສະພາປະຊາຊົນນະຄອນຫລວງວຽງຈັນ ໄດ້ປະກອບຄຳເຫັນໃສ່ບົດລາຍງານຂອງລັດຖະບານກອງປະຊຸມສະໄໝສາມັນເທື່ອທີ 2 ສະພາແຫ່ງຊາດຊຸດທີ IX ເຊິ່ງໄຂຂຶ້ນລະຫວ່າງ1-17  ພະຈິກ 2021 ທ່ານໄດ້ສະແດງຄວາມຄິດເຫັນໃນວາລະມື້ທໍາອິດຂອງກອງປະຊຸມໂດຍທ່ານໄດ້ກ່າວວ່າ:

         ເຫັນດີກັບບົດລາຍງານຂອງທ່ານນາຍົກ ຖືວ່າເພິ່ນກໍເຮັດໄດ້ຈະແຈ້ງກະທັດຮັດ, ເຂົ້າໃຈງ່າຍ ແລະ ມີຈຸດສຸມ ໂດຍສະເພາະແມ່ນວາລະແຫ່ງຊາດ ເຊິ່ງໃນເວລາກອງປະຊຸມສະໄໝວິສາມັນຜ່ານມາ ລັດຖະບານກໍໄດ້ມີການຜັນຂະຫຍາຍວາລະແຫ່ງຊາດ ໂດຍການສ້າງດຳລັດປັບປຸງກົດໝາຍ, ບັນດາຄຳສັ່ງຕ່າງໆເພື່ອເປັນເຄື່ອງມືໃຫ້ການຜັນຂະຫຍາຍວາລະແຫ່ງຊາດ ແຕ່ເຖິງຢ່າງໃດກໍຕາມ ສັງເກດເຫັນວ່າຢູ່ໃນບົດສະຫລຸບຂອງກະຊວງແຜນການ ແລະ ການລົງທຶນໂດຍສະເພາະແມ່ນຕະລາງການສະຫລຸບກ່ຽວກັບໂຕຊີ້ວັດ ປາກົດວ່າທະນາຄານກາງສະຫລຸບຕົວເລກ 9 ເດືອນ,​ ກະຊວງການເງິນສະຫລຸບຕົວເລກ 10 ເດືອນ, ກະຊວງແຜນການ ແລະການລົງທຶນສະຫລຸບຕົວເລກ 9 ເດືອນເຊິ່ງອາດຈະມີຄວາມຫຍຸ້ງຍາກຕໍ່ສະພາ ວ່າຈະຮັບຮອງເອົາຕົວເລກໃດແທ້ເປັນມະຕິ ໂດຍສະເພາະອາດສ້າງຄວາມສັບສົນຕໍ່ສສຊ ໃນການຕິດຕາມກວດກາຕີລາຄາປະເມີນຜົນ 3 ເດືອນທ້າຍປີ ແລະ ຕິດພັນກັບດ້ານເງິນຕາ ເຫັນວ່າບົດສະຫລຸບຕີລາຄາໃຫ້ເຫັນຈະແຈ້ງວ່າອັດຕາແລກປ່ຽນ ອ່ອນຄ່າ 6,55%ເຊິ່ງໃນແຜນເໜັງຕິງຢູ່ໃນກອບ5% ແລະ ກໍໄດ້ອະທິບາຍແລ້ວວ່າເປັນການດັດສົມຕະຫລາດເງິນຕາ ໂດຍທາງທະນາຄານໄດ້ຊີ້ແຈງຕະຫລອດຢູ່ໃນເວທີຂອງສະພາແຫ່ງຊາດ, ຂ້າພະເຈົ້າເຄີຍມີຄຳເຫັນຫລາຍຄັ້ງຕໍ່ສະພາຊຸດທີ VIII ກ່ຽວກັບເລື່ອງຂອງກົນໄກການຄຸ້ມຄອງລະບົບການສຳລະ ໂດຍສະເພາະການຊໍາລະຂອງນັກລົງທຶນຕ່າງປະເທດທີ່ມາລົງທຶນໃນລາວ ເຮັດທຸລະກຳທາງດ້ານການເງິນ 80% ຢູ່ຕ່າງປະເທດ ເຊິ່ງມັນເຮັດໃຫ້ລະບົບເງິນຕາບໍ່ໄຫລເຂົ້າລະບົບທະນາຄານຂອງພວກເຮົາ ຫລືນີ້ອາດເປັນສາເຫດໜຶ່ງ ທີ່ເຮັດໃຫ້ລະບົບການຊຳລະ ຫລືລະບົບຄຸ້ມຄອງເງິນຕາພວກເຮົາມີບັນຫາແຕ່ຄາດຫັວງວ່າພວກເຮົາຈະເອົາຈິງເອົາຈັງກັບການປັບກົນໄກນີ້ເພາະວ່າມັນເປັນມາຫລາຍປີແລ້ວ ເພາະຖ້າພວກເຮົາປັບໄດ້ກໍຈະເປັນຜົນດີໃຫ້ແກ່ລະບົບການຄຸ້ມຄອງເງິນຕາ ເຊິ່ງອາດຈະຕ້ອງປັບກົນໄກການຄຸ້ມຄອງຫລືລະບຽບຂອງທະນາຄານ ວ່າໃຫ້ເອົາເງິນຕາເຂົ້າມາ ແຕ່ບໍ່ຟ້າວປ່ຽນເປັນເງິນກີບ ແລະ ອາດຈະຮັກສາເປັນເງິນຕາຕ່າງປະເທດໄວ້ເພື່ອຊຳລະກ່ອນລະ ສ່ວນທີ່ເຫລືອຈຶ່ງປ່ຽນເປັນເງິນກີບ. ສະນັ້ນ, ຈຶ່ງຢາກຂໍຝາກໃຫ້ຈິງຈັງໃນເລື່ອງຂອງການປັບກົນໄກນີ້ຕື່ມອີກ.

       ທ່ານ ນາງ ວາລີ ເວດສະພົງ ກ່າວຕື່ມອີກວ່າ: ກ່ຽວກັບແຜນຟື້ນຟູເສດຖະກິດປີ2021 ເນື່ອງຈາກຜົນກະທົບຂອງພະຍາດ ໂຄວິດ-19 ລັດຖະບານໄດ້ອອກຫລາຍຄໍາສັ່ງຫລາຍນະໂຍບາຍຜ່ອນຜັນໃຫ້ພາກທຸລະກິດໃຫ້ພາກປະຊາຊົນ ແຕ່ເຮົາໄດ້ປະເມີນຄືນແລ້ວຫລືບໍ່ ວ່າໃນນະໂຍບາຍຕ່າງໆ ທີ່ພວກເຮົາໃຫ້ການຜ່ອນຜັນນັ້ນປະຕິບັດໄດ້ແທ້ບໍ່ ເພື່ອເຮົາຈະກ້າວໄປໜ້າໃຫ້ມີໂຕຊີ້ວັດທີ່ເປັນລັກສະນະວິທະຍາສາດຄັກແນ່.