ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

      ທ່ານ ສີເຮັງ ຫອມສົມບັດ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 14 ແຂວງສາລະວັນ ທັງເປັນປະທານສະພາປະຊາຊົນແຂວງ (ສພຂ) ໄດ້ປະກອບຄຳເຫັນໃສ່ບົດລາຍງານຂອງລັດຖະບານ ທີ່ສະເໜີໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ເຊິ່ງໄຂຂຶ້ນໃນຕົ້ນເດືອນພະຈິກ 2021 ໂດຍທ່ານໄດ້ກ່າວວ່າ: ຂ້າພະເຈົ້າຂໍສະແດງຄວາມຍ້ອງຍໍຊົມເຊີຍແລະ ເປັນເອກະພາບສູງ ຕໍ່ການຈັດຕັ້ງປະຕິບັດແຜນພັດທະນາສັງຄົມ ປະຈຳປີ 2021 ເຊິ່ງເຫັນວ່າຢູ່ສູນກາງ ແລະ ທ້ອງຖິ່ນ ລ້ວນແລ້ວແຕ່ມີຜົນສຳເລັດຫລາຍດ້ານ ແລະລັດຖະບານກໍໄດ້ລາຍງານຕໍ່ກອງປະຊຸມສະພາອັນຊົງກຽດແຫ່ງນີ້ແລ້ວ ແລະ ເພື່ອເປັນການປະກອບສ່ວນ ໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນປີ 2022 ຂ້າພະເຈົ້າຂໍມີບາງຄຳເຫັນ ເນັ້ນໃສ່ບາງຈຸດຄື:ຈຸດທີໜຶ່ງ ເພື່ອປະຕິບັດວາລະແຫ່ງຊາດໃຫ້ສຳເລັດຜົນ ຈຳເປັນຈະຕ້ອງໄດ້ສູ້ຊົນ,ເຮັດໃຫ້ເສດຖະກິດຂອງພວກເຮົາຂະຫຍາຍຕົວ ຄືດັ່ງທີ່ລັດຖະບານຕັ້ງເປົ້າເອົາໄວ້ແມ່ນປະມານ 4,2% ເບິ່ງແນວໂນ້ມຂອງການຂະຫຍາຍຕົວທາງດ້ານເສດຖະກິດແລ້ວ ຢາກຂໍໃຫ້ຍົກຂຶ້ນໃນລະດັບ 4,5%-5% ໄດ້ບໍ່ເພາະຖ້າເຮົາຕັ້ງເປົ້າໄວ້ຕ່ຳຫລາຍກໍອາດເຮັດໃຫ້ບໍ່ມີການບຸກບືນສູ້ຊົນ ແລະ ປັດຈຸບັນ ບັນດາປະເທດໃກ້ຄຽງພວກເຮົາ ບາງປະເທດເຂົາຍັງຮັກສາການຂະຫຍາຍ ຕົວໄດ້ໃນລະດັບດີ ຕົວຢ່າງຫວຽດນາມ ບໍ່ຫລຸດ 7% ຕໍ່ປີແລະ ຫລາຍປະເທດເຂົາເຈົ້າກໍຕັ້ງເປົ້າໄວ້ສູງສົມຄວນ ເພື່ອບືນໂຕໃຫ້ສຳເລັດ.

       ຈຸດທີສອງ ຢາກໃຫ້ສຸມໃສ່ການດັດປັບໂຄງປະກອບຂອງການລົງທຶນ ລັດເຮົາອາດຊິລົງທຶນບໍ່ຫລາຍ ແຕ່ຖ້າເຮົາຊິຢຸດຄືແນວນີ້ບໍ່ໄດ້ ເພາະເສດຖະກິດຈະບໍ່ຂະຫຍາຍໂຕ ສະນັ້ນ, ເຮົາຕ້ອງໄດ້ປັບໂຄງສ້າງຂອງການລົງທຶນໃຫ້ໄດ້ ເຊິ່ງບ້ວງປົກກະຕິຂອງລັດຖະບານ ແມ່ນ2,200ຕື້ ອັນນີ້ຄິດວ່າຢາກໃຫ້ມີການແບ່ງຊັດສ່ວນຂອງການລົງທຶນໃຫ້ຖືກຕາມຄວາມເປັນຈິງ ການປະກອບສ່ວນໃສ່ກັບອົງການສາກົນ ຫລື ທຶນໂອດີເອ 5%-10% ດີແທ້ກໍຕື່ມໃສ່ອີກກໍໄດ້ ເພາະວ່າຕາມການຕິດຕາມ ຖ້າເປັນໂຄງການຄືແນວນີ້ ຈະມີປະສິດທິພາບ ແລະ ປະສິດທິຜົນສູງໝາຍຄວາມວ່າໂຄງການເຫລົ່ານີ້ເງິນທີ່ເອົາໄປໃຊ້ໜ້ອຍ ແຕ່ວ່າເຂົາບໍລິຫານໂຄງການໄດ້ດີຫລາຍ ຕົວຢ່າງ ບັນດາໂຄງການອື່ນໆຂອງກະຊວງພາຍໃນ ກໍຖືວ່າໄດ້ດີສົມຄວນ. ນອກຈາກນັ້ນ, ໂຄງການຊຳລະໜີ້ 30%-40% ຫລືວ່າໂຄງການສືບຕໍ່ 40%-50% ກໍຢາກໃຫ້ເບິ່ງຄືນ ເພາະພວກເຮົາຈະເຮັດໄປແນວນີ້ ເງິນໜ້ອຍບໍ່ຫລາຍພັດຊິກະຈາຍໄປຫລາຍໆໂຄງການ ບັນດາໂຄງການ ຫລື ວ່າເຈົ້າຂອງໂຄງການຜູ້ເຂົາລົງທຶນໄດ້ຮັບໂຄງການໜື່ງ 5-10 ລ້ານ ແລະ ອີກ 10-20ປີແກ້ຫຍັງບໍ່ໄດ້ ຍ້ອນເຮົາບໍ່ໄດ້ຊຳລະໜີ້ຢ່າງມີຈຸດສຸມ ເງິນເຮົາມີໜ້ອຍຢູ່ແລ້ວ ຊຳ້ພັດໄປກະຈາຍແບ່ງໃຫ້ຊຳລະໜີ້ໂດຍສະເລ່ຍ, ອັນນີ້ແມ່ນເຫັນຄວນໃຫ້ລັດຖະບານປັບປຸງຈຸດນີ້ຄືນນອກຈາກນັ້ນ ການລົງທຶນໃສ່ໂຄງການໃໝ່ໃນ 2,200 ຕື້ກີບຂ້າພະເຈົ້າຄິດວ່າຄິດວ່າ 50% ຍັງສູງຢູ່ ເພາະຖ້າບໍ່ຈຳເປັນອີຫລີກໍບໍ່ຢາກໃຫ້ລົງ ແຕ່ຢາກໃຫ້ໄປຊຳລະໜີ້ ຫລື ສືບຕໍ່ໂຄງການເກົ່າໃຫ້ສຳເລັດ ຈະເປັນການດີຫລາຍ ສ່ວນເລື່ອງແຜນການຖ້າເປັນໄປໄດ້ ຢາກໃຫ້ມີວິໄນແຜນການເຂັ້ມງວດແທ້ໆ ຈຶ່ງຈະຮັບປະກັນໄດ້ ຈຶ່ງຈະເຮັດໃຫ້ເສດຖະກິດພວກເຮົາຂະຫຍາຍຕົວເພາະບົດຮຽນຜ່ານມາ ແມ່ນຍ້ອນພວກເຮົາຂາດວິໄນແຜນການ ແລະ ຖ້າຫາກຂາດວິໄນແຜນການແລ້ວ ການເງິນກໍໄປຕາມກັນ ເພາະແຜນການຮັບຮອງເປັນໂຄງການ ແລ້ວການຊຳລະສະສາງ ກໍມີຄະນະກຳມະການກວດກາຄັກແນ່.ຈຸດທີສາມ ກ່ຽວກັບການລົງທຶນ: ຢາກໃຫ້ດຶງດູດການລົງທຶນຂອງເອກະຊົນພາຍໃນ ແລະ ຕ່າງປະເທດ ເປັນໝາກຫົວໃຈ ກວມອັດຕາສ່ວນການລົງທຶນຫລາຍທີ່ສຸດ ແຕ່ກົນໄກຂອງພວກເຮົາຍັງເປັນບັນຫາໜັກໜ່ວງຫລາຍ ເວົ້າວ່າປ່ຽນແປງປັບປຸງ ແຕ່ກໍຍັງມີກົນໄກເກົ່າຄອບງຳຫລາຍ ກວ່າຊິໄດ້ລົງທຶນຜ່ານຂັ້ນຕອນບໍ່ທຳມະດາຈຶ່ງຢາກໃຫ້ແກ້ແທ້ໆ ແລະ ແກ້ໄວເທົ່າໃດຍິ່ງດີ ເພື່ອເຮັດໃຫ້ການລົງທຶນຂອງຕ່າງປະເທດມີຄວາມສະດວກຫລາຍຂຶ້ນເຊິ່ງໝາຍຄວາມວ່າເວລາເຂົາຊິເຂົ້າໄປລົງທຶນບໍ່ໃຫ້ຫຍຸ້ງຍາກໂດຍເວລາເຂົ້າໄປລົງທຶນໃຫ້ເຂົ້າງ່າຍໆ ແຕ່ເຂົ້າໄປແລ້ວອອກຍາກໂດຍໃຫ້ເປີດກວ້າງການລົງທຶນແລະ ເວລາເຂົາລົງທຶນແລ້ວຄຸ້ມຄອງເຂົາໃຫ້ມັນດີ ບໍ່ໃຫ້ເຂົາອອກ ອັນນີ້ ຖືວ່າເປັນວິທີທີ່ດີຫລາຍ ແຕ່ກົງກັນຂ້າມຜ່ານມາເຫັນວ່າພວກເຂົາເຂົ້າຍາກ ແຕ່ເວລາອອກພັດສະບາຍ ແລະສ່ວນຫລາຍຈະເປັນແນວນັ້ນຈຶ່ງຢາກໃຫ້ເອົາໃຈໃສ່ແກ້ໄຂບັນຫານີ້ຕື່ມອີກ.

       ປະທານ  ສພຂ ສາລະວັນ ກ່າວຕື່ມວ່າ: ຢູ່ໃນແຜນພັດທະນາເສດຖະກິດ-ສັງຄົມນີ້ ແມ່ນການຈັດຕັ້ງປະຕິບັດແຜນພັດທະນາຊົນນະບົດແກ້ໄຂຄວາມທຸກຍາກ ອັນນີ້ຂໍຮ້ອງລັດຖະບານ ໃຫ້ແບ່ງຂັ້ນຄຸ້ມຄອງ ແລະ ດຳເນີນການຕິດຕາມກວດກາຢ່າງໃກ້ຊິດທີ່ສຸດເພາະພວກເຮົາຕັ້ງເປົ້າເອົາໄວ້ວ່າຈະແກ້ໄຂຄວາມທຸກຍາກ ເຊິ່ງຜ່ານມາ ກໍວ່າປີນັ້ນ ແລະກໍປີນີ້ແລະ ມາຮອດປັດຈຸບັນນີ້ມີຜົນກະທົບຫລາຍອັນ ສຳຄັນແມ່ນຖ້າເຮົາສືບຕໍ່ເຮັດຕາມກົນໄກເກົ່າ ກໍບໍ່ສຳເລັດຜົນຢູ່ດີ ເພາະສະນັ້ນຕ້ອງມີການສຸມທຶນຮອນໃສ່ ພ້ອມທັງຕິດຕາມກວດກາຢ່າງຕໍ່ເນື່ອງຈຶ່ງຈະເຮັດໃຫ້ການຄຸ້ມຄອງການລົງທຶນ ກໍຄືການພັດທະນາເສດຖະກິດ-ສັງຄົມໃຫ້ມັນໄດ້ດີ ໂດຍສະເພາະແມ່ນການແກ້ໄຂຄວາມທຸກຍາກ ແລະສິ່ງທີຂ້າພະເຈົ້າຢາກເວົ້າທີ່ສຸດແມ່ນການແກ້ໄຂການແຜ່ລະບາດຂອງພະຍາດໂຄວິດ-19ເຊິ່ງຈຸດນີ້ໃນກອງປະຊຸມຄັ້ງປະຖົມມະລຶກ ຂ້າພະເຈົ້າໄດ້ມີຄຳເຫັນໃນຕອນຕົ້ນແລ້ວວ່າ ຢາກໃຫ້ຕັ້ງເປົ້າໄວ້ ແລະ ເອົາເຂົ້າເປັນຫົວຂໍ້ສະເພາະ ເລື່ອງການແກ້ໄຂການແຜ່ລະບາດຂອງໂຄວິດ-19 ເພາະປັດຈຸບັນສາກົນເພິ່ນເຮັດ ແມ່ນຕ້ອງໄດ້ສຸມໃສ່ສຶກສາອົບຮົມໃຫ້ສັງຄົມຢູ່ກັບພະຍາດດັ່ງກ່າວໃຫ້ມັນໄດ້ ໂດຍຂຸ້ນຂ້ຽວສັກວັກຊິນໃຫ້ທົ່ວເຖິງເພາະມີການໂຄສະນາເຖິງຄວາມອັນຕະລາຍຫລາຍເທົ່າໃດ ແຕ່ເຂົາກໍຢ້ານອີກ. ສະນັ້ນ, ການສັກວັກຊີນໃຫ້ໄດ້ຫລາຍເທົ່າໃດຍິ່ງເປັນການດີ ເພື່ອໃຫ້ມີຄວາມຕ້ານທານ ແລະສາມາດປ້ອງກັນການລະບາດໄດ້ດີ ຈຶ່ງຂໍຮ້ອງໃຫ້ເບິ່ງຄືນເລື່ອງວັກຊິນ ເພາະປັດຈຸບັນນີ້ວັກຊີນສໍາລັບເດັກນ້ອຍຍັງບໍ່ມີເລີຍ ແລະ ຕາມການລາຍງານຂ່າວຜ່ານມາ ເມືອງສະໝ້ວຍ ມີເດັກນ້ອຍຕິດໂຄວິດ ເພີ່ມຂຶ້ນຫລາຍ ໝາຍຄວາມວ່າພະຍາດອັນນີ້ມັນເລີ່ມລະບາດໄປໃສ່ເດັກນ້ອຍແລ້ວ ຈຶ່ງສະເໜີໄປຍັງລັດຖະບານ ເອົາໃຈໃສ່ຕື່ມໃນຈຸດນີ້ ວ່າເຮັດແນວໃດ ແລະຍັງອີກດົນປານໃດ ເຮົາຈຶ່ງຈະໄດ້ວັກຊີນໄປສັກເດັກນ້ອຍ.ນອກຈາກນັ້ນ  ບັນຫານະໂຍບາຍຕໍ່ພະນັກງານພາກສະໜາມແພດໝໍ ຫລື ຜູ້ທີ່ຢູ່ປ້ອມດ່ານໜ້າ ແມ່ນສຳຄັນຫລາຍ ແລະເຫັນ ໃຈບັນດາແພດໝໍ ເຈົ້າໜ້າທີ່ ທຸກພາກສ່ວນ ທີ່ເຮັດໜ້າທີ່ໃນການປ້ອງກັນ ແລະ ປາບປາມພະຍາດໂຄວິດ-19.