ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

      ວັນທີ 1 ພະຈິກ 2021 ໃນກອງປະຊຸມສະໄໝສາມັນເທື່ອທີ 2 ສະພາແຫ່ງຊາດ ຊຸດທີ IX ເຊິ່ງໃນວາລະທໍາອິດຂອງກອງປະຊຸມແມ່ນຮັບຟັງບົດລາຍງານຂອງລັດຖະບານ ແລະ ໂອກາດດັ່ງກ່າວ, ທ່ານ ຈອມສີ ລັດຕະນະປັນ ສະມາຊິກສະພາແຫ່ງຊາດ (ສ​ສ​ຊ) ປະຈຳເຂດເລືອກຕັ້ງທີ 5 ແຂວງບໍ່ແກ້ວ ທັງ​ເປັນ​ປະ​ທານ​ຄະ​ນະ ສ​ສ​ຊ ປະ​ຈ​ຳ​ເຂດ​ເລືອກ​ຕັ້ງ ແລະ ປະ​ທານ​ສະ​ພາ​ປະ​ຊາ​ຊົນ​ແຂວງ​ບໍ່ແກ້ວ ໄດ້ມີຄຳເຫັນ​ຕໍ່ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ກໍຄືແຜນງົບປະມານແຫ່ງລັດ, ແຜນເງິນຕາປະຈຳປີ 2021 ແລະທິດທາງປີ 2022 ເຊິ່ງທ່ານໄດ້ກ່າວວ່າ:

       ຂ້າພະເຈົ້າສະແດງຄວາມຊົມເຊີຍ ແລະ ເຫັນດີເຫັນພ້ອມກັບການສະເໜີຂອງລັດຖະບານຕໍ່ກອງປະຊຸມ ເຊິ່ງມີຫລາຍດ້ານ ລັດຖະບານກໍມີຄວາມພະຍາຍາມເຮັດໃຫ້ມີຜົນສຳເລັດເປັນຢ່າງດີ ແຕ່ໄປຄຽງຄູ່ກັບຜົນສຳເລັດທີ່ກ່າວມານັ້ນ,ຂ້າພະເຈົ້າເຫັນວ່າຍັງມີບາງດ້ານທີ່ເປັນອັນຫຍຸ້ງຍາກ ແລະ ມີສິ່ງທ້າທາຍທີ່ຈະຕ້ອງໄດ້ເອົາ ໃຈໃສ່ໃນການພັດທະນາເສດຖະກິດ-ສັງຄົມແຫ່ງຊາດ ຄື ເວົ້າເຖິງຄາດໝາຍສູ້ຊົນດ້ານມະຫາພາກຢາກສະເໜີໃຫ້ລັດຖະບານຄົ້ນຄວ້າ, ພິຈາລະນາໃນ 3 ຈຸດຄືຢາກໃຫ້ປັບປຸງດ້ານນະໂຍບາຍສິດທິທາງການຜະລິດ ເປັນຕົ້ນແມ່ນນະໂຍບາຍໃນການລົງທຶນການສະໜອງແຫລ່ງທຶນເຂົ້າໃນໂຄງການບູລິມະສິດຕ່າງໆ. ພ້ອມກັນນັ້ນ, ກໍແມ່ນສົ່ງເສີມການຕະຫລາດສົ່ງອອກ ຢາກໃຫ້ສົ່ງເສີມການຜະລິດພາຍໃນໃຫ້ມີຄວາມສາມາດສົ່ງອອກເພື່ອເຮັດໃຫ້ການຂາດດຸນ ແລະຫລຸດຜ່ອນການນຳເຂົ້າ ເຊິ່ງຜ່ານມາຖືວ່າໄດ້ວາງນະໂຍບາຍແລ້ວແຕ່ວ່າຍັງມີລັກສະນະລວມໆບໍ່ທັນກາຍເປັນຕົນເປັນໂຕເທົ່າທີ່ຄວນ ແລະ ເລື່ອງປັບປຸງນະໂຍບາຍການເງິນ-ເງິນຕາ ກໍຄວນໃຫ້ມີຄວາມຄ່ອງຕົວ.

       ທ່ານ ຈອມສີ ລັດຕະນະປັນ  ກ່າວຕື່ມອີກວ່າ:ກ່ຽວກັບວຽກຈຸດສຸມ 3 ເດືອນທ້າຍປີ ຂ້າພະເຈົ້າຢາກຢີບຍົກບາງບັນຫາ ທີ່ປະທານກອງປະຊຸມໄດ້ເຈາະຈີ້ມ ໂດຍສະເພາະແມ່ນຕໍ່ກັບການລົງທຶນຂອງພາກລັດ ອັນນີ້ກໍເຫັນວ່າຄວນສືບຕໍ່ແກ້ໄຂປັບປຸງຕາມນະໂຍບາຍຕ່າງໆ ໃຫ້ມີຄວາມສອດຄ່ອງກັບສະພາບເງື່ອນໄຂປັດຈຸບັນເພື່ອຫລີກລ່ຽງບັນຫາໜີ້ສິນສາທາລະນະທີ່ຈະເພີ່ມຂຶ້ນ ແລະລັດຖະບານຄວນຈະສືບຕໍ່ມີນະໂຍບາຍປຸກລະດົມແຫລ່ງທຶນຈາກພາຍໃນ ແລະ ຕ່າງປະເທດເອີ້ນເຂົາເຈົ້າເຂົ້າມາລົງທຶນໃນຂະແໜງການຕ່າງໆຢ່າງເໝາະສົມ.

         ກ່ຽວກັບວຽກຈຸດສຸມຕິດພັນກັບຂະແໜງວັດທະນາທຳ-ສັງຄົມ ກໍຄືດັ່ງທີ່ພວກເຮົາຮູ້ນຳກັນ ເປັນຕົ້ນແມ່ນຂະແໜງການສຶກສາ ກໍຢາກໃຫ້ມີການສົ່ງເສີມການຮຽນ-ການສອນ ດ້ວຍລະບົບທາງໄກຢ່າງທົ່ວເຖິງ ເຊິ່ງມາຮອດເວລານີ້ເວົ້າລວມແລ້ວຢູ່ແຂວງບໍ່ແກ້ວແມ່ນຍັງບໍ່ທັນໄດ້ເປີດໂຮງຮຽນເທື່ອ ແລະ ຈຸດຫ່າງໄກກໍໄດ້ຢຸດສອນ, ຢຸດຮຽນໄປເລີຍ ຍ້ອນວ່າດົນໆກໍເກີດມີການຕິດເຊື້ອ 1-2 ກໍລະນີ ເຊິ່ງຕິດມາໄດ້ແນວໃດນັ້ນ ພັດບໍ່ສາມາດລະບຸສາເຫດການຕິດໄດ້ ຈຶ່ງຢາກໃຫ້ສົ່ງເສີມການຮຽນແບບທາງໄກໃຫ້ທົ່ວເຖິງ ແຕ່ບໍ່ຮູ້ວ່າຈະມີເງື່ອນໄຂແນວໃດ ເພື່ອກະຕຸກຊຸກຍູ້ການຮຽນດັ່ງກ່າວໃຫ້ເປັນໄປໄດ້ດີ.

         ສ່ວນວຽກຂົງເຂດສາທາລະນະສຸກ ເປັນຕົ້ນແມ່ນການປະຕິບັດມາດຕະການຕ້ານການແຜ່ລະບາດຂອງພະຍາດໂຄວິດ-19 ຢາກໃຫ້ສຸມໃສ່ຄືດັ່ງທິດລວມໄດ້ວາງໄວ້ ເຊັ່ນ ການສັກວັກຊີນໃຫ້ທົ່ວເຖິງ ເຊິ່ງປັດຈຸບັນການສັກວັກຊີນຢູ່ແຂວງບໍ່ແກ້ວ ເຂັມ 1 ແມ່ນໄດ້ 40 ປາຍເປີເຊັນ, ເຂັມ 2 ແມ່ນໄດ້30 ປາຍເປີເຊັນ ແລະ ໄດ້ຍິນຂ່າວວ່າລັດຖະບານໄດ້ຮັບວັກຊິນຈາກ ສປຈີນ ສະນັ້ນ, ພວກເຮົາກໍພ້ອມກັນຊຸກຍູ້ຊ່ວຍເຫລືອລັດຖະບານ ປຸກລະດົມໃຫ້ປະຊາຊົນໄດ້ສັກວັກຊີນຢ່າງທົ່ວເຖິງ ພວກເຮົາຈຶ່ງຈະສາມາດຄວບຄຸມການແຜ່ລະບາດໄດ້ ແລະ ເອົາໃຈໃສ່ຕໍ່ການເຄື່ອນຍ້າຍແຮງງານ ໂດຍສະເພາະການເຄື່ອນຍ້າຍແຮງງານເຂົ້າ-ອອກຢູ່ແຂວງບໍ່ແກ້ວ ປັດຈຸບັນພົບຄວາມຫຍຸ້ງຍາກທີ່ສຸດ ເພາະນະໂຍບາຍລວມ, ຄຳສັ່ງ, ມາດຕະການລວມແມ່ນຫ້າມເຄື່ອນຍ້າຍ ແຕ່ຍັງມີບາງກໍລະນີ ພັດມີໃບນຳສົ່ງຂອງ​ຄະ​ນະສະເພາະກິດຈາກຕົ້ນທາງໄປຫາປາຍທາງ ເຊິ່ງເຫັນວ່າຫາກຍັງສືບຕໍ່ນຳແຮງງານເຂົ້າໄປຢ່າງຖືກຕ້ອງໃນກໍລະນີແບບນີ້ ພວກເຮົາອາດຈະບໍ່ສາມາດຢຸດຢັ້ງການແຜ່ລະບາດຂອງ​ພະ​ຍາດ​ໂຄວິດ-19 ໄດ້. ສະນັ້ນ, ​ການ​ເຄື່ອນ​ຍ້າຍ​ແຮງ​ງານ​ຈຶ່ງຢາກໃຫ້ມີຈຸດສຸມ ໂດຍສຸມໃສ່ແຮງ​ງານ​ທີ່​ຈ​ຳ​ເປັນເທົ່າ​ນັ້ນ​ ເຊັ່ນ ການສ້າງສະໜາມບິນ, ສຸມໃສ່ການຜະລິດ ຫລື ການບໍລິການດ້ານໃດດ້ານໜຶ່ງທີ່ມີຄວາມຕ້ອງການແຮງງານ ​ເພ​າະເຫັນ​ວ່າພາກສ່ວນທີ່ໄປສ່ວນຫລາຍແມ່ນໜຸ່ມ-ສາວ ທີ່ຍັງບໍ່ມີຄວາມຮູ້ດ້ານວິຊາສະເພາະເລິກເຊິ່ງປານໃດ.