ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR
         (ສພຊ) ຕອນບ່າຍຂອງວັນທີ 17 ພະຈິກ 2021, ສະຫາຍ ຄໍາຈັນ ໂສຕາປະເສີດ ປະທານກຳມາທິການບັນດາເຜົ່າ (ກບຜ) ສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ພົບປະທາງໄກກັບສະຫາຍ ປາຍ ຊຸນຫລີ ປະທານກຳມາທິການຊົນເຜົ່າ, ສະພາຜູ້ແທນປະຊາຊົນທົ່ວປະເທດ ແຫ່ງ ສປຈີນ.
          ໃນການພົບປະທາງໄກຄັ້ງນີ້, ສອງຝ່າຍ ໄດ້ແຈ້ງໃຫ້ກັນຊາບກ່ຽວກັບສະພາບການພົ້ນເດັ່ນຂອງແຕ່ລະປະເທດ, ຕີລາຄາການພົວພັນຮ່ວມມື ລະຫວ່າງ ສອງປະເທດລາວ-ຈີນ, ຈີນ-ລາວ, ການພົວພັນຮ່ວມມື ລະຫວ່າງ ສອງອົງການນິຕິບັນຍັດ ເວົ້າລວມ, ເວົ້າສະເພາະ ລະຫວ່າງ ກບຜ ຂອງສະພາແຫ່ງຊາດລາວ ແລະ ກຳມາທິການຊົນເຜົ່າ ຂອງສະພາຜູ້ແທນປະ ຊາຊົນທົ່ວປະເທດຈີນ.
ສະຫາຍ ປາຍ ຊຸນຫຼີ, ໄດ້ແຈ້ງສະພາບການ ກ່ຽວກັບສະພາຜູ້ແທນປະຊາຊົນທົ່ວປະເທດຈີນ ແລະ ກໍາມາທິການຊົນເຜົ່າຂອງຈີນໃຫ້ຊາບ, ແລກປ່ຽນບົດຮຽນກ່ຽວກັບ ການສ້າງກົດໝາຍ, ນິຕິກໍາຕ່າງໆທີ່ກ່ຽວພັນກັບບັນດາເຜົ່າ ແລະ ບົດຮຽນການແກ້ໄຂຄວາມທຸກຍາກຂອງ ສປ ຈີນ. ນອກຈາກນີ້, ສະຫາຍ ໄດ້ຕີລາຄາສູງຕໍ່ສາຍພົວພັນສອງປະເທດ ຈີນ-ລາວ, ລາວ-ຈີນ ແລະ ມີຄວາມຍິນດີຮ່ວມກັບຝ່າຍລາວ ເພື່ອເສີມຂະຫຍາຍສາຍພົວພັນຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດ ກໍຄື ລະຫວ່າງ ກບຜ ສະພາແຫ່ງຊາດລາວ ກັບ ກຳມາທິການຊົນເຜົ່າ, ສະພາຜູ້ແທນປະຊາຊົນທົ່ວປະເທດຈີນ.
            ສະຫາຍ ຄຳຈັນ ໂສຕາປະເສີດ ໄດ້ແຈ້ງສະພາບຂອງຊົນເຜົ່າ ໃນ ສປປ ລາວ ແລະ ຂອງ ກບຜ ສະພາແຫ່ງຊາດ, ການແຜ່ລະບາດຂອງພະຍາດໂຄວິດ-19 ຢູ່ ສປປລາວ ໃນປັດຈຸບັນ. ພ້ອມນັ້ນ, ຍັງໄດ້ສະແດງຄວາມຂອບໃຈຕໍ່ພັກ, ລັດຖະບານ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫລືອ ດ້ານການແພດ, ຢາວັກຊີນ ແລະ ອຸປະກອນຕ່າງໆ ເພື່ອຮັບມືກັບພະຍາດດັ່ງກ່າວ. ສະຫາຍ ຍັງໄດ້ຕີລາຄາຕໍ່ການພົວພັນຮ່ວມມື ລະຫວ່າງ ສອງກໍາມາທິການເຜົ່າ ຂອງສອງສະພາລາວ-ຈີນ ໃນໄລຍະຜ່ານມາ ແລະ ປຶກສາຫາລື ກ່ຽວກັບທິດທາງຮ່ວມມືໃນຕໍ່ໜ້າ ໂດຍຈະສືບຕໍ່ຜັນຂະຫຍາຍຜົນການພົບປະທາງໄກ ຂອງສອງປະທານສະພາລາວ-ຈີນ ໃນເດືອນພຶດສະພາ 2021 ທີ່ຜ່ານມາ ແລະ ພ້ອມກັນປຶກສາຫາລື ກ່ຽວກັບທິດທາງໃນການເສີມຂະຫຍາຍສາຍພົວພັນ ລະຫວ່າງສອງອົງການນິຕິບັນຍັດເວົ້າລວມ, ເວົ້າສະເພາະ ລະຫວ່າງສອງກຳມາທິການເຜົ່າ ເຊິ່ງເປັນການປະກອບສ່ວນເສີມຂະຫຍາຍສາຍພົວພັນຍຸດທະສາດຮອບດ້ານ, ໝັ້ນຄົງ, ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາລາວ-ຈີນ ໃຫ້ມີປະສິດທິຜົນຍິ່ງໆຂຶ້ນ.
(ພາບ ແລະ ຂ່າວ: ສົມນຶກ ແກ້ວໄຊຍະຈັກ)