ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ໂດຍການເປັນປະທານຂອງສະຫາຍ ພົຕ. ປອ. ວົງສັກ ພັນທະວົງ ຮັກສາການເລຂາໜ່ວຍພັກຮາກຖານກໍາມາທິການ ປກຊ-ປກສ; ເຂົ້າຮ່ວມມີສະຫາຍຮັກສາການຮອງເລຂາໜ່ວຍພັກ, ຮັກສາການກຳມະການໜ່ວຍພັກ, ຜູ້ຕາງໜ້າຈາກຫ້ອງການຊ່ວຍວຽກງານບໍລິຫານພັກສະພາແຫ່ງຊາດ, ຜູ້ຕາງໜ້າຈາກອົງການຈັດຕັ້ງມະຫາຊົນ, ສະມາຊິກພັກສົມບູນ-ສຳຮອງ, ສະມາຊິກພັກອະວຸໂສບຳນານພາຍໃນໜ່ວຍພັກ ແລະ ແຂກຖືກເຊີນ.

ກອງປະຊຸມໄດ້ຮັບຟັງ ແລະ ຮັບຮອງເອົາບົດລາຍງານການເມືອງ ແລະ ທິດທາງແຜນການໃນຕໍ່ໜ້າ ຂອງໜ່ວຍພັກຮາກຖານ; ບົດສຳຫລວດ ການນຳພາຂອງຄະນະໜ່ວຍພັກຮາກຖານກຳມາທິການ ປກຊ-ປກສ ຊຸດເກົ່າ; ພ້ອມນັ້ນ, ຜູ້ແທນສົມບູນຂອງກອງປະຊຸມຍັງໄດ້ສຸມໃສ່ຄົ້ນຄວ້າຢ່າງເລິກເຊິ່ງໃນການນຳໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກຮາກຖານກໍາມາທິການ ປກຊ-ປກສ ຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ໄດ້ກຳນົດໄວ້; ໂດຍກອງປະຊຸມໃຫຍ່ໜ່ວຍພັກຮາກຖານກໍາມາທິການ ປກຊ-ປກສ ມີຜູ້ສະໝັກຮັບເລືອກຕັ້ງ 7 ສະຫາຍ ແລະ ໄດ້ຮັບການເລືອກຕັ້ງເປັນຄະນະພັກຊຸດໃໝ່ 5  ສະຫາຍ ເຊິ່ງກອງປະຊຸມຄັ້ງປະຖົມມະລືກຂອງໜ່ວຍພັກຮາກຖານ ຄັ້ງທີ IV ໄດ້ຕົກລົງເຫັນດີຄື: ສະຫາຍ ປອ. ວົງສັກ ພັນທະວົງ ເປັນເລຂາ, ສະຫາຍ ພົຈວ. ມາລາ ວິລະຈິດ ເປັນຮອງເລຂາ, ສະຫາຍ ພົຈວ. ສົມວັນ ທໍາມະໄຊ ເປັນປະທານກວດກາ, ສະຫາຍ ພັອ. ແສງທອງ ທໍາມະເທວາ ແລະ ສະຫາຍ ພັຕ. ສະເໜີນ້ອຍ ສີສະແຫວງສຸກ ເປັນຮອງປະທານກວດກາ; ພ້ອມນັ້ນ, ກອງປະຊຸມຍັງໄດ້ເລືອກຕັ້ງເອົາຜູ້ແທນສົມບູນ, ສຳຮອງ ຂອງໜ່ວຍພັກຮາກຖານ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ IV ຂອງອົງຄະນະພັກສະພາແຫ່ງຊາດ ທັງໝົດ 16 ສະຫາຍ, ເລືອກເອົາ 14 ສະຫາຍ.

ກອງປະຊຸມຍັງໄດ້ຮັບຟັງການໂອ້ຊີ້ທິດເຍືອງທາງແກ່ການດໍາລົງຊີວິດການເມືອງ ຂອງບັນດາສະມາຊິກພັກຈາກ  ສະຫາຍ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ເພື່ອໃຫ້ຄະນະໜ່ວຍພັກ ແລະ ສະມາຊິກໜ່ວຍພັກກໍາມາທິການ ປກຊ-ປກສ ນໍາໄປຄົ້ນຄົ້ວາຈັດຕັ້ງຜັນຂະຫຍາຍເຂົ້າສູ່ພຶດຕິກໍາຕົວຈິງ ເພື່ອເຮັດໃຫ້ໜ່ວຍພັກມີຄວາມປອດໃສ, ເຂັ້ມແຂງ, ໜັກແໜ້ນ ແລະ ເປັນເສນາທິການໃຫ້ແກ່ຄະນະບໍລິຫານງານພັກສະພາແຫ່ງຊາດ ສະຫາຍມີຄວາມເຊື່ອໝັ້ນຕໍ່ຄະນະພັກຮາກຖານຊຸດໃໝ່ທີ່ຈະສືບຕໍ່ ນໍາພາ-ຊີ້ນໍາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV  ຂອງຄະນະໜ່ວຍພັກຮາກຖານກໍາມາທິການປ້ອງກັນຊາດ-ປ້ອງກັນຄວາມສະຫງົບ ໃຫ້ຍາດໄດ້ຜົນງານ ແລະ ມີຜົນສໍາເລັດໃໝ່ຍິ່ງໃຫຍ່ກວ່າເກົ່າ.