ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 7 ກັນຍາ 2021 ທີ່ສະພາແຫ່ງຊາດ,ກອງປະຊຸມໃຫຍ່ຄັ້ງທີ I ຂອງໜ່ວຍພັກກົມການເງິນ ຄະນະເລຂາທິການສະພາແຫ່ງຊາດໄດ້ໄຂຂຶ້ນ ແລະ ສຳເລັດລົງດ້ວຍຜົນສຳເລັດອັນຈົບງາມ ພາຍໃຕ້ການເປັນປະທານຂອງສະຫາຍບຸນທັນ ບຸນວິໄລ ຮັກສາການເລຂາໜ່ວຍພັກກົມການເງິນ,ຮອງເລຂາທິການສະພາແຫ່ງຊາດ; ໂດຍການເຂົ້າຮ່ວມຂອງສະຫາຍ ນາງ ປິ່ງຄຳ ລາຊະສິມມາ ກໍາມະການສູນກາງພັກ, ກໍາມະການຄະນະບໍລິຫານງານພັກ,ເລຂາຄະນະພັກຮາກຖານຄະນະເລຂາທິການສະພາແຫ່ງຊາດ;ມີບັນດາຄະນະພັກຮາກຖານຄະນະເລຂາທິການສະພາແຫ່ງຊາດ, ຜູ້ຕາງໜ້າຄະນະຊ່ວຍວຽກຄະນະພັກສະພາແຫ່ງຊາດ, ສະມາຊິກພັກສົມບູນ-ສຳຮອງ ແລະແຂກຖືກເຊີນ.

ກອງປະຊຸມໄດ້ຮັບຟັງແລະ ຮັບ​ຮອງ​ເອົາບົດລາຍງານການເມືອງຂອງໜ່ວຍພັກ ແລະທິດທາງແຜນການໃນຕໍ່ໜ້າ;ບົດສຳຫລວດການນຳພາຂອງຄະນະໜ່ວຍພັກກົມການເງິນຊຸດເກົ່າ. ຈາກນັ້ນ, ຜູ້​ແທນ​ສົມບູນກອງ​ປະຊຸມ​ໃຫຍ່ ​ໄດ້​​ໃຊ້​ສິດ​ປະຊາທິປະ​ໄຕ​ຂອງ​ຕົນ​ປ່ອນ​ບັດ​​ເລືອກຕັ້ງ​ເອົາ​ຄະນະໜ່ວຍ​​ພັກກົມການເງິນ ສະ​​ໄໝ​ທີ I ບົນ​ພື້ນຖານ​ຫລັກການລວມສູນ​ປະຊາທິປະ​ໄຕ​ ທັງ​ຖືກຕ້ອງ​ສອດຄ່ອງ​ກັບ​ມາດຖານ​ເງື່ອນ​ໄຂ​ທີ່​ໄດ້​ກຳນົດ​ໄວ້ ເຊິ່​ງມີ​ຜູ້ອອກຮັບ​ສະໝັກ​ເລືອກ​ຕັ້ງ 3 ສະຫາຍຍິງ 2 ສະຫາຍ; ກອງ​ປະຊຸມ​ໄດ້ເລືອກຕັ້ງເອົາຄະນະໜ່ວຍພັກຊຸດ​ໃໝ່ ໄດ້ຈໍານວນ​ 2 ສະຫາຍແລະ ໄດ້ເປີດກອງປະຊຸມຄັ້ງປະຖົມມະລືກຄົບຄະນະໜ່ວຍພັກໄດ້ເປັນເອກະພາບກັນເລືອກ​ເອົາ​ສະຫາຍ ບຸນທັນ ບຸນວິໄລ ເປັນເລຂາໜ່ວຍພັກ, ສະຫາຍ ນາງດາວເພັດ ສີຫາວົງ ເປັນຮອງເລຂາ ແລະ ຮັບຜິດຊອບວຽກງານກວດກາໜ່ວຍພັກ.

ໂອກາດດັ່ງກ່າວ, ສະຫາຍ ນາງ ປິ່ງຄໍາ ລາຊະສິມມາໄດ້ມີຄໍາເຫັນໂອ້ລົມຕໍ່ກອງປະຊຸມ ເຊິ່ງສະຫາຍໄດ້ຕີລາຄາສູງຕໍ່ຜົນງານການຊີ້ນໍານໍາພາຂອງໜ່ວຍພັກໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃນໄລຍະຜ່ານມາ, ສະຫາຍໄດ້ຍົກໃຫ້ເຫັນບາງບັນຫາຈຸດອ່ອນ ຂໍ້ຄົງຄ້າງທີ່ຈະໄດ້ສືບຕໍ່ແກ້ໄຂ ແລະ ໄດ້ໃຫ້ທິດຊີ້ນໍາຕໍ່ໜ່ວຍພັກຊຸດໃໝ່ ສືບຕໍ່ນໍາພາໃນການປະຕິບັດວຽກງານຕາມພາລະບົດບາດ ແລະ ຄວາມຮັບຜິດຊອບຂອງໜ່ວຍພັກເປັນຕົ້ນແມ່ນນໍາພາກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມ 5 ຫລັກການ, 3ທິດນໍາຂອງພັກ, ປັບປຸງກົນໄກການປະສານງານໃຫ້ມີຄຸນນະພາບດີຂຶ້ນ. ພ້ອມນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໃຍຕໍ່ວຽກງານກໍ່ສ້າງ ແລະຂະຫຍາຍພັກ, ສ້າງພັກປອດໃສ, ເຂັ້ມແຂງ, ໜັກແໜ້ນ ໃຫ້ມີແຜນການຢ່າງລະອຽດ ເພື່ອໃຫ້ບັນລຸຕາມຈຸດປະສົງເປົ້າໝາຍ, ຖືກຕ້ອງຕາມຂັ້ນຕອນແລະ ລະບຽບຫລັກການ.

(ສອນສັກ ວັນວິໄຊ)