ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 4 ກຸມພາ 2021 ທີ່ຫໍປະຊຸມສະພາແຫ່ງຊາດ (ສພຊ) ຄະນະກໍາມະການເລືອກຕັ້ງລະດັບຊາດ ໄດ້ຈັດກອງປະຊຸມເຝິກອົບຮົມຍົກຂີດຄວາມສາມາດໃຫ້ແກ່ບຸກຄະລາກອນເພດຍິງທົ່ວປະເທດ ແລະ ເພດຊາຍອ້ອມຂ້າງສູນກາງ ທີ່ຈະລົງເລືອກຕັ້ງເປັນສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນແຂວງ (ສສຂ) ຊຸດທີ ll ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ, ຜູ້ປະຈໍາການຄະນະກໍາມະການເລືອກຕັ້ງລະດັບຊາດ, ເຂົ້າຮ່ວມມີທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ, ຄະນະກໍາມະການເລືອກຕັ້ງລະດັບຊາດ, ຮອງຫົວໜ້າອະນຸກໍາມະການໂຄສະນາ ແລະ ປຸກລະດົມຂະບວນການ ແລະ ທ່ານ ນາງ ບຸນຍົງ ບຸບຜາ ອະດີດຮອງປະທານກໍາມາທິການການຕ່າງປະເທດຂອງສະພາແຫ່ງຊາດ ແລະ ອະດີດສະມາຊິກສະພາແຫ່ງຊາດ, ມີບຸກຄະລາກອນເພດຍິງ ແລະ ເພດຊາຍອ້ອມຂ້າງສູນກາງເຂົ້າຮ່ວມ.

ຈຸດປະສົງຂອງການຈັດກອງປະຊຸມເຝິກອົບຮົມໃນຄັ້ງນີ້ ເພື່ອເປັນການກະກຽມຄວາມພ້ອມດ້ານຕ່າງໆ ໃຫ້ແກ່ບຸກຄະລາກອນເພດຍິງທີ່ຈະລົງສະໝັກຮັບເລືອກຕັ້ງເປັນ ສສຊ ຊຸດທີ IX ແລະ ສສຂ ຊຸດທີ ll ຮັບຮູ້ ແລະ ເຂົ້າໃຈກ່ຽວກັບພາລະບົດບາດ, ສິດ ແລະ ໜ້າທີ່ຂອງ ສສຊ ແລະ ສສຂ ໃຫ້ມີຄວາມເລິກເຊິ່ງ ແລະ ເພື່ອເປັນບ່ອນອີງໃຫ້ແກ່ຄະນະຮັບຜິດຊອບໃນການຕິດຕາມ, ຊຸກຍູ້ວຽກງານ, ແກ້ໄຂວຽກງານຕ່າງໆ ຮັບປະກັນເຮັດໃຫ້ການກະກຽມ ແລະ ດໍາເນີນກອງປະຊຸມເຝິກອົບຮົມສໍາເລັດຕາມແຜນການທີ່ວາງໄວ້.

ກອງປະຊຸມ ໄດ້ຮັບຟັງການສະເໜີຫົວຂໍ້ບາງເນື້ອໃນທີ່ສໍາຄັນກ່ຽວກັບວິທີໂຄສະນາພົບປະປະຊາຊົນຂອງຜູ້ສະໝັກເລືອກຕັ້ງ; ບົດບາດແມ່ຍິງໃນເວທີການເມືອງ ແລະ ບາງບັນຫາທີ່ຜູ້ສະໝັກເພດຍິງຄວນເອົາໃຈໃສ່ ໃນເວລາພົບປະກັບຜູ້ມີສິດເລືອກຕັ້ງ ພ້ອມທັງສົນທະນາ ແລກປ່ຽນຄໍາຄິດຄໍາເຫັນໃສ່ຫົວຂໍ້ຕ່າງໆ ຈາກນັກວິທະຍາກອນ ແລະ ນັກສໍາມະນາກອນ.

ໃນພິທີປິດກອງປະຊຸມ ທ່ານ ນາງ ສີໃສ ລືເດດມູນສອນ ໄດ້ມີຄໍາເຫັນໂອ້ລົມຕໍ່ກອງປະຊຸມ ໂດຍທ່ານໄດ້ສະເໜີໃຫ້ຜູ້ແທນກອງປະຊຸມໃນຄັ້ງນີ້ ຮີບຮ້ອນນໍາເອົາເນື້ອໃນຈິດໃຈ ຄວາມຮູ້ທີ່ໄດ້ໃນຄັ້ງນີ້ ລົງໄປເຜີຍແຜ່ໃນເຂດສະໝັກເລືອກຕັ້ງຂອງຕົນກ່ອນວັນເລືອກຕັ້ງ ພ້ອມທັງແນະນໍາລາຍລະອຽດກ່ຽວກັບການພົບປະກັບປະຊາຊົນຂອງຜູ້ທີ່ສະໝັກເລືອກຕັ້ງເປັນ ສສຊ ແລະ ສສຂ ທີ່ເປັນເພດຍິງ ວ່າຄວນວາງຕົວ, ແຕ່ງຕົວແນວໃດໃຫ້ເໝາະສົມ ແລະ ເນັ້ນໃຫ້ວາງແຜນຂຽນບົດທີ່ຈະນໍາໄປສະເໜີໃຫ້ລະອຽດ, ທົດລອງກ່ອນໄປພົບປະກັບປະຊາຊົນຕົວຈິງ.

ແຫຼ່ງຂ່າວທີ່ມາ: ສະພາແຫ່ງຊາດ