ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

​ທ່ານຮອງປະທານ ສ​ພ​ຊ ໄດ້ພົບປະ ແລະ ເຮັດວຽກກັບຄະນະນຳຂັ້ນແຂວງ,  ສະພາປະຊາຊົນແຂວງ, ພະນັກງານປະຕິວັດອາວຸໂສ ແລະ ອົງການຈັດຕັ້ງມະຫາຊົນຂອງແຂວງ. ໂອ​ກາດດັ່ງກ່າວ, ທ່ານໄດ້ໂອ້ລົມ ແລະ ມີຄຳຄິດເຫັນບາງບັນຫາຕໍ່ຄະນະພັກ-ຄະນະນຳ, ສະພາປະຊາຊົນແຂວງ, ອົງການຈັດຕັ້ງມະຫາຊົນ, ອົງການຈັດຕັ້ງພາຄີ ແລະ ພະນັກງານຫລັກແຫລ່ງ ເຊິ່ງທ່ານໄດ້ຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານທີ່ແຂວງຍາດມາໄດ້ໃນໄລຍະຜ່ານມາ ພ້ອມທັງໄດ້ຫວນຄືນມູນເຊື້ອອັນສະຫງ່າລາສີ, ຜົນງານທີ່ພົ້ນເດັ່ນ, ພາລະບົດບາດ, ສິດ ແລະ ໜ້າທີ່ຂອງ ສ​ພ​ຊ; ພ້ອມດຽວກັນນັ້ນ, ທ່ານໄດ້ເນັ້ນຫລາຍບັນຫາໃຫ້ບັນດາການນໍາແຂວງຊຽງຂວາງ ຈົ່ງເພີ່ມທະວີກ້ອນກຳລັງມະຫາສາມັກຄີທຸກຊົນເຜົ່າ, ຊັ້ນຄົນ, ສາສະຫນາ, ເພດ, ໄວ ໃຫ້ໜັກແໜ້ນ; ຄຽງຄູ່ກັນນັ້ນ ຕ້ອງຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບສຸກຂອງສັງຄົມ; ເອົາໃຈໃສ່ໂຄສະນາປຸກລະດົມ, ເສີມຂະຫຍາຍສິດເປັນເຈົ້າຂອງປະຊາຊົນໃນການປະຕິບັດແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ, ຄົ້ນຄວ້າຜັນຂະຫຍາຍບັນດາແນວທາງນະໂຍຂອງບາຍພັກ-ລັດແລ້ວຫັນເປັນແຜນງານ, ເປັນໂຄງການລະອຽດ ທີ່ແທດເໝາະກັບສະພາບຕົວຈິງ ແລະ ທ່າແຮງບົ່ມຊ້ອນຂອງແຂວງ; ພ້ອມນັ້ນແຂວງ ຕ້ອງຖືເອົາສໍາຄັນໃນການຫັນລົງຮາກຖານທ້ອງຖິ່ນ ແລະ ເອົາໃຈໃສ່ວຽກງານການສຶກສາອົບຮົມການເມືອງ-ແນວຄິດຂອງຖັນແຖວພະນັກງານຫຼັກແຫຼ່ງ, ສະມາຊິກພັກໃຫ້ກຳແໜ້ນ ແລະ ເຊື່ອມຊຶມແນວທາງນະໂຍບາຍຂອງພັກຢ່າງເລິກເຊິ່ງ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ໃນການແກ້ໄຂປະກົດການຫຍໍ້ທໍ້ໃນສັງຄົມ ບໍ່ວ່າຈະເປັນການສະກັດກັ້ນການຄ້າຂາຍເຖື່ອນ, ການຄ້າຢາເສບຕິດ, ບັນຫາການຄ້າມະນຸດ ແລະບັນຫາຕາມເຂດຊາຍແດນ ແລະ ບັນຫາອື່ນໆໃຫ້ໝົດໄປ; ຄຽງຄູ່ກັນນັ້ນ, ຕ້ອງມີສະຕິລະວັງຕົວຕໍ່ການເຄື່ອນໄຫວຂອງກຸ່ມຄົນທີ່ບໍ່ຫວັງດີສວຍໃຊ້ວຽກງານຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີ.

smart

ພ້ອມກັນນີ້, ທ່ານຍັງໄດ້ຮຽກຮ້ອງໃຫ້ຄະນະພັກເອົາໃຈໃສ່ຊີ້ນໍາ-ນໍາພາກະກຽມຮອບດ້ານໃຫ້ແກ່ກອງປະຊຸມໃຫຍ່ 3 ຂັ້ນ; ສືບຕໍ່ເອົາໃຈໃສ່ກໍາແໜ້ນ ແລະ ສຶກສາອົບຮົມປະຊາຊົນລາວບັນດາເຜົ່າປະຕີິບັດຕາມແນວທາງນະໂຍບາຍຂອງພັກ, ລະບຽບກົດໝາຍ, ໂຄສະນາມູນເຊື້ອຄວາມສາມັກຄີ, ມູນເຊື້ອທາງວັດທະນະທໍາທີ່ເປັນເອກະລັກຂອງຊົນເຜົ່າຕ່າງໆ ເພື່ອສ້າງໃຫ້ເຂົາເຈົ້າມີຄວາມທະນົງໃຈ ແລະ ພູມໃຈໃນຄວາມເປັນຊົນເຜົ່າຂອງຕົນເອງເວົ້າລວມ ເວົ້າສະເພາະໃຫ້ພະນັກງານຫລັກແຫລ່ງ, ຜູ້ຊົງຄຸນວຸດທິ, ພະນັກງານປະຕິວັດ, ທະຫານ, ຕໍາຫລວດ ຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ເຕົ້າໂຮມຄວາມສາມັກຄີເປັນປຶກແຜ່ນ ແລະ ຕັ້ງໜ້າປຸກລະດົມຂົນຂວາຍປະຊາຊົນບັນດາເຜົ່າ ໃນການເຂົ້າຮ່ວມຂະບວນການຕ່າງໆທີ່ສຳຄັນຂອງຊາດ ແລະ ປະກອບສ່ວນຢ່າງຕັ້ງໜ້າຈັດຕັ້ງແຜນພັດທະນາເສດຖະກິດ-ສັງຄົມ ຂອງແຂວງໃຫ້ບັນລຸຕາມຄາດໝາຍ ກໍຄືວຽກງານ ສ​ພ​ຊ ໃຫ້ມີການປ່ຽນແປງໃໝ່ທີ່ຕັ້ງໜ້າ ແລະ ນັບມື້ດີຂຶ້ນເທື່ອລະກ້າວ.

ໂອ​ກາດ​ດຽວ​ກັນ​ນີ້, ຮອງປະທານ ສ​ພ​ຊ ພ້ອມ​ດ້ວຍຄະນະ ຍັງໄດ້ໄປຢ້ຽມຢາມກຸ່ມການຜະລິດຊາພູສັນ 1000 ປີ ບ້ານອໍ້ອັ່ນ ແລະ ຢ້ຽມຢາມໂຮງງານຜະລິດຫີນກຣານິດ ບ້ານລີ່ ເມືອງແປກ, ພື້ນທີ່ທຳການຜະລິດຢູ່ເມືອງໝອກ, ພ້ອມກັນນັ້ນຍັງໄດ້ໂອ້ລົມປະຊາຊົນຢູ່ ເມືອງໝອກ ບ້ານນ້ຳງາດ ແລະ ລົງເບີ່ງພື້ນທີ່ຂອບເຂດການກໍ່ສ້າງເຂື່ອນໄຟຟ້ານ້ຳໂມ້ 2 ຕື່ມອີກ.

(ອານ​ຸ​ສອນ ພູ​ມີ​ທອ​ນ)