ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 27 ກັນຍາຜ່ານມາ, ທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ສະພາປະຊາຊົນນະຄອນຫລວງວຽງຈັນ (ສປນວ) ທີ່ຫ້ອງປະຊຸມສຳນັກງານອົງການປົກຄອງນະຄອນຫລວງ (ນວ) ໂດຍໄດ້ເຮັດວຽກຮ່ວມກັບທ່ານ ອານຸພາບ ຕຸນາລົມ ປະທານ ສປນວ ເຂົ້າຮ່ວມມີບັນດາຫົວໜ້າຄະນະຮັບຜິດ ຊອບວຽກງານເຂດເລືອກຕັ້ງ, ຫົວໜ້າ-ຮອງຫົວໜ້າກົມຈາກ(ສພຊ), ຄະນະປະຈຳ ສປນວ, ຄະນະເລຂາທິການ ສປນວ, ສະມາຊິກ ສະພາປະຊາຊົນນະຄອນຫລວງວຽງຈັນ(ສສນວ) ແລະ ພະແນກການກ່ຽວຂ້ອງເຂົ້າຮ່ວມ.

ການລົງເຄື່ອນໄຫວເຮັດວຽກໃນຄັ້ງນີ້ ແມ່ນເພື່ອແນະນຳການສ້າງນິຕິກຳຂອງ ສປນວ ແລະ ທາບທາມໂຄງປະກອບກົງຈັກ ແລະ ບຸກຄະລາກອນ ຂອງ ສປນວ ຊຸດທີ II ໂດຍສະເພາະແມ່ນການກຳນົດບຸກຄະລາກອນທີ່ຈະເປັນປະທານ, ຮອງປະທານ, ຄະນະປະຈຳ ແລະ ຈຳນວນຂອງ ສສນວທີ່ປະຈຳຢູ່ເຂດເລືອກຕັ້ງຂອງເມືອງຕ່າງໆ ເພື່ອກະກຽມປະກອບເຂົ້າໃນກົງຈັກການຈັດຕັ້ງຂອງ ສປນວ ຊຸດທີ II ເຊິ່ງບັນດາທ່ານທີ່ເຂົ້າຮ່ວມກອງປະຊຸມໄດ້ປະກອບຄຳຄິດຄໍາເຫັນຕໍ່ກົງຈັກການຈັດຕັ້ງ ແລະ ບຸກຄະລາກອນ ຂອງ ສປນວ ຢ່າງກົງໄປກົງມາ ໂດຍຍົກໃຫ້ເຫັນເຖິງດ້ານດີ, ຂໍ້ຄົງຄ້າງ ແລະ ປະສິດທິພາບໃນການເຮັດວຽກຕາມ 3 ພາລະບົດບາດຂອງ ສປນວ ໃນໄລຍະຜ່ານມາ. ຈາກນັ້ນ,ປະທານ ສປນວ ໄດ້ລາຍງານໂດຍຫຍໍ້ກ່ຽວກັບດ້ານດີ, ຂໍ້ຄົງຄ້າງ ໃນການສ້າງ ແລະ ການຈັດຕັ້ງປະຕິບັດນິຕິກຳໃຕ້ກົດໝາຍ ຂອງ ສປນວ ເຊິ່ງທ່ານໄດ້ໃຫ້ຮູ້ວ່າ: ນັບແຕ່ໄດ້ສ້າງຕັ້ງ ສປນວ ຊຸດທີ I ເປັນຕົ້ນມາ, ຄະນະປະຈຳ ສປນວ ສາມາດສ້າງນິຕິກໍາທີ່ເປັນບ່ອນອີງພື້ນຖານໃຫ້ແກ່ການເຄື່ອນໄຫວວຽກງານພາຍໃນຂອງຕົນ ໄດ້ທັງໝົດ 12 ສະບັບ ເຊິ່ງນິຕິກໍາສ່ວນໃຫຍ່ແມ່ນກໍານົດກ່ຽວກັບການຈັດຕັ້ງ ແລະ ການເຄື່ອນໄຫວຂອງຄະນະກຳມະການ, ຄະນະເລຂາທິການ ແລະ ກົງຈັກການຈັດຕັ້ງທີ່ຄະນະປະຈຳ ສປນວ ໄດ້ສ້າງຂຶ້ນ.ໃນໂອກາດດັ່ງກ່າວ, ທ່ານ ສົມພັນ ແພງຄຳມີ ໄດ້ມີຄໍາເຫັນຊີ້ນຳໃຫ້ສ້າງນິຕິກຳໃຕ້ກົດໝາຍເພີ່ມຕື່ມ ແລະ ໄດ້ສະເໜີຮ່າງນິຕິກຳຈຳນວນ 3 ສະບັບ ຕໍ່ກອງປະຊຸມຄື: ຮ່າງມະຕິຂອງຄະນະປະຈຳ ສປນວ ວ່າດ້ວຍການພົບປະປະຊາຊົນ ຂອງ ສສນວ; ຮ່າງມະຕິຂອງຄະນະປະຈໍາ ສປນວ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຂະແໜງຊ່ວຍວຽກຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 1 ແລະ ຮ່າງຂໍ້ຕົກລົງຮ່ວມ ວ່າດ້ວຍການພົວພັນລະຫວ່າງ ສປນວ ກັບອົງການປົກຄອງ ນວ; ຮອງປະທານ ສພຊ ຍັງໄດ້ເນັ້ນໃຫ້ເອົາໃຈໃສ່ເພີ່ມທະວີໃນການຄົ້ນຄວ້ານິຕິກໍາພື້ນຖານ ທີ່ເປັນບ່ອນອີງໃຫ້ແກ່ການເຄື່ອນໄຫວວຽກງານຂອງຕົນ, ການປະສານສົມທົບກັບບັນດາຂະແໜງການກ່ຽວຂ້ອງ ໂດຍສະເພາະກົນໄກປະສານສົມທົບກັບອົງການປົກຄອງ ໃນການພິຈາລະນາແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນໃຫ້ເປັນຮູບປະທໍາຂຶ້ນ ແລະ ເອົາໃຈໃສ່ຍົກລະດັບຂີດຄວາມສາມາດດ້ານວຽກງານວິຊາສະເພາະ ໃຫ້ແກ່ສະມາຊິກສະພາປະຊາຊົນ, ບັນດາບຸກຄະລາກອນ ທີ່ເປັນເສນາທິການຂອງກົງຈັກສະພາປະຊາຊົນ, ປັບປຸງກົນໄກແບບແຜນວິທີການເຮັດວຽກຂອງຕົນ ໃຫ້ແທດເໝາະກັບໜ້າທີ່ການເມືອງໃນໄລຍະໃໝ່ ແລະ ເອົາໃຈໃສ່ສົມທົບກັບອົງການປົກຄອງ ນວ ເພື່ອກຳນົດກົງຈັກການຈັດຕັ້ງ ແລະ ບຸກຄະລາກອນຂອງ ສປນວ ຊຸດທີ I ໃຫ້ສອດຄ່ອງກັບກົດໝາຍ ແລະ ຮັບປະກັນໃຫ້ແກ່ການເປັນອົງການອຳນາດລັດຂັ້ນທ້ອງຖິ່ນ ເພື່ອໃຫ້ມີປະສິດທິພາບດີຂຶ້ນກວ່າເກົ່າ.