ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສ​ພ​ຊ) ໃນວັນທີ 9ກັນຍາ 2021 ຢູ່ທີ່ຫ້ອງປະຊຸມສະພາປະຊາຊົນແຂວງ (ສ​ພ​ຂ)ຊຽງ​ຂວາງ, ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ (ສ​ພ​ຊ) ພ້ອມດ້ວຍຄະນະໄດ້​ເຄື່ອນ​ໄຫວຢ້ຽມຢາມ ແລະເຮັດວຽກຢູ່ ສ​ພ​ຂ ຊຽງຂວາງໂດຍການຕ້ອນຮັບຂອງທ່ານ ບຸນໂຮມ ເທດທານີ ປະທານ ສ​ພ​ຂ;ມີບັນດາຄະນະປະຈໍາ ສ​ພ​ຂ, ຄະນະເລຂາທິການ, ປະທານ-ຮອງປະທານ ສ​ພ​ຂ ຊຸດທີ I, ສະມາຊິກສະພາແຫ່ງຊາດ ປ​ະ​ຈຳ​ເຂດ​ເລືອກ​ຕັ້ງ ຊຸດທີ VIII, ທີມງານທີ່ມາຈາກ​ ສ​ພ​ຊ, ຫົວໜ້າ-ຮອງຫົວໜ້າຂະແໜງ ແລະ ພະນັກງານ ສ​ພ​ຂ ເຂົ້າຮ່ວມ.

ໃນທີ່ປະຊຸມ, ທ່ານບຸນໂຮມ ເທດທານີ ໄດ້ກ່າວຕ້ອນຮັບ ແລະ ລາຍງານສະພາບການຈັດຕັ້ງປະຕິບັດວຽກງານຂອງ ສ​ພ​ຂ ໃນໄລຍະຜ່ານມາເຊິ່ງ​ມີ​ເນື້ອ​ໃນບາງ​ຕອນ​ວ່າ:ພາຍຫລັງສໍາ​ເລັດ​ກອງ​ປະຊຸມ​ຄັ້ງ​ປະຖົມມະລືກຂອງ​ ສ​ພ​ຂ​ຊຸດ​ທີ II, ​ສ​ພ​ຂ ​​ໄດ້​ຮີບ​ຮ້ອນ​ປັບປຸງ​ກົງຈັກ​ການຈັດ​ຕັ້ງ​, ​ເອົາ​ໃສ່​ສຶກສາ​ອົບຮົມ​ການ​ເມືອງ​ແນວ​ຄິດ​ພະນັກງານ-​ລັດຖະກອນຂອງ ສ​ພ​ຂ, ປະຕິບັດ​ພາລະ​ບົດບາດ​ຂອງ​ຕົນ​ຢ່າງ​ຕັ້ງໜ້າ ​ໂດຍ​ສະ​ເພາະ​ແມ່ນ​ການຈັດ​ຕັ້ງ​ເຜີຍ​ແຜ່​ຜົນ​ສໍາ​ເລັດ​ກອງ​ປະຊຸມຄັ້ງ​ປະຖົມ​ມະ​ລືກ​ຂອງ​ ສ​ພ​ຊຊຸດ​ທີ IX  ​ແລະ ​ສ​ພ​ຂ ຊຸດ​ທີ II ຢູ່​ບັນດາ​ເມືອງ​ທັງ 7 ​ເມືອງ​ໃນ​ທົ່ວ​ແຂວງ, ​ໄດ້​ຕິດຕາມ​ຊຸກຍູ້​ອົງການ​ປົກຄ​ອງ​ແຂວງ​ໃນ​ການຈັດ​ຕັ້ງ​ປະຕິບັດ​ແຜ​ນພັດທະນາ​ເສດຖະກິດ-​ສັງຄົມ​ຂອງ​ແຂວງ, ​ ​ແຕ່ລະ​ຄະນະ​ກໍາມະກາ​ນ​ໄດ້​ປັບປຸງ​ພາລະ​ບົດບາດ, ສິດ ​ແລະ ໜ້າທີ່​ຂອງ​ຕົນ​ໃຫ້​ສອດຄ່ອງ​ກັບ​ບັນດາ​ກໍາມາ​ທິການ​ຂອງ​ ສ​ພ​ຊ.

ໂອ​ກາດ​ດັ່ງ​ກ່າວ, ທ່ານຈະເລີນ ເຍຍປາວເຮີ ໄດ້ສະແດງຄວາມຍ້ອງຍໍຊົມ​ເຊີຍ ຕໍ່ຜົນງານທີ່ ສ​ພ​ຂ ສາມາດຈັດຕັ້ງປະຕິບັດໄດ້ໃນໄລຍະຜ່ານມາ ແລະທ່ານມີຄໍາເຫັນໂອ້ລົມຕໍ່ ສ​ພ​ຂ ກໍຄືຄະນະປະຈໍາ ແລະ ພະນັກງານສ​ພ​ຂ ໃຫ້ເອົາໃຈໃສ່ໃນການປະຕິບັດ 3 ພາລະບົດບາດຂອງຕົນ ​ໃຫ້​ຕິດ​ພັນ​ກັບ​ການ​ການ​ແກ້​ໄຂ​ຄວາມ​ຫຍຸ້ງຍາກ​ທາງ​ດ້ານເສດຖະກິດ-​ການ​ເງິນ ​ໃຫ້ສາມາດ​ເພິ່ງ​ຕົນ​ເອງ​ກຸ້ມ​ຕົນ​ເອງ, ​ເອົາ​ໃຈ​ໃສ່​ແກ້​ໄຂ​ບັນຫາ​ຢາ​ເສບ​ຕິ​ດພາຍ​ໃນ​ແຂວງ, ຍົກ​ສູງ​ພາລະ​ບົດບາດ​ຂອງ​ ສ​ພ​ຂ ​ກໍຄື​ສ​ພ​ຊ ​ໃຫ້​ສູງ​ຂຶ້ນ​ກວ່າ​ເກົ່າ ​ແລະ ຮັກສາ​ຄວາມ​ສາມັກຄີ​ພາຍ​ໃນໃຫ້​ເປັນ​ປຶກ​ແຜ່ນ.