ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 15 ແຂວງຈຳປາສັກ ພ້ອມດ້ວຍຄະນະ ໄດ້ເຄື່ອນໄຫວ ແລະ ເຮັດວຽກຢູ່ແຂວງຈຳປາສັກ ເຊິ່ງໃນວັນທີ 11 ກໍລະກົດ 2021 ໄດ້ເຄື່ອນໄຫວຢ້ຽມຢາມໂຄງການເຂດພັດທະນາເສດຖະກິດໃໝ່ ສີທັນດອນ ໂດຍມີທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ, ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ, ມີທ່ານຮອງເຈົ້າແຂວງ, ຄະນະນຳຂອງແຂວງ ແລະ ເມືອງ ພ້ອມດ້ວຍພາກສ່ວນກ່ຽວຂ່ອງເຂົ້າຮ່ວມ.
ໃນໂອກາດນີ້, ທ່ານ ວິນເຊັນ ລີ ປະທານບໍລິສັດຮ່ວມພັດທະນາສີທັນດອນ ຈຳກັດ ໄດ້ລາຍງານໃຫ້ຮູ້ວ່າ: ໂຄງການດັ່ງກ່າວໄດ້ເລີ່ມສ້າງຕັ້ງ ແລະ ລົງທະບຽນແຕ່ປີ 2018 ມີທຶນຈົດທະບຽນ 3.192.000.000.000 ກີບ (ປະມານ 3.200 ລ້ານໂດລາ) ມາຮອດປີ 2021 ໄດ້ລົງທຶນຕົວຈິງ 5.222.976.850 ກີບ (ປະມານ 51.457.900 ໂດລາ) ສ່ວນຂອບເຂດການດຳເນີນທຸລະກິດຂອງບໍລິສັດແມ່ນໄດ້ຮັບອະນຸຍາດຈາກລັດຖະບານລາວ ເຊິ່ງປະກອບມີສູນບັນເທີງຄົບວົງຈອນ 520 ແຫ່ງ, ອະສັງຫາລິມະຊັບ, ໂຮງແຮມ, ຮ້ານອາຫານ, ການທ່ອງທ່ຽວ, ການສຶກສາ, ການກໍ່ສ້າງພື້ນຖານໂຄງລ່າງ ແລະ ອຸດສາຫະກຳອື່ນໆ; ຄວາມຮັບຜິດຊອບຕໍ່ເສດຖະກິດ-ສັງຄົມ; ໃນປັດຈຸບັນ, ບໍລິສັດໄດ້ໃຫ້ການຊ່ວຍເຫລືອກັບລັດຖະບານຂັ້ນສູນກາງ, ຂັ້ນແຂວງ ແລະ ຂັ້ນເມືອງ ລວມທັງໝົດ 400.000.000 ໂດລາ, ໄດ້ບໍລິຈາກຜ້າອັດປາກ-ອັດດັງ ແລະ ເຄື່ອງຊ່ວຍຫາຍໃຈໃນການສະກັດກັ້ນການແຜ່ລະບາດຂອງພະຍາດໂຄວິດ-19 ລວມເປັນມູນຄ່າ 1.934.000.000 ກີບ; ນອກນີ້, ຍັງໄດ້ຊ່ວຍເຫລືອສ້າງເສັ້ນທາງຄອນກຣີ້ດອ້ອມດອນໂຂງ ມູນຄ່າ 12.000.000 ໂດລາ, ສ້າງກັນເຈື່ອນແຄມນໍ້າຂອງ ແລະ ຊ່ວຍເຫລືອສ້າງອາຄານຫ້ອງຮຽນ ແລະ ມອບເຄື່ອງອຸປະກອນການຮຽນການສອນອີກຈຳນວນໜຶ່ງ.
ທ່ານ ສົມມາດ ພົລເສນາ ໄດ້ມີຄຳເຫັນ ແລະ ເນັ້ນໜັກໃຫ້ອົງການປົກຄອງທ້ອງຖິ່ນ ແລະ ພາກສ່ວນກ່ຽວຂ້ອງ ກໍຄືບໍລິສັດຜູ້ພັດທະນາຕ້ອງໄດ້ປະສານສົມທົບໃຫ້ການຮ່ວມມື ແລະ ປັບປຸງແຜນແມ່ບົດການພັດທະນາໂຄງການ (Master Plan) ໃຫ້ມີຄວາມຄືບໜ້າຫລາຍກວ່າເກົ່າ, ແຜນຈັດຕັ້ງປະຕິບັດການພັດທະນາໂຄງການໃນແຕ່ລະໄລຍະ ເພື່ອປະກອບເຂົ້າໃນການພັດທະນາປະເທດຊາດ ເວົ້າລວມ ເວົ້າສະເພາະແຂວງຈຳປາສັກ ບົນພື້ນຖານຜົນສຳເລັດຂອງສາຍພົວພັນລາວ-ຈີນ ພາຍໃຕ້ການຊີ້ນຳ-ນຳພາຍຸດທະສາດລະຫວ່າງການນຳຂັ້ນສູງຂອງສອງປະເທດ ຮ່ວມກັນສູ້ຊົນຢ່າງບໍ່ລົດລະ ເພື່ອຊຸກຍູ້ການຮ່ວມກັນສ້າງຄູ່ຮ່ວມຊະຕາກຳຈີນ-ລາວ.

ແຫຼ່ງຂ່າວທີ່ມາ: ສະພາແຫ່ງຊາດ