ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ເພື່ອຕິດຕາມກວດກາການປະຕິບັດກົດໝາຍ ແລະ ນິຕິກໍາທີ່ກ່ຽວຂ້ອງກັບຜູ້ເຊື່ອຖືສາສະໜາຕ່າງໆ, ການພັດທະນາຊີວິດການເປັນຢູ່ຂອງປະຊາຊົນບັນດາເຜົ່າ ແລະ ການເຄື່ອນຍ້າຍພົນລະເມືອງຂອງປະຊາຊົນສອງຟາກຊາຍແດນ ທີ່ບໍ່ຖືກຕ້ອງຕາມກົດໝາຍ; ການປະຕິບັດໜ້າທີ່ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ, ການປະຕິບັດກົດໝາຍ ແລະ ກົດລະບຽບໃນຄ້າຍຄຸມຂັງ, ການຄ້າມະນຸດ, ວຽກງານປັກຫລັກໝາຍຊາຍແດນ; ການບໍລິການ ແລະ ຄວາມສະດວກ ແລະ ຄວາມຫຍຸ້ງຍາກຂອງພະນັກງານທີ່ປະຈໍາຢູ່ດ່ານຊາຍແດນ.

ວັນທີ 8 ທັນວາ 2020 ທີ່ຫ້ອງວ່າການປົກຄອງແຂວງຈໍາປາສັກ, ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ເຊິ່ງມີທ່ານ ຄໍາຈັນ ໂສຕາປະເສີດ ຮອງປະທານກໍາມາທິການບັນດາເຜົ່າ, ທ່ານ ເຄນທອງ ນວນທະສິງ ຮອງປະກໍາມາທິການການຕ່າງປະເທດ, ທ່ານ ໂປແລນ ຄະນະສະມາຄົມມິດຕະພາບກໍາປູເຈຍ-ລາວ, ມີຕາງໜ້າກໍາມາທິການປ້ອງກັນຊາດ-ປ້ອງກັນຄວາມສະຫງົບ ແລະ ພະນັກງານທີ່ກ່ຽວຂ້ອງຈໍານວນໜຶ່ງ ໄດ້ເຄື່ອນໄຫວເຮັດວຽກກັບສະພາປະຊາຊົນແຂວງ ແລະ ອໍານາດການປົກຄອງແຂວງຈໍາປາສັກ ເຂົ້າຮ່ວມມີທ່ານ ວິໄລວົງ ບຸດດາຄໍາ ເຈົ້າແຂວງໆຈໍາປາສັກ,  ມີສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 15​ ແຂວງຈໍາປາສັກ, ສະມາຊິກສະພາປະຊາຊົນແຂວງ (ສສຂ) ແລະ ຕາງໜ້າພະແນກການທີ່ກ່ຽວຂ້ອງຂອງແຂວງ.

ທ່ານ ວິໄລວົງ ບຸດດາຄໍາ ໄດ້ລາຍງານໂດຍຫຍໍ້ກ່ຽວກັບການພັດທະນາເສດຖະກິດ-ສັງຄົມຂອງແຂວງ ໃນໄລຍະຜ່ານມາ; ຈາກນັ້ນ, ຕາງໜ້າອົງການແນວລາວສ້າງຊາດແຂວງ, ກອງບັນຊາການປ້ອງກັນຄວາມສະຫງົບແຂວງ, ກອງບັນຊາການປ້ອງກັນຊາດແຂວງ ແລະ ພະແນກການຕ່າງປະເທດແຂວງ ກໍໄດ້ລາຍງານເພີ່ມເຕີມກ່ຽວກັບການປະຕິບັດວຽກງານ,  ຜົນສໍາເລັດທີ່ສາມາດຍາດໄດ້ ຕະຫລອດຮອດປາກົດການຫຍໍ້ທໍ້ທີ່ຍັງຄົງຄ້າງຈໍານວນໜຶ່ງ ແລະ ແຜນການໃນຕໍ່ໜ້າ.

ໃນຕອນເຊົ້າຂອງວັນດຽວກັນ, ທ່ານ ພົທ. ​ແສງນວນ ໄຊຍະລາດ ພ້ອມດ້ວຍຄະນະ ຍັງໄດ້ເຄື່ອນໄຫວຕິດຕາມກວດກາຢູ່ດ່ານສາກົນລາວ-ໄທ ວັງເຕົ່າ-ຊ່ອງເມັກ ໂດຍການຕ້ອນຮັບ ແລະ ຮັບຟັງການລາຍງານຂອງ ພັອ. ສຸກັນ ໄຕໄຊຍະວົງ ຫົວໜ້າດ່ານສາກົນວັງເຕົ່າ ພ້ອມດ້ວຍພາກສ່ວນທີ່ກ່ຽວຂ້ອງ; ພ້ອມດຽວກັນນັ້ນ, ທ່ານຮອງປະທານສະພາແຫ່ງຊາດ ຍັງໄດ້ມີຄໍາເຫັນໃຫ້ທິດຊີ້ນໍາ ເຊິ່ງທ່ານໄດ້ເນັ້ນໃຫ້ແກ້ໄຂບັນຫາສາສະໜາດ້ວຍຄວາມອ່ອນໂຍນນີ້ມນວນ, ລະມັດລະວັງ ແລະ ໃຫ້ມີສະເໝີພາບຕໍ່ໜ້າກົດໝາຍ; ເພີ່ມທະວີການປະສານງານລະຫວ່າງພະແນກການ, ລະຫວ່າງຂັ້ນລຸ່ມກັບຂັ້ນເທິງ ກໍຄືລະຫວ່າງປະເທດໃກ້ຄຽງທີ່ມີຊາຍຮ່ວມກັນ ເພື່ອຄວາມເປັນເອກະພາບກັນທາງດ້ານລະບຽບການຕ່າງໆ; ສືບຕໍ່ປະຕິບັດຕາມມະຕິເລກທີ 06/ນຍ ກ່ຽວກັບມາດຕະການປ້ອງກັນການລະບາດຂອງພະຍາດໂຄວິດ- 19 ຢ່າງເຂັ້ມງວດ ເພື່ອຮັບປະກັນຄວາມປອດໄພທາງດ້ານຊີວິດຂອງປະຊາຊົນບັນດາເຜົ່າ  ສໍາລັບບັນດາຂໍ້ສະເໜີຕ່າງໆ ແມ່ນຈະນໍາໄປພິຈາລະນາ ແລະ ສະເໜີຕໍ່ພາກສ່ວນກ່ຽວຂ້ອງເພື່ອແກ້ໄຂຕາມຄວາມເໝາະສົມ.

ໃນໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ຍັງໄດ້ມອບເຄື່ອງບໍລິໂພກຈໍານວນໜຶ່ງໃຫ້ກໍາລັງປ້ອງກັນຊາດ-ປ້ອງກັນຄວາມສະຫງົບ ດ່ານສາກົນວັງເຕົ່າ ແຂວງຈໍາປາສັກ.

ແຫຼ່ງຂ່າວທີ່ມາ: ສະພາແຫ່ງຊາດ