ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ຕອນບ່າຍວັນທີ 9 ພະຈິກຜ່ານມາ, ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ (ສພຊ), ປະທານກຳມາທິການກົດໝາຍ ໄດ້ຖະແຫລງຂ່າວກ່ຽວກັບຜົນສຳເລັດຂອງກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ໃນການພິຈາລະນາວຽກງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ຕໍ່ສື່ມວນຊົນ ໃນວັນທີ 6 ແລະ 8 ພະຈິກ 2021 ວ່າ: ປະຕິບັດຕາມການແບ່ງງານຂອງຄະນະປະທານກອງປະຊຸມ, ຂໍຖະແຫລງຂ່າວຕໍ່ສື່ມວນຊົນ ກ່ຽວກັບຜົນການດຳເນີນກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ໃນວາລະການພິຈາລະນາພາກວຽກງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ເພື່ອໃຫ້ປະຊາຊົນລາວບັນດາເຜົ່າພາຍໃນປະເທດ ແລະ ຜູ້ດຳລົງຊີວິດຢູ່ຕ່າງປະເທດ ໄດ້ຮັບຊາບຢ່າງທົ່ວເຖິງດັ່ງນີ້:

ໃນຕອນບ່າຍວັນເສົາ, ວັນທີ 6 ແລະ ຕອນເຊົ້າວັນຈັນ, ວັນທີ 8 ພະຈິກ 2021, ກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ໂດຍການເປັນປະທານຂອງທ່ານ ຈະເລີນ ເຍຍປາວເຮີ ໄດ້ຮັບຟັງ ແລະ ພິຈາລະນາເນື້ອໃນສຳຄັນຕ່າງໆ ຄື: ບົດລາຍງານຂອງສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2021 ແລະ ແຜນການປະຈໍາປີ 2022 ເຊິ່ງສະເໜີໂດຍທ່ານ ນາງ ວຽງທອນ ສີພັນດອນ ປະທານສານປະຊາຊົນສູງສຸດ;

ບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2021 ແລະ ແຜນການປະຈໍາປີ 2022 ເຊິ່ງສະເໜີໂດຍທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ;

ບົດປະກອບຄວາມເຫັນຂອງຄະນະປະຈຳສະພາແຫ່ງຊາດ ຕໍ່ສອງບົດລາຍງານດັ່ງກ່າວ ເຊິ່ງສະເໜີໂດຍທ່ານ ຄຳແພງ ວິລະພັນ ກຳມະການຄະນະປະຈຳສະພາແຫ່ງຊາດ, ປະທານກຳມາທິການຍຸຕິທຳ;

ພາຍຫລັງການລາຍງານ ແລະ ການປະກອບຄວາມເຫັນດັ່ງກ່າວແລ້ວ, ອີງຕາມການເຈາະຈີ້ມ ແລະ ຊີ້ນຳຂອງປະທານກອງປະຊຸມ, ບັນດາທ່ານສະມາຊິກສະພາແຫ່ງຊາດໃນເຂດເລືອກຕັ້ງຕ່າງໆ ຈຳນວນ 12 ທ່ານ ກໍໄດ້ພັດປ່ຽນກັນປະກອບຄຳເຫັນຕໍ່ການຈັດຕັ້ງ ແລະ ການເຄື່ອນໄຫວປະຕິບັດໜ້າທີ່ວຽກງານ ປະຈຳປີ 2021 ແລະ ແຜນວຽກງານ ປະຈຳປີ 2022 ຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ດ້ວຍຄວາມຮັບຜິດຊອບສູງ;

ໃນຕອນທ້າຍຂອງເຊົ້າວັນຈັນ, ວັນທີ 8 ພະຈິກ 2021, ກອງປະຊຸມຍັງໄດ້ຮັບຟັງການຊີ້ແຈງ ແລະ ຕອບຄຳຊັກຖາມກັບທີ່ ຂອງປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ, ລັດຖະມົນຕີກະຊວງຍຸຕິທຳ ແລະ ລັດຖະມົນຕີກະຊວງປ້ອງກັນຄວາມສະຫງົບ ກ່ຽວກັບການປະຕິບັດພາລະບົດບາດຂອງຕົນ ຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ເປັນຕົ້ນແມ່ນຄວາມຮັບຜິດຊອບໃນການດຳເນີນຄະດີຕາມຂະບວນຍຸຕິທຳ ປະຈຳປີ 2021 ແລະ ທິດທາງວຽກງານໃນປີ 2022;

ພາຍຫລັງກອງປະຊຸມໄດ້ຮັບຟັງການຊີ້ແຈງ ແລະ ຕອບຄຳຊັກຖາມແລ້ວ, ກອງປະຊຸມຍັງໄດ້ຮັບຟັງການຜ່ານຮ່າງມະຕິຮັບຮອງບົດລາຍງານການເຄື່ອນໄຫວວຽກງານຂອງສານປະຊາຊົນສູງສຸດ ແລະ ບົດລາຍງານຂອງອົງການໄອຍະການປະຊາຊົນສູງສຸດ ປະຈຳປີ 2021 ແລະ ປີ 2022 ທີ່ສະເໜີໂດຍທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ມະຕິ 2 ສະບັບດັ່ງກ່າວ ຈະໄດ້ຮັບການພິຈາລະນາ ແລະ ລົງຄະແນນສຽງຮັບຮອງເອົາໃນຕອນທ້າຍຂອງກອງປະຊຸມຄັ້ງນີ້;

ໃນຕອນບ່າຍວັນຈັນ, ວັນທີ 8 ພະຈິກ 2021, ກອງປະຊຸມຍັງໄດ້ພິຈາລະນາຮັບຮອງເອົາການແຕ່ງຕັ້ງສະມາຊິກສະພາຜູ້ພິພາກສາຂອງສານປະຊາຊົນສູງສຸດ ຈຳນວນ 11 ທ່ານ ເຊິ່ງເປັນອົງການນຳສູງສຸດຂອງສານປະຊາຊົນ ແນໃສ່ປັບປຸງການຈັດຕັ້ງ ແລະ ການເຄື່ອນໄຫວຂອງສານປະຊາຊົນສູງສຸດ ໃຫ້ເປັນລະບົບຄົບຊຸດ, ມີຄວາມເຂັ້ມແຂງ, ໜັກແໜ້ນ.

ການດຳເນີນກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ພາກວຽກງານສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ປະຈຳປີ 2021 ແລະ ປີ 2022 ແມ່ນເຕັມໄປດ້ວຍບັນຍາກາດທີ່ເຄັ່ງຮ້ອນ ດ້ວຍຄວາມຮັບຜິດຊອບສູງຂອງບັນດາທ່ານສະມາຊິກສະພາແຫ່ງຊາດ ໃນຖານະເປັນຕົວແທນໃຫ້ແກ່ສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ. ກອງປະຊຸມໄດ້ສະແດງຄວາມຍ້ອງຍໍຊົມເຊີຍ ຕໍ່ສານປະຊາຊົນ ແລະ ອົງການໄອຍະການປະຊາຊົນ, ຂະແໜງປ້ອງກັນຄວາມສະຫງົບ ແລະ ຂະແໜງຍຸຕິທຳ ທີ່ໄດ້ຕັ້ງໜ້າປະຕິບັດພາລະບົດບາດຂອງຕົນຕາມລັດຖະທຳມະນູນ ແລະ ກົດໝາຍ ໄດ້ເປັນຢ່າງດີ, ເຮັດໃຫ້ການດຳເນີນຄະດີຕາມຂະບວນຍຸຕິທຳ ນັບມື້ມີຄຸນນະພາບສູງຂຶ້ນ, ປະກອບສ່ວນເຂົ້າໃນການປັບປຸງຄວາມໝັ້ນຄົງຂອງປະເທດຊາດ, ຄວາມສະຫງົບ, ຄວາມຍຸຕິທຳ ແລະ ຄວາມເປັນລະບຽບຮຽບຮ້ອຍຂອງສັງຄົມ. ພ້ອມກັນນີ້, ກອງປະຊຸມກໍໄດ້ຕີລາຄາ, ວິເຄາະ, ວິໄຈດ້ານອ່ອນຄົງຄ້າງ, ສາເຫດທີ່ພາໃຫ້ມີດ້ານດີ, ດ້ານອ່ອນ ແລະ ວິທີແກ້ໄຂດ້ານອ່ອນ, ໂດຍສະເພາະແມ່ນດ້ານຄຸນທາດການເມືອງ, ຄຸນສົມບັດສິນທຳປະຕິວັດ ຂອງຖັນແຖວບຸກຄະລາກອນ ທີ່ກ່ຽວຂ້ອງກັບການດຳເນີນຄະດີຕາມຂະບວນຍຸຕິທຳເຊັ່ນ: ຜູ້ພິພາກສາຂອງສານປະຊາຊົນ, ພະນັກງານໄອຍະການປະຊາຊົນ, ເຈົ້າໜ້າທີ່ສືບສວນ-ສອບສວນ ແລະ ພະນັກງານປະຕິບັດຄຳຕັດສິນຂອງສານຈຳນວນໜຶ່ງ ຍັງບໍ່ທັນໜັກ     ແໜ້ນ, ໂປ່ງໃສ, ຄວາມຮູ້ຄວາມສາມາດດ້ານວິຊາສະເພາະຍັງຖືກຈຳກັດ ຈາກນັ້ນ, ຈຶ່ງເຮັດໃຫ້ການປະຕິບັດພາລະບົດບາດ, ສິດ ແລະ ໜ້າທີ່ ຕາມທີ່ກຳນົດໄວ້ໃນກົດໝາຍ ບໍ່ຮັບປະກັນປະສິດທິພາບ, ປະສິດທິຜົນເທົ່າທີ່ຄວນ; ການປະສານສົມທົບ ລະຫວ່າງອົງການທີ່ກ່ຽວຂ້ອງ ເພື່ອແກ້ໄຂຄະດີຍັງບໍ່ທັນໜັກແໜ້ນກົມກຽວກັນ ເຮັດໃຫ້ການແກ້ໄຂຄະດີມີຄວາມຊັກຊ້າແກ່ຍາວ ແລະ ບໍ່ສາມາດຈັດຕັ້ງປະຕິບັດໃຫ້ສິ້ນສຸດຕາມຂະບວນຍຸຕິທຳ; ເງື່ອນໄຂເຮັດວຽກ, ອຸປະກອນ, ພາຫະນະອັນຈຳເປັນຮັບໃຊ້ວຽກງານດຳເນີນຄະດີຍັງຂາດເຂີນ ແລະ ອື່ນໆ;

ດັ່ງນັ້ນ, ກອງປະຊຸມຈຶ່ງໄດ້ຊີ້ນຳໃຫ້ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ, ກະຊວງປ້ອງກັນຄວາມສະຫງົບ ແລະ ກະຊວງຍຸຕິທຳ ເອົາໃຈໃສ່ຈັດຕັ້ງປະຕິບັດພາລະບົດບາດຂອງຕົນ ໃນປີ 2022 ໃຫ້ດີຂຶ້ນຕື່ມ :

  • ຕໍ່ກັບສານປະຊາຊົນສູງສຸດ
  • ກອງປະຊຸມສະເໜີໃຫ້ຄະນະນຳສານປະຊາຊົນສູງສຸດ ເພີ່ມທະວີການຊີ້ນຳສານປະຊາຊົນແຕ່ລະຂັ້ນ ໃຫ້ເປັນເຈົ້າການປະຕິບັດສິດອຳນາດຂອງຕົນ ໃນການຕັດສິນຄະດີ ຂັ້ນຕົ້ນ, ຂັ້ນອຸທອນ ແລະ ຂັ້ນລົບລ້າງ ໃຫ້ຮັບປະກັນຄຸນນະພາບ ແລະ ປະສິດທິຜົນ ຕາມກົດໝາຍກໍານົດຢ່າງເຂັ້ມງວດ ແລະ ແທດກັບຕົວຈິງ;
  • ກອງປະຊຸມສະເໜີໃຫ້ຄະນະນຳສານປະຊາຊົນສູງສຸດ ເອົາໃຈໃສ່ຍົກສູງຄຸນນະພາບຂອງຜູ້ພິພາກສາ ໃນນີ້ໃຫ້ສຸມໃສ່ຍົກສູງຄຸນທາດການເມືອງ, ຈັນຍາບັນ-ຈັນຍາທໍາ, ຄວາມຮູ້, ຄວາມສາມາດ ແລະ ມືອາຊີບ ຂອງຜູ້ພິພາກສາ ແນໃສ່ເຮັດໃຫ້ການຄົ້ນຄວ້າ, ວິເຄາະ, ວິໄຈ ເນື້ອຄະດີ ແລະ ຕັດສິນຄະດີ ຮັບປະກັນຄວາມສອດຄ່ອງ, ໂປ່ງໃສ, ຖືກຕ້ອງ ແລະ ຍຸຕິທໍາ ຕາມລັດຖະທໍາມະນູນ, ກົດໝາຍ ກໍານົດ ແລະ ເຫດການຕົວຈິງ. ພ້ອມກັນນີ້, ໃຫ້ເດັດດ່ຽວແກ້ໄຂບັນດາປາກົດການຫຍໍ້ທໍ້ທີ່ເກີດຂຶ້ນພາຍໃນໝູ່ຜູ້ພິພາກສາ, ລົງວິໄນຕໍ່ຜູ້ມີການປະພຶດລະເມີດກົດໝາຍ ແລະ ຮັບສິນບົນ;
  • ສະເໜີໃຫ້ສານປະຊາຊົນສູງສຸດ ເອົາໃຈໃສ່ປະສານສົມທົບກັບອົງການສືບສວນ-ສອບສວນ, ອົງການໄອຍະການປະຊາຊົນ ແລະ ອົງການອື່ນໆທີ່ກ່ຽວຂ້ອງ ເພື່ອເຮັດໃຫ້ການພິຈາລະນາຄະດີຂອງສານ ມີຄວາມຖືກຕ້ອງ, ພາວະວິໄສ, ທ່ຽງທໍາ, ຍຸຕິທໍາ, ໂປ່ງໃສ ແລະ ຮັບປະກັນໃຫ້ການຕັດສິນຄະດີຂອງສານ ຖືກຕ້ອງຕາມກົດໝາຍ ແລະ ເຫດການຕົວຈິງ.
  • ຕໍ່ກັບອົງການໄອຍະການປະຊາຊົນສູງສຸດ
  • ກອງປະຊຸມສະເໜີໃຫ້ຄະນະນຳອົງການໄອຍະການປະຊາຊົນສູງສຸດ ເອົາໃຈໃສ່ຍົກສູງຄວາມເປັນເຈົ້າການ ຂອງອົງການໄອຍະການປະຊາຊົນ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ເຕັມສ່ວນ, ຖືກຕ້ອງຕາມທີ່ໄດ້ກຳນົດໄວ້ໃນລັດຖະທໍາມະນູນ ແລະ ກົດໝາຍ ເປັນຕົ້ນແມ່ນ: ຍົກສູງຄຸນນະພາບໃນການຕິດຕາມກວດກາການເຄົາລົບ ແລະ ປະຕິບັດກົດໝາຍຂອງອົງການລັດ, ອົງການຈັດຕັ້ງສັງຄົມ, ວິສາຫະກິດ ແລະ ພົນລະເມືອງ; ຍົກສູງຄຸນນະພາບໃນການສັ່ງຟ້ອງຄະດີຂຶ້ນສານ ແລະ ການຕິດຕາມກວດກາ ການດຳເນີນຄະດີຂອງສານແຕ່ລະຂັ້ນ ແລະ ຄຸນນະພາບໃນການຕິດຕາມກວດກາການປະຕິບັດຄຳຕັດສິນຂອງສານ ເຮັດໃຫ້ການຈັດຕັ້ງປະຕິບັດຄຳຕັດສິນຂອງສານສິ້ນສຸດຕາມຂະບວນຍຸຕິທຳ;
  • ສະເໜີໃຫ້ຄະນະນຳອົງການໄອຍະການປະຊາຊົນສູງສຸດ ເອົາໃຈໃສ່ບໍາລຸງສ້າງຖັນແຖວພະນັກງານໄອຍະການ ທາງດ້ານປະລິມານ ແລະ ຄຸນນະພາບ ຕາມເງື່ອນໄຂ ແລະ ຄວາມຕ້ອງການຂອງໜ້າທີ່ການເມືອງ ໂດຍສະເພາະແມ່ນສ້າງໃຫ້ໄດ້ພະນັກງານຜູ້ທີ່ມີຫລັກໝັ້ນທັດສະນະການເມືອງໜັກແໜ້ນ, ມີຄວາມຮູ້, ຄວາມສາມາດທີ່ເປັນມືອາຊີບ ເພື່ອຄົ້ນຄວ້າ, ວິເຄາະ, ວິໄຈ ຂໍ້ມູນຫລັກຖານ ໃຫ້ຮອບດ້ານ, ຄົບຖ້ວນ ແລະ ພາວະວິໄສ ໃນການສັ່ງຟ້ອງຜູ້ຖືກຫາຂຶ້ນສານ ແລະ ຖະແຫລງຢູ່ທີ່ປະຊຸມສານ ໃຫ້ຖືກຕ້ອງຕາມກົດໝາຍ ແລະ ເຫດການຕົວຈິງ;
  • ກອງປະຊຸມສະເໜີໃຫ້ອົງການໄອຍະການປະຊາຊົນ ເອົາໃຈໃສ່ປະສານສົມທົບຢ່າງກົມກຽວ ແລະ ມີຄວາມເປັນເອກະພາບສູງ ກັບສານປະຊາຊົນ, ອົງການສືບສວນ-ສອບສວນ ແລະ ອົງການປະຕິບັດຄໍາຕັດສິນ ໃນການດໍາເນີນຄະດີ ຕາມຂະບວນຍຸຕິທໍາ ຮັບປະກັນໃຫ້ແຕ່ລະອົງການ ການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຢ່າງຖືກຕ້ອງ ແລະ ຄົບຖ້ວນ ຕາມທີ່ໄດ້ກຳນົດໄວ້ໃນລັດຖະທໍາມະນູນ ແລະ ກົດໝາຍ ຢ່າງເຂັ້ມງວດ.
  • ຕໍ່ກະຊວງປ້ອງກັນຄວາມສະຫງົບ

ກອງປະຊຸມສະເໜີໃຫ້ຄະນະນຳກະຊວງເອົາໃຈໃສ່ສຶກສາອົບຮົມ ຍົກລະດັບຂອງເຈົ້າໜ້າທີ່ສືບສວນ-ສອບສວນ ເປັນຕົ້ນທາງດ້ານການເມືອງ-ແນວຄິດ ແລະ ວິຊາສະເພາະ ເຮັດໃຫ້ເຈົ້າໜ້າທີ່ສືບສວນ-ສອບສວນ ມີຄຸນທາດການເມືອງ, ຄຸນສົມບັດສິນທໍາປະຕິວັດໜັກແໜ້ນ, ມີນ້ຳໃຈຮັບໃຊ້ຊາດ, ຮັບໃຊ້ປະຊາຊົນຢ່າງບໍລິສຸດໃຈ ພ້ອມທັງເອົາໃຈໃສ່ຕິດຕາມກວດກາຊີ້ນຳການປະຕິບັດໜ້າທີ່ຂອງເຈົ້າໜ້າທີ່ສືບສວນ-ສອບສວນ ໃຫ້ຖືກຕ້ອງ ຕາມພາລະບົດບາດ, ສິດ ແລະ ໜ້າທີ່ຂອງຕົນ ຕາມກົດໝາຍ ແລະ ລະບຽບການ; ເອົາໃຈໃສ່ປະສານສົມທົບກັບອົງການໄອຍະການປະຊາຊົນແຕ່ລະຂັ້ນ ໃຫ້ມີຄວາມໂລ່ງລ່ຽນ ຮັບປະກັນຄຸນນະພາບໃນການດຳເນີນຄະດີຕາມຂະບວນຍຸຕິທຳ;

  • ຕໍ່ກະຊວງຍຸຕິທຳ

ກອງປະຊຸມສະເໜີໃຫ້ຄະນະນຳກະຊວງຍຸຕິທຳ ເອົາໃຈໃສ່ຊີ້ນຳການປັບປຸງອົງການຈັດຕັ້ງປະຕິບັດຄໍາຕັດສິນຂອງສານ ໃຫ້ມີຄວາມໂປ່ງໃສ, ໜັກແໜ້ນ, ເຂັ້ມແຂງ ສາມາດຈັດຕັ້ງປະຕິບັດຄຳຕັດສິນທີ່ໃຊ້ໄດ້ຢ່າງເດັດຂາດຂອງສານ ໃຫ້ວ່ອງໄວ ແລະ ສີ້ນສຸດຕາມຂັ້ນຕອນຂອງກົດໝາຍ; ສືບຕໍ່ຄົ້ນຄວ້າສ້າງ, ປັບປຸງກົດໝາຍ ແລະ ນິຕິກໍາໃຕ້ກົດໝາຍ ກ່ຽວກັບການຈັດຕັ້ງປະຕິບັດຄຳຕັດສິນຂອງສານ, ການໃຊ້ແທນຄ່າເສຍຫາຍ, ການປັບໃໝ ແລະ ອື່ນໆ ເພື່ອເປັນບ່ອນອີງໃນການຈັດຕັ້ງປະຕິບັດຄຳຕັດສິນຂອງສານ ໃຫ້ສຳເລັດຕາມກົດໝາຍ. ພ້ອມກັນນີ້, ໃຫ້ເອົາໃຈໃສ່ປັບປຸງ ແລະ ສ້າງຄວາມເຂັ້ມແຂງໃຫ້ແກ່ອົງການທະນາຍຄວາມ ແນໃສ່ຮັບປະກັນການປົກປ້ອງສິດ ແລະ ຜົນປະໂຫຍດອັນຊອບທຳຂອງຄູ່ຄະດີ.

  • ກອງປະຊຸມສະເໜີໃຫ້ອົງການສານປະຊາຊົນ, ອົງການໄອຍະການປະຊາຊົນ, ກະຊວງປ້ອງກັນຄວາມສະຫງົບ ແລະ ກະຊວງຍຸຕິທຳ ຈົ່ງຕັ້ງໜ້າຜັນຂະຫຍາຍຜົນກອງປະຊຸມຮ່ວມ ລະຫວ່າງ 4 ພາກສ່ວນ ໃຫ້ລົງເຖິງຂັ້ນທ້ອງຖິ່ນ (ຂັ້ນແຂວງ ແລະ ຂັ້ນເມືອງ) ໃຫ້ເປັນຮູບປະທຳເປັນຈິງ ແລະ ມີກົນໄກທີ່ສອດຄ່ອງ ເພື່ອຕິດຕາມ, ຊຸກຍູ້ການຈັດຕັ້ງປະຕິບັດ.

ສຳລັບການລົງຄະແນນສຽງຮັບຮອງເອົາບົດລາຍງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ແມ່ນຈະໄດ້ຈັດຂຶ້ນໃນຕອນທ້າຍຂອງກອງປະຊຸມຄັ້ງນີ້.

ໃນໂອກາດນີ້, ສະພາແຫ່ງຊາດ ຮຽກຮ້ອງໄປຍັງປະຊາຊົນລາວບັນດາເຜົ່າ ຈົ່ງເອົາໃຈໃສ່ຕິດຕາມການດຳເນີນກອງປະຊຸມສະພາແຫ່ງຊາດຄັ້ງນີ້ ແລະ ສືບຕໍ່ຍົກສູງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ ໃຫ້ເຂັ້ມງວດຕື່ມ.