ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຢູ່ແຂວງອັດຕະປື ເມື່ອທ້າຍອາທິດຜ່ານມາໂດຍການຕ້ອນຮັບຂອງທ່ານນາງ ພອນມະນີ ຂຽນໄຊຍະວົງ ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 17, ມີຮອງປະທານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ການເຄື່ອນໄຫວຢ້ຽມຢາມ ແລະເຮັດວຽກຂອງທ່ານຮອງປະທານສະພາແຫ່ງຊາດຄັ້ງນີ້ ກໍເພື່ອຕິດຕາມກວດກາການ ຈັດຕັ້ງປະຕິບັດກົດໝາຍ ແລະ ລະບຽບການທີ່ກ່ຽວຂ້ອງຂອງຜູ້ເຊື່ອຖືສາສະໜາຕ່າງໆ ແລະ ການເຄື່ອນຍ້າຍພົນລະເມືອງຢູ່ບໍລິເວນຊາຍແດນທີ່ບໍ່ຖືກຕ້ອງຕາມກົດໝາຍ, ຕະຫຼອດຮອດການປະຕິບັດໜ້າທີ່ ແລະ ຄວາມສະດວກຫຍຸ້ງຍາກຂອງກໍາລັງປ້ອງກັນຊາດ ປ້ອງກັນຄວາມສະຫງົບ, ການຄ້າມະນຸດ ແລະ ວຽກງານການປັກຫຼັັກໝາຍຊາຍແດນ. ໂອກາດດັ່ງກ່າວ ກໍາມະການທີ່ກ່ຽວຂ້ອງຂອງສະພາປະຊາຊົນແຂວງອັດຕະປື ແລະ ບັນດາພະແນກການ ກໍໄດ້ລາຍງານໂດຍຫຍໍ້ກ່ຽວກັບວຽກງານຕ່າງໆ ຊຶ່ງໄລຍະຜ່ານມາໄດ້ມີບັນຫາການມາເຄື່ອນໄຫວທາງດ້ານສາສະໜາ ແຕ່ຍັງບໍ່ທັນມີຜົນກະທົບ ແລະ ຍັງບໍ່ໄດ້ ມີພຶດຕິກໍາທີ່ຂັດຕໍ່ແນວທາງນະໂຍບາຍຂອງພັກ, ເຈົ້າໜ້າທີ່ຊາຍແດນໄດ້ເອົາໃຈໃສ່ໃນການຄຸ້ມຄອງຊາຍແດນໃຫ້ມີຄວາມສະຫງົບ ແຕ່ກໍຍັງມີປະກົດການລັກລອບຕັດໄມ້ ແລະ ເກັບເຄື່ອງປ່າຂອງດົງ. ໂອກາດເຄື່ອນໄຫວເຮັດວຽກຢູ່ແຂວງອັດຕະປື ທ່ານ ຮອງປະທານ ສະພາແຫ່ງຊາດ ພ້ອມດ້ວຍຄະນະໄດ້ເຄື່ອນໄຫວຕິດຕາມກວດກາຢູ່ດ່ານສາກົນພູເກືອ ຊຶ່ງໄດ້ຮັບຟັງການລາຍງານວຽກງານພາຍໃນດ່ານ, ໃນ 6 ເດືອນຜ່ານມາ ພາສີ ແລະ ອາກອນສາມາດເກັບລາຍຮັບໄດ້ 9 ຕື້ກວ່າກີບ ທຽບໃສ່ແຜນການປີບັນລຸໄດ້ 29,85% ທຽບໃສ່ໄລຍະດຽວກັນຂອງປີ 2018 ເພີ່ມຂຶ້ນ 46,86%, ລາຍຮັບສ່ວນໃຫຍ່ແມ່ນໄດ້ມາຈາກການນໍາເຂົ້ານໍ້າມັນເຊື້ອໄຟ, ເຄື່ອງບໍລິໂພກ, ຄ່າທໍານຽມຕ່າງໆລວມທັງຄ່າປັບໃໝ. ທ່ານຮອງປະທານສະ ພາແຫ່ງຊາດໄດ້ເນັ້ນໃຫ້ ເພີ່ມທະວີຄວາມເອົາໃຈໃສ່ໃນການປັບປຸງຮາກຖານພັກ, ເອົາໃຈໃສ່ສຶກສາອົບຮົມວຽກງານການ ເມືອງແນວຄິດຕິດພັນກັບການໂຄສະນາຂະບວນການຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນ ພ້ອມກັນນັ້ນກໍເພີ່ມທະວີຄວາມສາມັກຄີບັນດາຂະແໜງການພາຍໃນດ່ານ ເພີ່ມທະວີຄວາມຮັບຜິດຊອບການເມືອງຂອງຕົນໃນການປະຕິບັດໜ້າທີ່ວຽກງານ, ມີມາດຕະການເຂັ້ມງວດຕໍ່ການຄ້າຂາຍເຖື່ອນ, ການເຄື່ອນໄຫວທາງສາສະໜາທີ່ບໍ່ຖືກຕ້ອງ, ເພີ່ມທະວີການປັບປຸງລະບົບການເມືອງຢູ່ຮາກຖານ, ປັບປຸງວຽກງານປ້ອງກັນຊາດປ້ອງກັນຄວາມສະຫງົບ, ເພີ່ມທະວີການປະສານງານລະຫວ່າງ ສພຂ ກັບອໍານາດການປົກຄອງແຂວງໂດຍຖືເອົານິຕິກໍາເປັນບ່ອນອີງ, ທຸກພາກສ່ວນຕ້ອງໄດ້ສ້າງຂະບວນການຂໍ່ານັບຮັບຕ້ອນກອງປະຊຸມ 3 ຂັ້ນໃຫ້ເປັນຂະບວນກວ້າງຂວາງ . (ຂ່າວ: ຂ.ອັດຕະປື)