ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 16 ສິງຫາ 2021 ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ມອບເຄື່ອງຊ່ວຍເຫລືອໃຫ້ 3 ໂຮງຮຽນ, ເມືອງແປກ, ແຂວງຊຽງຂວາງ; ເຂົ້າຮ່ວມມີທ່ານ ບຸນໂຮມ ເທດທານີ ປະທານສະພາປະຊາຊົນແຂວງ, ທ່ານ ບຸນເລື່ອນ ວັນນາຮັກ ຫົວໜ້າພະແນກສຶກສາທິການ ແລະ ກິລາແຂວງ, ອໍານວຍການໂຮງຮຽນທັງ 3 ໂຮງຮຽນ ຄື: ໂຮງຮຽນ ມສ.ໜອງເປັດ, ໂຮງຮຽນສາມັນກິນນອນຊົນເຜົ່າ ແລະ ໂຮງຮຽນມະທະຍົມຕອນຕົ້ນເມືອງແປກວິລະຊົນ.
ເຄື່ອງຊ່ວຍເຫລືອທີ່ນໍາໄປມອບໃນຄັ້ງນີ້ປະກອບມີ: ຄອມພິວເຕີຕັ້ງໂຕະ ແລະ ອຸປະກອນການຮຽນ ເປັນຕົ້ນ ສໍສີ, ສໍດຳ, ປື້ມແບບຮຽນ, ປຶ້ມລະບາຍສີ, ຖົງປື່ມ, ໂສ້ງເສື້ອຊຸດວອມ ແລະ ອຸປະກອນການຮຽນອື່ນໆອີກຈໍານວນໜຶ່ງ ລວມມູນຄ່າທັງໝົດ 74.000.000 ກີບ (ເຈັດສິບສີ່ລ້ານກີບ); ເຊິ່ງເຄື່ອງຊ່ວຍເຫລືອດັ່ງກ່າວແມ່ນໄດ້ຮັບການຊ່ວຍເຫລືອຈາກມູນນິທິພັດທະນາລ້ານຊ້າງແມ່ຂອງ.  ໃນພິທີ, ຕາງຫນ້າອໍານວຍການທັງ 3 ໂຮງຮຽນ ໄດ້ສະແດງຄວາມຂອບໃຈ ແລະ ດີໃຈຫລາຍທີ່ຮັບການຊ່ວຍເຫລືອໃນຄັ້ງນີ້ ແລະ ຍັງໃຫ້ຄໍາໝັ້ນສັນຍາວ່າ ຈະນໍາເອົາເຄື່ອງດັ່ງກ່າວໄປນໍາໃຊ້ເຂົ້າໃນວຽກງານການຮຽນການສອນ ແລະ ຈະຮັກສາໃຫ້ໄດ້ນໍາໃຊ້ຍາວນານ ແລະ ຫວັງອີກວ່າຈະໄດ້ຮັບການຊ່ວຍເຫລືອຕື່ມອີກ.
ໃນຕອນທ້າຍ, ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມຕໍ່ກັບບັນດາໂຮງຮຽນ ເຊິ່ງທ່ານໄດ້ຮຽກຮ້ອງໃຫ້ຄູອາຈານ ຕັ້ງໜ້າສິດສອນນັກຮຽນໃຫ້ສົມກັບເປັນແມ່ພິມຂອງຊາດ, ເອົາໃຈໃສ່ແກ້ໄຂບັນຢາເສບຕິດ ບໍ່ໃຫ້ນັກຮຽນໄປພົວພັນກັບຢາເສບຕິດ, ສ້າງໂຮງຮຽນໃຫ້ເປັນໂຮງຮຽນປອດຢາເສບຕິດ ແລະ ສິດສອນນັກຮຽນໃຫ້ເປັນນັກຮຽນຮູ້, ນັກຮຽນດີ, ນັກຮຽນເກັ່ງຂອງຊາດ.