ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ຕອນເຊົ້າຂອງວັນທີ 17 ມິຖຸນາ 2021 ທີ່ ສະພາແຫ່ງຊາດ, ສະຫາຍ ນາງ ສູນທອນ ໄຊຍະຈັກ, ເລຂາທິການສູນກາງພັກ, ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ລີ ຢົງ ຊົນ, ເອກອັກຄະລັດຖະທູດ  ແຫ່ງ ສາທາລະນະລັດປະຊາຊົນ ປະຊາທິປະໄຕ ເກົາຫລີ ປະຈຳ ສປປ ລາວ.

ໃນການພົບປະຄັ້ງນີ້, ສະຫາຍ ເອກອັກຄະລັດທູດ ລີ ຢົງ ຊົນ ໄດ້ສະແດງຄວາມຊົມເຊີຍຕໍ່ ສະຫາຍ ນາງ   ສູນທອນ ໄຊຍະຈັກ, ເລຂາທິການສູນກາງພັກ ທີ່ໄດ້ຮັບເລືອກຕັ້ງເປັນຮອງປະທານສະພາແຫ່ງຊາດຄົນໃຫມ່ ໃນກອງປະຊຸມຄັ້ງປະຖົມມະລືກ ຂອງສະພາແຫ່ງຊາດຊຸດທີ່ IX. ສະຫາຍ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງປະເທດ ສປປ ເກົາຫລີ ແລະ ສປປ ລາວ ກໍ່ຄື ການພົວພັນຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດ. ພ້ອມນີ້, ຍັງໄດ້ແຈ້ງສະພາບການໂດຍຫຍໍ້ຂອງ ສປປ ເກົາຫລີ ແລະ ແຈ້ງການດຳເນີນກອງປະຊຸມຄົບຄະນະ ຄັ້ງທີ III ສະໄໝທີ VIII ຂອງພັກແຮງງານເກົາຫລີ ໃຫ້ຝ່າຍລາວຊາບ.

ສະຫາຍ ນາງ ສູນທອນ ໄຊຍະຈັກ ໄດ້ສະແດງຄວາມຍິນດີຕ້ອນຮັບ ສະຫາຍ ລີ ຢົງ ຊົນ, ພ້ອມທັງຕີລາຄາສູງ ຕໍ່ການປະກອບສ່ວນທີ່ສໍາຄັນຂອງ ສະຫາຍ ເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມື ລະຫວ່າງ ສປປ ລາວ ແລະ ສປປ ເກົາຫລີ ກໍ່ຄື ລະຫວ່າງ ສອງອົງການນິຕິບັນຍັດຂອງສອງປະເທດ. ນອກນັ້ນ, ສອງຝ່າຍຍັງໄດ້ແລກປ່ຽນບົດຮຽນ ແລະ ຄຳຄິດຄຳເຫັນກ່ຽວກັບການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ແລະ ສປປ ເກົາຫລີ ກໍ່ຄື ການສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດໃຫ້ນັບມື້ນັບເຕີບໃຫຍ່ຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນເພື່ອເປັນຜົນປະໂຫຍດຂອງທັງສອງຊາດກໍ່ຄື ສັນຕິພາບ, ມິດຕະພາບ ແລະການຮ່ວມມືໃນພາກພື້ນ ແລະໃນໂລກ.

ແຫຼ່ງຂ່າວທີ່ມາ: ສະພາແຫ່ງຊາດ