ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 15 ທັນວາຜ່ານມາ, ທີ່ຫ້ອງຮັບແຂກສະພາແຫ່ງຊາດ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ໂອກາວະ ໂຕຊິໂອະ (OGAWA Toshio) ຮອງປະທານສະພາສູງຍີ່ປຸ່ນ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ຢ່າງເປັນທາງການ ໃນລະຫວ່າງວັນທີ 14-17 ທັນວາ 2019 ເພື່ອສືບຕໍ່ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ຂອງສອງປະເທດລາວ-ຍີ່ປຸ່ນເວົ້າລວມ, ເວົ້າສະເພາະແມ່ນລະຫວ່າງສະພາແຫ່ງຊາດລາວ ແລະ ສະພາສູງຍີ່ປຸ່ນ ເພື່ອພົບປະແລກປ່ຽນບົດຮຽນໃນການປະຕິບັດພາລະບົດບາດ, ສິດ ແລະ ໜ້າທີ່ ໃນຂົງເຂດວຽກງານນິຕິບັນຍັດລະຫວ່າງສະພາແຫ່ງຊາດລາວ ກັບສະພາສູງຍີ່ປຸ່ນ.

ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສາຍພົວພັນມິດຕະພາບ ການຮ່ວມມືລາວ-ຍີ່ປຸ່ນ, ຍີ່ປຸ່ນ-ລາວ ທີ່ມີມາແຕ່ດົນນານ ເຊິ່ງໄດ້ຮັບການເພີ່ມພູນຄູນສ້າງ ແລະ ພັດທະນາຂຶ້ນຢ່າງບໍ່ຢຸດຢັ້ງ ພ້ອມທັງສະແດງຄວາມຂອບໃຈຕໍ່ການຊ່ວຍເຫລືອເພື່ອການພັດທະນາບັນດາພື້ນຖານໂຄງລ່າງ, ການສ້າງຊັບພະຍາກອນມະນຸດ ແລະ ການສົ່ງອາສາສະໝັກ ແລະ ຊ່ຽວຊານໄປປະຕິບັດໃນຂະແໜງການຕ່າງໆ ພ້ອມທັງສະເໜີໃຫ້ມີການສືບຕໍ່ການແລກປ່ຽນການຢ້ຽມຢາມ ແລະ ໄປມາຫາສູ່ກັນ ລະຫວ່າງສະພາແຫ່ງຊາດລາວ ແລະ ລັດຖະສະພາຍີ່ປຸ່ນ ໂດຍສະເພາະໃນລະດັບກຳມາທິການ, ຄະນະເລຂາທິການ ແລະ ຄະນະມິດຕະພາບລັດຖະສະພາລາວ-ຍີ່ປຸ່ນ, ຍີ່ປຸ່ນ-ລາວ ຂຶ້ນສູ່ຄຸນນະພາບ ແລະ ແທດເໝາະຕົວຈິງຫລາຍ; ສະເໜີໃຫ້ສະພາສູງ ກໍຄືສະພາຜູ້ແທນລາສະດອນ (ສະພາຕ່ຳ) ຊ່ວຍຈັດຊ່ຽວຊານທາງດ້ານການເງິນ ເພືື່ອມາປາຖະກະຖາບົດຮຽນກ່ຽວກັບນະໂຍບາຍອະສັງຫາລິມະຊັບຂອງຍີ່ປຸ່ນ, ວຽກງານອາກອນ, ອາກອນຊົມໃຊ້, ອາກອນກຳໄລ, ອາກອນຊັບສິນ ແລະ ທີ່ດິນ ແລະ ອາກອນສິ່ງແວດລ້ອມໃຫ້ແກ່ສະມາຊິກສະພາແຫ່ງຊາດ ແລະ ວິຊາການຂອງສະພາແຫ່ງຊາດ; ສະເໜີໃຫ້ທ່ານຮອງປະທານສະພາສູງຊຸກຍູ້ໃຫ້ມີການແລກປ່ຽນເຊິ່ງກັນ ແລະ ກັນ ໂດຍໃຫ້ມີການຈັດກອງປະຊຸມສຳມະນາ, ປາຖະກະຖາຮ່ວມກັນໃນຫົວຂໍ້ສະເພາະໃດໜຶ່ງທີ່ຝ່າຍລາວມີຄວາມສົນໃຈ ເພື່ອຍົກລະດັບຂີດຄວາມສາມາດຂອງສະມາຊິກສະພາແຫ່ງຊາດ ຕະຫລອດຮອດພະນັກງານວິຊາການທີ່ເປັນເສນາທິການໃຫ້ແກ່ສະພາແຫ່ງຊາດລາວ; ສືບຕໍ່ໃຫ້ການສະໜັບສະໜູນເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ ເພື່ອປະກອບສ່ວນເຂົ້າໃນການເສີມສ້າງສັນຕິພາບ, ສະຖຽນລະພາບໃນການພັດທະນາແບບຍືນຍົງໃນຂົງເຂດພາກພື້ນ ແລະ ສາກົນ.

ໂອກາດດຽວກັນ, ທ່ານ ໂອກາວະ ໂຕຊິໂອະ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນຂອງສະພາແຫ່ງຊາດ ພ້ອມທັງລາຍງານໃຫ້ຮູ້ວ່າປະເທດລາວເປັນປະເທດທຳອິດທີ່ທ່ານມາຢ້ຽມຢາມ ຫລັງຈາກທີ່ໄດ້ຮັບຕໍາແໜ່ງເປັນຮອງປະທານສະພາສູງຍີ່ປຸ່ນໃນເດືອນສິງຫາຜ່ານມາ ແລະ ສະແດງຄວາມເປັນຫ່ວງເປັນໃຍຕໍ່ປະຊາຊົນທີ່ປະສົບໄພທາງທຳມະຊາດຢູ່ ສປປລາວ ໃນໄລຍະຜ່ານມາ, ພ້ອມທັງເຊີດຊູສາຍພົວພັນມິດຕະພາບ ແລະ ການຮ່ວມມືລາວ-ຍີ່ປຸ່ນ, ຍີ່ປຸ່ນ-ລາວ ໃຫ້ໄດ້ຮັບການພັດທະນາຍິ່ງໆຂຶ້ນ ໂດຍສະເພາະເສດຖະກິດ, ການເມືອງ, ການໄປມາຫາສູ່ກັນ ແລະ ການຊ່ວຍເຫລືອເຊິ່ງກັນ ແລະ ກັນ ເພື່ອເປັນການຜັນຂະຫຍາຍຄູ່ຮ່ວມຍຸດທະສາດໃຫ້ໄດ້ຮັບການຂະຫຍາຍຕົວຍິ່ງໆຂຶ້ນ; ພ້ອມນັ້ນ, ຍັງໄດ້ລາຍງານໃຫ້ຮູ້ອີກຕື່ມວ່າ: ໃນປີ 2020 ຍີ່ປຸ່ນຈະໄດ້ຈັດງານມະຫະກຳກິລາໂອລິມປິກ ແລະ ພາລາລິມປິກເກມ ແລະ ໃນປີ 2025 ຈະຈັດງານສະເຫລີມສະຫລອງ 70 ປີ ແຫ່ງສາຍພົວພັນມິດຕະພາບຍີ່ປຸ່ນ-ລາວ, ລາວ-ຍີ່ປຸ່ນຕື່ມອີກ.

ວັນຕໍ່ມາ, ຄະນະຜູ້ແທນສະພາສູງຍີ່ປຸ່ນ ຍັງໄດ້ເຂົ້າຢ້ຽມຂໍ່ຳນັບທ່ານ ພັນຄຳ ວິພາວັນ ຮອງປະທານປະເທດ ແຫ່ງ ສປປລາວ ທີ່ສຳນັກງານປະທານປະເທດ ເພື່ອລາຍງານຈຸດປະສົງຂອງການມາຢ້ຽມຢາມໃນຄັ້ງນີ້້; ພ້ອມນັ້ນ, ຍັງຢ້ຽມຢາມພື້ນຖານການພັດທະນາເສດຖະກິດ-ສັງຄົມ ແລະ ສະຖານທີ່ທາງວັດທະນະທຳ ຢູ່ນະຄອນຫລວງວຽງຈັນ.