ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງລາວ ໄດ້ຕາງໜ້າໃຫ້ສູນກາງແນວລາວສ້າງຊາດ ມີຄໍາເຫັນຕໍ່ບົດລາຍງານຂອງສະພາແຫ່ງຊາດ ກ່ຽວກັບການເຄື່ອນໄຫວວຽກງານ ປະຈຳປີ 2021 ແລະ ແຜນການເຄື່ອນໄຫວ ປີ 2022 ໃນວາລະກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ວັນທີ 8 ພະຈິກ ນີ້, ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ຮອງ​ປະ​ທານສູນກາງແນວລາວສ້າງຊາດ ໄດ້ມີຄໍາສະເໜີຂອງປະຊາຊົນ ຕໍ່ສະພາແຫ່ງຊາດ ຜ່ານໄປຍັງພາກສ່ວນກ່ຽວຂ້ອງ ເພື່ອພິຈາລະນາ ໃນ 10 ບັນຫາສຳຄັນ ຄື:
1).​ ສະເໜີໃຫ້ສະພາແຫ່ງຊາດ ເພີ່ມທະວີການຕິດຕາມກວດກາ, ກະຕຸກຊຸກຍູ້ ຕໍ່ການປະຕິບັດໂຄງການພັດທະນາຂອງລັດຖະບານ, ບໍລິສັດກ່ຽວຂ້ອງ ທີ່ປະຊາຊົນໄດ້ຮັບຜົນກະທົບ ແຕ່ບໍ່ທັນໄດ້ຮັບການແກ້ໄຂເຊັ່ນ: ໂຄງການກໍ່ສ້າງເຂື່ອນໄຟຟ້າຫ້ວຍເປາະ ຍັງບໍ່ທັນໄດ້ມີການຊົດເຊີຍ ເນື້ອທີ່ດິນ ທໍາການຜະລິດຂອງປະຊາຊົນ ບ້ານສັນທົ່ງ ເມືອງເລົາງາມ ແຂວງ ສາລະວັນ ແລະ ບໍລິສັດເອກະຊົນສໍາປະທານເນື້ອທີ່ດິນທໍາການຜະລິດຂອງປະຊາຊົນ ຢູ່ບ້ານ ນາທັນ ເມືອງເລົາງາມ ແຂວງ ສາລະວັນ; ການຈ່າຍຄ່າແຮງງານ ໃຫ້ກໍາມະກອນທີ່ອອກແຮງງານ ປຸກສ້າງທີ່ພັກອາໄສຂອງໂຄງການກໍ່ສ້າງເຂື່ອນໄຟຟ້ານໍ້າທາ 1 ຢູ່ເມືອງນາແລ ແຂວງ ຫຼວງນໍ້າທາ ແຕ່ປີ 2015 ຍັງບໍ່ທັນແກ້ໄຂໄດ້ ລວມທັງຄ່າຊົດເຊີຍທີ່ດິນປຸກສ້າງ ແລະ ຈັດສັນທີ່ດິນທໍາການຜະລິດຂອງປະຊາຊົນ; ປະຊາຊົນເມືອງ ຊໍາໃຕ້ ແຂວງຫົວພັນ ສະເໜີກ່ຽວກັບການແກ້ໄຂຜົນກະທົບຂອງການກໍ່ສ້າງເຂື່ອນໄຟຟ້ານໍ້າຊໍາ 1 ໂດຍສະເພາະແມ່ນປ່າຊ້າ ຈໍານວນ 421 ຂຸມຝັງສົບ ຍັງບໍ່ທັນໄດ້ຮັບການຊົດເຊີຍ.
2).​ ຕໍ່ບັນຫາທີ່ດິນ ການຈັບຈອງທີ່ດິນ ປ່າ, ດິນຫວງຫ້າມ, ດິນບ້ານ ແລະ ດິນປະເພດຕ່າງໆ ເປັນຈໍານວນຫຼາຍ ໄວ້ຫຼາຍປີ ແຕ່ບໍ່ໄດ້ມີການພັດທະນາຫຍັງ ທັງບໍ່ທັນໄດ້ເສຍພັນທະຕໍ່ລັດ ຂອງບຸກຄົນ, ນິຕິບຸກຄົນ ຍັງມີຢູ່ທ້ອງຖີ່ນຕ່າງໆ ແຕ່ປະຊາຊົນຈໍານວນບໍ່ໜ້ອຍ ບໍ່ມີບ່ອນປຸກສ້າງທີ່ຢູ່ອາໄສ, ບໍ່ມີທີ່ດິນທໍາການຜະລິດ, ບໍ່ມີລາຍຮັບທີ່ໝັ້ນຄົງ, ມີຄວາມທຸກຍາກ ຕໍ່ສະພາບການດັ່ງກ່າວ ຄວນໄດ້ເອົາໃຈໃສ່ກວດກາຄືນ ແລະ ມີການຈັດສັນ, ມີຊ່ອງທາງເພື່ອຊ່ວຍເຫຼືອແກ້ໄຂໃຫ້ເຂົາເຈົ້າ.
– ຂໍໃຫ້ມີການກວດກາ ຕໍ່ສະພາບການຊື້-ຂາຍດິນ ແລະ ເຮືອນ ໃຫ້ຄົນຕ່າງປະເທດ ແຕ່ອອກຊື່ເປັນຄົນລາວ ມີ​ຢ່າງແຜ່ຫຼາຍ, ເກີດມີສະພາບການສໍ້ໂກງກັນລະຫວ່າງຜູ້ຊື້ດິນ ແລະ ຜູ້ອອກຊື່ ໃນໃບຕາດິນ ພາໃຫ້ເກີດມີຄວາມບໍ່ສະຫງົບ ສະເໜີໃຫ້ມີວິທີການແກ້ໄຂ​ຢ່າງເປັນຮູບປະທໍາ.
– ບັນຫາຂໍ້ຂັດແຍ່ງ ໃນການຊົດເຊີຍຜົນເສຍຫາຍຕໍ່ການຜະລິດກະສິກໍາ ຂອງປະຊາຊົນບັນດາເຜົ່າທີ່ຖືກຜົນກະທົບ ຈາກໂຄງການກໍ່ສ້າງ, ສໍາປະທານ ເພື່ອເຮັດກິດຈະກໍາຕ່າງໆຂອງລັດ ແລະ ເອກະຊົນ ຈໍານວນໜຶ່ງ ຍັງບໍ່ທັນຖືກຕ້ອງສອດຄ່ອງກັບແນວທາງ, ກົດໝາຍ ສະພາບຕົວຈິງຍັງມີຫາງສຽງ, ມີການສະເໜີ, ຮ້ອງທຸກ ຕໍ່ການຈັດຕັ້ງກ່ຽວຂ້ອງຂັ້ນຕ່າງໆ ແຕ່ການແກ້ໄຂຕົວຈິງຍັງມີຄວາມຫຍຸ້ງຍາກ, ຊັກຊ້າແກ່ຍາວ; ທັງຍັງມີບາງບ່ອນ ມັກໃຊ້ອໍານາດບໍລິຫານຕໍ່ປະຊາຊົນ ຢ່າງບໍ່ມີເຫດຜົນພຽງພໍ.
– ສະເໜີສະພາແຫ່ງຊາດ ລົງຕິດຕາມກວດກາ ບັນຫາຂໍ້ຂັດແຍ້ງ ທີ່ດິນລະຫວ່າງບໍລິສັດນໍ້າທາກໍ່ສ້າງຂົວທາງ ກັບປະຊາຊົນຢູ່ບ້ານຊຽງດາ ເມືອງ ໄຊເຊດຖາ ນະຄອນຫຼວງວຽງຈັນ ຈໍານວນ 126 ຄອບຄົວ, ແກ່ຍາວມາຫຼາຍປີ ປັດຈຸບັນເຫັນວ່າມັນກາຍເປັນບັນຫາລະຫວ່າງປະຊາຊົນ ກັບບໍລິສັດ ແລະ ອົງການປົກຄອງນະຄອນຫຼວງ; ຖ້າບໍ່ໄດ້ຮັບການແກ້ໄຂຢ່າງສົມເຫດສົມຜົນ ອາດຈະເປັນບັນຫາກວ້າງຕື່ມ.
3).​ ບັນຫາການສ້າງວຽກເຮັດງານທໍາ ໃຫ້ລູກຫຼານຂອງປະຊາຊົນບັນດາເຜົ່າ ຢູ່ທ້ອງຖິ່ນຕ່າງໆ, ລວມທັງຜູ້ຮຽນຈົບວິຊາຊີບແລ້ວ ບໍ່ມີວຽກເຮັດງານທໍາ, ບໍ່ມີລາຍຮັບ, ຈໍານວນໜຶ່ງໄປຊອກເຮັດວຽກນໍາໂຄງການຕ່າງໆຂອງຕ່າງປະເທດ, ເຮັດວຽກຢູ່ສວນກ້ວຍ… ຫຼື ອອກໄປເຮັດວຽກຢູ່ຕ່າງປະເທດ, ດ້ວຍຄວາມຮູ້ເທົ່າບໍ່ເຖິງການ, ບໍ່ມີຄວາມຮູ້ ຖືກນາຍຈ້າງເອົາປຽບ ບໍ່ຈ່າຍເງິນເດືອນ, ບໍ່ຈ່າຍຄ່າແຮງງານ, ບໍ່ຮັບຜິດຊອບຕໍ່ການປະກັນໄພສຸຂະພາບ, ຖືກກັກກັນບໍລິເວນ, ຖືກໄລ່ອອກ ສະພາບດັ່ງກ່າວນີ້ ເກີດຂຶ້ນເລື້ອຍໆໃນສັງຄົມ, ຂໍສະເໜີໃຫ້ການຈັດຕັ້ງກ່ຽວຂ້ອງໄດ້ພິຈາລະນາແກ້ໄຂດ່ວນ; ຄວນມີກົນໄກປູກຈິດສໍານຶກ, ຄ່ານິຍົມການຮຽນ, ການເຮັດວຽກ; ກວດກາຄືນຄວາມຮັບຜິດຊອບຂອງບໍລິສັດຈັດຫາງານຕ່າງໆ. ເກັບກໍາສະຖິຕິນັກຮຽນທີ່ຮຽນຈົບວິຊາຊີບ, ຜູ້ບໍ່ໄດ້ຮຽນ ບໍ່ມີວິຊາຊີບ… ລວມທັງແຮງງານລາວ ທີ່ກັບມາຈາກຕ່າງປະເທດ ໃນໄລຍະໂຄວິດ-19 ຈໍານວນຫຼາຍກໍມີວິຊາຊີບຫຼາກຫຼາຍ, ມີຄວາມຊໍານານງານ ໃນວຽກໃດໜຶ່ງ ຈະສ້າງແຮງຈູງໃຈເພື່ອໃຫ້ເຂົາເຈົ້າໄດ້ມາປະກອບສ່ວນວຽກງານໃນຂົງເຂດການຜະລິດ, ເຮັດວຽກອື່ນໆ ເພື່ອເປັນການແກ້ໄຂຊີວິດການເປັນຢູ່ຂອງເຂົາເຈົ້າ ໃຫ້ດີຂື້ນ.
– ປະຊາຊົນ ກໍຄືຜູ້ປົກຄອງເດັກ ມີຄວາມເປັນຫ່ວງຕໍ່ຄຸນນະພາບການສຶກສາຮໍ່າຮຽນ ຂອງລູກຫຼານໃນທຸກລະດັບ ທັງພາຍໃນ ແລະ ຕ່າງປະເທດ ໃນສະພາບການຮຽນປັດຈຸບັນ ໂດຍຜ່ານລະບົບອອນລາຍ ບາງຈໍານວນກໍໄດ້ຮຽນ ແຕ່ບໍ່​ມີ​ຄຸ​ນະ​ພາບ, ບາງຈໍານວນກໍບໍ່ໄດ້ຮຽນ ຍ້ອນບໍ່ມີຄວາມສະດວກ ແລະ ຈໍາກັດທັງຄູ, ນັກຮຽນ ແລະ ຜູ້ປົກຄອງ, ລູກຫຼານຈໍານວນຫຼາຍແມ່ນຮຽນດ້ວຍໂທລະສັບ; ສໍາຫຼັບນັກຮຽນຢູ່ຕ່າງປະເທດກໍບໍ່ສາມາດກັບໄປຮຽນໄດ້, ການປະສານສົມທົບກັບສະຖາບັນ ກໍຫຍຸ້ງຍາກ ຂໍສະ​ເໜີໃຫ້ຂະແໜງກ່ຽວຂ້ອງ ຈະມີວິທີແກ້ໄຂແນວໃດຊ່ວຍ.
4). ສະເໜີໃຫ້ມີມາດຕະການ ໃນການສົ່ງເສີມການລົງທຶນຂອງລັດເພີ່ນຂຶ້ນ ຊຶ່ງອົງການແນວລາວສ້າງຊາດ ເຫັນວ່າການລົງທຶນຂອງລັດ ນັບມື້ນັບຫຼຸດລົງ ແຕ່ການທົດແທນດ້ານນະໂຍບາຍທີ່ສາມາດສໍາຜັດ ແລະ ຈັບບາຍໄດ້ ໃນເຂດຫຍຸ້ງຍາກ ຍັງບໍ່ເປັນຮູບປະທໍາປານໃດເພື່ອສົ່ງເສີມການຜະລິດພາຍໃນ ແລະ ຊົມໃຊ້ຜະລິດຕະພັນຂອງລາວໃຫ້ກາຍເປັນວັດທະນະທໍາ ຊື່ງເຫັນວ່າ ຈະເປັນວິທີການກະຕຸ້ນເສດຖະກິດຂອງລາວ ຈະແມ່ນດ້ວຍການປູກຝັງ, ການລ້ຽງສັດ, ຫັດຖະກໍາ ແລະ ອື່ນໆ ທີ່ເຮົາສາມາດຜະລິດໄດ້, ສາມາດກຸ້ມຕົນເອງໄດ້; ພ້ອມກັນນີ້ ກໍຄວນພິຈາລະນາ ຕໍ່ການນໍາເຂົ້າຈາກຕ່າງປະເທດ ທີ່ເຫັນວ່າສິນຄ້າຂອງລາວມີຢູ່ແລ້ວຕົວຢ່າງ: ຢູ່ນະຄອນຫຼວງວຽງຈັນ ມີ 813 ຊະນິດສິນຄ້າ ທີ່ສາມາດແຂ່ງຂັນໄດ້ ຈະເປັນການປະກອບສ່ວນໃຫ້ເສດຖະກິດລາວເຂັ້ມແຂງ, ປະຊາຊົນກໍມີວຽກເຮັດງານທໍາ, ທັງຈະມີລາຍຮັບ ຈະເປັນການຊ່ວຍຫຼຸດຜ່ອນຄວາມຫຍຸ້ງຍາກ ດ້ານເງິນຕາອີກບໍ່ຫຼາຍກໍໜ້ອຍ ທັງເປັນການຍົກສູງ, ເຊີດຊູຈິດໃຈຮັກຊາດ ແລະ ຄວາມເປັນເຈົ້າຂອງປະເທດຊາດອີກດ້ວຍ.
5).​ ອົງການປົກຄອງ ແລະ ປະຊາຊົນ ກຸ່ມເນີນສູງ ເມືອງ ໂພນໄຊ ແຂວງ ຫຼວງພະບາງ ມີ 5 ບ້ານຄື (ບ້ານລ້ອງແງດ, ບ້ານ ລ້ອງຍົມໃຫຍ່, ບ້ານ ລັງກ້ອງຜາແຕ້ມ, ບ້ານ ຜາຕູບໃຕ້, ບ້ານຜາຕູບເໜືອ) ເຂດດັ່ງກ່າວ ເປັນເຂດປະຕິວັດ ໃນເມື່ອກ່ອນ ຍັງຂາດປັດໄຈເພື່ອຊຸກຍູ້ການພັດທະນາເສດຖະກິດ-ສັງຄົມ, ທ່າແຮງຂອງປະຊາຊົນເຂດດັ່ງກ່າວ ຖືເອົາການຜະລິດກະສິກໍາເປັນຕົ້ນຕໍ ປະຊາຊົນຜະລິດແລ້ວບໍ່ໄດ້ຂາຍ ບໍ່ມີຜູ້ໄປຊື້ ຍ້ອນເສັ້ນທາງຍາກ ປັດຈຸບັນປະຊາຊົນຫັນມາປູກຫຍ້າລ້ຽງສັດເປັນສ່ວນໃຫຍ່; ຂໍສະເໜີ ໃຫ້ການຈັດຕັ້ງພັກ-ລັດ ຊ່ວຍພິຈາລະນາ ແກ້ໄຂບັນຫາ ( ດຶງໄຟຟ້າແຮງສູງເຂົ້າຫາບ້ານ, ການພັດທະນາເສັ້ນທາງ ໃຫ້ທຽວໄດ້ 2 ລະດູ; ການສື່ສານ ແລະ ຂະແໜງການອື່ນໆ) ຜ່ານມາປະຊາຊົນໄດ້ສະເໜີຫາພາກສ່ວນກ່ຽວຂ້ອງຫຼາຍເທື່ອ ແຕ່ບໍ່ໄດ້ຮັບຄໍາຕອບ, ບໍ່ມີການພິຈາລະນາແກ້ໄຂ.
– ປະຊາຊົນຢູ່ຕາມທາງຮ່ອມ, ທາງຊອຍ ຈໍານວນໜຶ່ງ ໃນ 4 ຕົວເມືອງ ຂ​ອງນະຄອນຫຼວງວຽງຈັນ ຍັງພົບຄວາມຫຍຸ້ງຍາກ ໃນການໄປມາ, ການທໍາມາຫາກິນ ຍ້ອນເສັ້ນທາງເປ່ເພ, ເປັນບວກ, ເປັນຂຸມ ບໍ່ໄດ້ຮັບການສ້ອມແປງ, ບໍ່ມີໄຟ​ເຍືອງ​ທາງ ພາໃຫ້ເກີດອຸບັດເຫດ, ຍາມແລ້ງກໍເປັນຂີ້ຝຸ່ນ; ທັງເປັນເງື່ອນໄຂໃຫ້ກຸ່ມຄົນບໍ່ດີສວຍໃຊ້ໂອກາດກໍ່ຄວາມບໍ່ສະຫງົບ, ຂໍໃຫ້ຊ່ວຍແກ້ໄຂ. ຜ່ານມາປະຊາຊົນ ແລະ ຊັ້ນຄົນຕ່າງໆ ໃນສັງຄົມ ມີຄໍາເວົ້າວ່າ: ມີບາງບັນຫາໄດ້ສະເໜີຫຼາຍເທື່ອແລ້ວ ແຕ່ບໍ່ໄດ້ຮັບການແກ້ໄຂ ທັງບໍ່ມີຄໍາຕອບໃຫ້ປະຊາຊົນ ເຮັດໃຫ້ປະຊາຊົນບໍ່ຢາກມີຄໍາເຫັນ.
6). ປະຊາຊົນ, ຊັ້ນຄົນໃນສັງຄົມ ເຫັນດີສະໜັບສະໜູນ ຕໍ່ພັກ-ລັດ ໃນການຈັດຕັ້ງປະຕິບັດວາລະແຫ່ງຊາດ ໂດຍສະເພາະແມ່ນວາລະວ່າດ້ວຍການແກ້ໄຂບັນຫາຢາເສບຕິດ ແຕ່ກໍເປັນຫ່ວງໃນການປະຕິບັດຕົວຈິງ. ບັນຫາຫຍໍ້ທໍ້ໃນສັງຄົມ ມີຫຼາຍພໍສົມຄວນ ອັນເນື່ອງມາຈາກສະຕິເຄົາລົບ ແລະ ປະຕິບັດລັດຖະທໍາມະນູນ, ກົດໝາຍ ຂອງຊັ້ນຄົນ ໃນສັງຄົມ ຍັງບໍ່ສູງ, ມີການລະເມີດລະບຽບກົດໝາຍ ​ຊຶ່ງໃນນັ້ນເຫັນວ່າບັນຫາການຄ້າ-ຂາຍ, ການເສບຢາເສບຕິດ ມີການບໍລິການກວ້າງຂວາງ ໄປທົ່ວເຖິງທຸກເຂດຕາມໄຮ່ນາ, ຮົ້ວສວນ, ບ່ອນປະຊາຊົນດໍາລົງຊີວິດ, ການທໍາມາຫາກິນ ບາງຄອບຄົວພົ້ນທຸກແລ້ວ ແຕ່ທຸກຄືນ ແລະ ທຸກຫຼາຍກ່ວາເກົ່າ ຍ້ອນສະມາຊິກໃນຄອບຄົວຕິດຢາເສບຕິດ, ຫຼິ້ນກິນຟຸ່ມເຟືອຍ, ບໍ່ຢ້ານລະບຽບກົດໝາຍ ແລະ ສະພາບດັ່ງກ່າວ ມັນຄຸມເຄືອມາຕະຫຼອດ ພົວພັນທຸກກຸ່ມຄົນ. ສະນັ້ນ ຂໍໃຫ້ການແກ້ໄຂບັນຫາດັ່ງກ່າວນີ້ ຈົ່ງໄດ້ປະຕິບັດມາດຕະການຢ່າງເຂັ້ມງວດ, ເດັດຂາດ ຕໍ່ຜູ້ກະທໍາຜິດ ລວມທຸກຂັ້ນຕອນຂອງຂະບວນການ ໂດຍບໍ່ມີການຍົກເວັ້ນໃດໆ.
7).​ ຂໍ້ສະເໜີຕໍ່ສະມາຊິກສະພາແຫ່ງຊາດ ຂໍໃຫ້ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ເພີ່ມທະວີການລົງພົບປະ ແລະ ໃກ້ຊິດກັບປະຊາຊົນໃຫ້ຫຼາຍຂຶ້ນຕື່ມ ໂດຍສະເພາະ ປະຊາຊົນຢູ່ເຂດພູດອຍຫ່າງໄກ-ທຸລະກັນດານ, ຕາມຊາຍແດນ ຄວນມີການວາງຄາດໝາຍຊັດເຈນ.
8).​ ສະເໜີລັດຖະບານ ສືບຕໍ່ເອົາໃຈໃສ່ ແກ້ໄຂບັນຫານະໂຍບາຍຕໍ່ຜູ້ທີ່ມີຄຸນງາມຄວາມດີ ຕໍ່ປະເທດຊາດ ຕາມລະບຽບການ ແລະ ຊ່ວຍເຫຼືອປະຊາຊົນທີ່ທຸກຍາກຂາດເຂີນ ໃນໄລຍະທີ່ມີການລະບາດຂອງພະຍາດໂຄວິດ-19, ຜູ້ທີ່ປະສົບໄພພິບັດທໍາມະຊາດຢູ່ທ້ອງຖິ່ນຕ່າງໆ ທີ່ມີຜົນເສຍຫາຍຫຼາຍ ແຕ່ການແກ້ໄຂບັນເທົ່າທຸກ ຍັງຊັກຊ້າແກ່ຍາວ, ປະຊາຊົນມີຄວາມຄອງຄອຍ.
9). ສະເໜີສະພາແຫ່ງຊາດ ຊຸກຍູ້ລັດຖະບານເອົາໃຈໃສ່ວຽກງານກໍ່ສ້າງຮາກຖານການເມືອງ ຕິດພັນກັບການແຂ່ງຂັນຮັກຊາດ ແລະ ພັດທະນາ, ວຽກງານສາມສ້າງ ຂອງພັກໃຫ້ສອດຫ້ອຍວຽກງານສະພາແຫ່ງຊາດ ໃຫ້ເປັນຮູບປະທໍາ ເປັນຕົ້ນວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຊຶ່ງລັດຖະບານໄດ້ຈັດສັນງົບປະມານໃຫ້ຫຼາຍສົມຄວນ ແຕ່ການປະຕິບັດເຫັນວ່າ ການສ້າງບ້ານພັດທະນາ, ການສ້າງຄອບຄົວໃຫ້ພົ້ນທຸກ, ຄອບຄົວພັດທະນາ ແລະ ຄາດໝາຍອື່ນໆ ບໍ່ບັນລຸຕາມແຜນການ.
10).​ ສະເໜີໃຫ້ຊຸກຍູ້ລັດຖະບານເລັ່ງປັບປຸງຂອດຂັ້ນການບໍລິການ, ບໍລິຫານລັດ ໃຫ້ກະທັດຮັດ ແລະ ເລັ່ງປັບປຸງການແບ່ງຂັ້ນຄຸ້ມຄອງລະຫວ່າງຂະແໜງການຂັ້ນສູນກາງ ແລະ ທ້ອງຖິ່ນ.